ދިވެހިރާއްޖޭގެ ދެކުނުގެ ޚާއްސަ އިޤްތިޞާދީ ސަރަހައްދު ކަނޑައެޅުމުގެ މައްސަލައިގައި ކުރީގެ ބަންޑާރަނައިބުން ބޮޑެތި އިހުމާލުތަކެއް ވެފައިވާކަމަށް ބަންޑާރަ ނައިބު އިބްރާހިމް ރިއްފަތު ވިދާޅުވެއްޖެ އެވެ. 

ދިވެހިރާއްޖޭގެ ދެކުނުގެ ސަރަހައްދުން ބައެއް ދޫކޮށްލުމުގައި ބަންޑާރަނައިބު އިބްރާހިމް ރިއްފަތުވެސް ބައިވެރިވެފައިވާކަމަށް ތުހުމަތުކޮށް، މަޖިލީހަށް ހުށައެޅި ބަންޑާރަނައިބުގެ އިތުބާރު ނެތްކަމުގެ މައްސަލައިގައި ޖަވާބުދާރީވުމުގެ ފުރަތަމަ ފުރުސަތު މިއަދު ވަނީ ރިއްފަތަށް ދެއްވާފައެވެ. 

މަޖިލީހުގެ މިއަހަރުގެ ދެ ވަނަ ދައުރުގެ 8 ވަން ޖަލްސާގައި ހުށައެޅި އެ މައްސަލައަށް ވާހަކަދައްކަވަމުން ފައްޓަވަމުން ރިއްފަތު ވިދާޅުވީ ޗާގޯސްއާއި ރާއްޖެއާއި ދެމެދު ފުށުއަރާ ސަރަހައްދެއް އޮތްކަމަށް ބުނެ މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައެޅި މައްސަލަ ކާމިޔާބުކުރީ ދިވެހިރާއްޖެއިން ކަމަށެވެ. 

އަދި ރިއްފަތު ވަނީ އެ މައްސަލައިގައި އޭނާގެ މައްޗަށް ކުރެވޭ ތުހުމަތުތަކަށް އިންކާރުކުރައްވާފަ އެވެ. 

ރިއްފަތު ވިދާޅުވީ ދެކުނުގެ ޚާއްސަ އިޤްތިޞާދީ ސަރަހައްދު (އީއީޒެޑް) ގެ މައްސަލައަކީ ޒަމާންވީ ބޮޑު މައްސަލައެއްކަމަށެވެ. 

1992 ވަނަ އަހަރުން ފެށިގެން އެ މައްސަލައަށް ޙައްލު ހޯދުމަށް ކުރީގެ އެއްވެސް ސަރުކާރަކުން މަސައްކަތް ކޮށްފައި ނުވާކަމަށް ރިއްފަތު ވިދާޅުވި އެވެ. އަދި ވިދާޅުވީ އެ ހާ ހިސާބުން ފެށިގެން އައި އެއްވެސް ސަރުކާރަކަށް އެ މައްސަލައިގައި ދިވެހިންގެ ހައްގުގައި ގޮތެއް ނިންމާފައި ނުވާކަމަށެވެ. 

އެކަން ފާހަގަކުރައްވާ ބަންޑާރަ ނައިބު ރިއްފަތު ވިދާޅުވީ ދެކުނުގެ އީއީޒެޑް ކަނޑައެޅުމުގައި ވޭތުވެދިޔަ ސަރުކާރުތަކުން ގޮތެއް ނިންމާފައި ނުވުމުގައި ކުރީގެ ބަންޑާރަ ނައިބުކަން ކުރެއްވި ފަރާތްތައްވެސް މި މައްސަލައިގައި ބޮޑެތި އިހުމާލުތައް ވެފައިވާ ކަމަށެވެ. 

އެކަމާއި ގުޅޭ ތަފްސީލުތައް ހިއްސާކުރައްވަމުން ރިއްފަތު ވިދާޅުވީ ދެކުނުގެ އީއީޒެޑް މައްސަލައިގައި ކުރީގެ ރައީސް މައުމޫނު އަބްދުލްގައްޔޫމުގެ ސަރުކާރުގައި އޭރުގެ ބަންޑާރަ ނައިބާއި ހަވާލުކުރި ސްޓްރެޖީ މިހާތަނަށް ވެސް ހަދާފައި ނުވާކަމަށެވެ. 

އޭގެ އިތުރުން ރިއްފަތު ވިދާޅުވީ 2019 ވަނަ އަހަރު މޮރިޝަސްއަށް ރާއްޖެއާއި ދެކޮޅަށް މައްސަލައެއް ހުށައަޅަން ފުރުސަތު ލިބުނީ ވެސް ކުރީ ސަރުކާރުތަކުން އެ މައްސަލައިގައި ރާއްޖޭގެ ހައްގުތައް ހިމާޔަތްކުރުމަށް އެކަށީގެންވާ މަސައްކަތްތަކެއް ކޮށްފައި ނުވާތީ ކަމަށެވެ. 

އެހެން ނަމަވެސް އިޓްލޮސްގައި އޮތް މައްސަލަ ކުރިއަށް ދިޔައިރު، ދިވެހިރާއްޖެއިން ވާނީ ރާއްޖެއަށް އެންމެ ފައިދާ ބޮޑު ގޮތަށް ވަކާލާތުކޮށްފައި ކަމަށާއި، ނަތީޖާއެއްގެ ގޮތުން މައްސަލަ ނިމިގެން ދިޔައިރު ރާއްޖެއަށް ބޮޑުބައި ލިބިގެން ގޮސްފައިވާކަމަށް ރިއްފަތު ވިދާޅުވި އެވެ.