ޗާގޯސްއާއި ދިވެހިރާއްޖެއާއި ދެމެދު ފުށުއަރާ ސަރަހައްދެއް އޮތްކަމަށް ބުނެ މޮރިޝަސްއިން އިންޓަނޭޝަނަލް ޓަރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައެޅި މައްސަލައިގައި، އެ މައްސަލަ ބެއްލެވި 9 ފަނޑިޔާރުން އިއްތިފާގުން ނިންނި ނިންމުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު މޮރިޝަސްގެ ބޮޑުވަޒީރަށް ފޮނުއްވި ސިޓީފުޅަށް ރިއާޔަތްކޮށްފައި ނުވާކަމަށް ބަންޑާރަ ނައިބު އިބްރާހިމް ރިއްފަތު ވިދާޅުވެއްޖެ އެވެ.
ރިއްފަތު މިފަދައިން ވިދާޅުވެފައިވަނީ ފޯޅަވަހި މައްސަލައާއި ގުޅިގެން ބަންޑާރަނައިބުގެ އިތުބާރު ނެތްކަމުގެ މައްސަލަ ހުށައެޅުމާއި ގުޅިގެން، މިއަދުގެ މަޖިލީހުގެ ޖަލްސާއަށް ވަޑައިގެން ޖަވާބުދާރީވާން ލިބިލެއްވި ފުރުސަތުގައި ވާހަކަދައްކަވަމުން ނެވެ.
މަޖިލީހުގައި ވާހަކަދައްކަވަމުން ރިއްފަތު ވިދާޅުވީ ދެކުނުގެ އީޒެޑްގެ މައްސަލައާއި ރާއްޖޭގެ އައުޓަރކޮންޓިނެންޓަލްޝަލް ޝެލްފްގެ މައްސަލާގައިވެސް ރާއްޖެއިން ނަގާފައިވާ ގާނޫނީ ސްޓޭންޑް ބަދަލު ނުކުރާނެކަމަށް ރައީސް ޞާލިހު މޮރިޝަސްއަށް ފޮނުވި ސިޓީގައި ބަޔާންކޮށްފައިވާ ކަމަށެވެ.
އެހެންކަމުން އެމަނިކުފާނުގެ ސިޓީފުޅުގެ ސަބަބުން އިޓްލޮސްގައި އޮތް މައްސަލައަށް އަސަރުކޮށްފައިވާކަމަށް ބުނެ ކުރީގެ ބަންޑާރަ ނައިބުން ހައްދަވަމުން ދަނީ އިތުރުފުޅުތަކެއް ކަމަށާއި، އިޓްލޮސްއިން މައްސަލަ ނިންމެވި އެއްވެސް ފަނޑިޔާރަކު ބޭނުންކުރެއްވި އެއްވެސް ކިތާބީ ހެއްކެއްގައި އެ ސިޓީފުޅު ހިމަނުއްވާފައި ނުވާކަމަށް ރިއްފަތު ވިދާޅުވި އެވެ.
"އިޓްލޮސްގެ މައްސަލަ ސާބިތުކުރުމަށް، އިޓްލޮސްގެ ފަނޑިޔާރުން ފާހަގަކޮށްފައިވާ އެއްވެސް ކިތާބީ ހެއްކެއްގެ ތެރޭގައި ވެސް ރައީސް ފޮނުވި ސިޓީ ނުހިމެނޭކަން ފާހަގަކުރަން. ދެކުނުގެ އީޒެޑްގެ މައްސަލައާއި ރާއްޖޭގެ އައުޓަރކޮންޓިނެންޓަލްޝަލް ޝެލްފްގެ މައްސަލާގައިވެސް ރާއްޖެއިން ނަގާފައިވާ ގާނޫނީ ސްޓޭންޑް ބަދަލު ނުކުރާނެކަމަށް ރައީސްގެ ސިޓީގައި ކަޅާއި ހުދުން ލިޔެފަ އޮތްކަން ތިޔަ އިއްޒަތްތެރި މެމްބަރުންނަށް ދަންނަވަން"
ބަންޑާރަ ނައިބު ރިއްފަތު
އޭގެ އިތުރުން ރިއްފަތު ވިދާޅުވީ ރައީސް ޞާލިހު މޮރިޝަސްއަށް ފޮނުވި ސިޓީފުޅާއި ދެކުނުގެ އީއީޒެޑް މައްސަލައާއި ގުޅުވާ، ދައުލަތުން ކޮޅު ބަދަލުކޮށްފައިވާކަމަށް ކުރީގެ ބަންޑާރަ ނައިބުން ދައްކަވާ ވާހަކަތަކަކީ އެއްވެސް އަސާސެއް ނެތް ދޮގު ވާހަކަތަކެއް ކަމަށެވެ.
Advertisement
This content is created and paid for by advertisers and does not involve Voice Journalists
