ދިވެހިރާއްޖޭގެ ކުޑަކުދިންނާއި، ބޮޑުވަމުން އަންނަ ކުދިންގެ މެދުގައިވެސް މަޔޯޕިއާ އާންމުވެފައިވާ ކަމަށާ، އެކަމުގެ މައިގަނޑު އެއް ސަބަބަކީ އިލެކްޓްރޯނިކް ވަސީލަތްތައް ބޭނުން ކުރުން ކަމަށް ޗައިނާ-ދިވެހިރާއްޖެ އޮޕްތޮމޮލޮޖީ ސެންޓަރުގެ، ޗައިނާގެ ޑޮކްޓަރުންގެ ޓީމުން ބުނެފިއެވެ. 

ޑރ. އެންޑީ އަބްދުالله އަބްދުލް ހަކީމް އޮޕްތޮމޮލޮޖީ ސެންޓަރުގައި ހުންނަ ޗައިނާ-ދިވެހިރާއްޖެ އޮޕްތޮމޮލޮޖީ ސެންޓަރަށް މިހާތަނަށް ދައްކާފައިވާ ބަލިމީހުންގެ ތެރެއިން، ކުޑަކުދިންނާއި، ބޮޑުވަމުންއަންނަ ކުދިންގެ ތެރޭގައި އެންމެ އާންމު ކަމަކީ މަޔޯޕިއާ ކަމަށް އެ ސެންޓަރުން ވަނީ ބުނެފައެވެ. 

މަޔޯޕިއާ ނުވަތަ ނިއާ ސައިޓެޑްނެސް އަކީ ދުރު ނުފެނުމެވެ. ކައިރި ރީތިކޮށް ފެނުނަސް 2-3 ފޫޓަށްވުރެ ދުރު ފުސްކޮށް ހުރުމެވެ. މިކަން ދިމާވަނީ ލޮލުގެ ކަޅި ދިގުވުމުން ނުވަތަ ކޯނިއާގެ ގަދަ ކައްސާރައިގެ ސަބަބުން ސީދާ ރެޓިނާއަށް އަލި ފޯކަސް ކުރުމުގެ ބަދަލުގައި ރެޓިނާގެ ކުރިމައްޗަށް ފޯކަސް ވުމުންނެވެ.

މައޯޕިއާއަކީ އާންމުކޮށް ކުޑައިރު އަލާމާތްތައް ފެންނަންފަށާ ބައްޔެކެވެ. އަދި އުމުރުން ދުވަސްވާ ވަރަކަށް ލޮލުގެ ފެނުން ދަށްވެ ލޮލުގެ އެހެން ބަލިތައް ޖެހުމާއި ލޯ އަނދިރި ވުން އެކަށީގެންވެއެވެ. ކަން މިހެން ހުރި ނަމަވެސް ކުޑަކުދިންގެ މިބަލި ދެނެގަތުމަކީ ބައެއް ފަހަރު އުނދަގުކަމެކެވެ. އާންމުކޮށް މިހެން ދިމާވަނީ އެކުދިންނަށް އެވާހަކަ ބުނަން ނޭނގޭތީ އެވެ.

ދިވެހިރާއްޖޭގެ އިތުރުން ދުނިޔޭގެ ގައުމުތަކުގައިވެސް މަޔޯޕިއާ އަކީ އާންމުވަމުން އަންނަ، ސަމާލުވާންވީ ބައްޔެކެވެ. މަޔޯޕިއާ ޖެހުމަށް މެދުވެރިވާ އެންމެ ބޮޑު ސަބަބަކީ ދިރިއުޅުމުގެ އާދަކާދަތައް ގެންގުޅޭ ގޮތްތައް ކަމަށް ކަމާބެހޭ މާހިރުން ބުނެއެވެ. ޚާއްސަކޮށް، ގެއިން ބޭރުގައި ހޭދަކުރާ ވަގުތު މަދުވުމާއި އަދި ފޮތް ކިއުން ނުވަތަ ފޯން، ޓެބްލެޓް، ކޮމްޕިއުޓަރ ނުވަތަ އެނޫންވެސް އެހެން އިލެކްޓްރޯނިކް ވަސީލަތްތައް ބޭނުން ކުރުމުގައި ހޭދަކުރާ ވަގުތު ގިނަވެ، މާ ކައިރިން އެއްޗެތި ބެލުން ގިނަވުމެވެ. ރާއްޖޭގައިވެސް މަޔޯޕިއާ އާންމުވުމުގެ މައިގަނޑު ސަބަބަކީ މިއީ ކަމަށް ޗައިނާގެ ލޮލުގެ ޑޮކްޓަރުންގެ ޓީމުންވެސް ވަނީ ފާހަގަކޮށްފައެވެ. 

ޗައިނާގެ ޑޮކްޓަރުންގެ ޓީމަށް ދައްކާފައިވާ ކުދިންގެ ދުރު ނުފެންނަ ގިނަ ކުދިންނަށް ރަނގަޅު އެދެވޭ ފަރުވާއެއް ދެވިފައި ނުވާކަން އެ ޑޮކްޓަރުން ވަނީ ފާހަގަކޮށްފައެވެ. އަދި އޭގެ ސަބަބުން އެކުދިންގެ ނަފްސާނީ އަދި ޖިސްމާނީ ދުޅަހެޔޮކަމަށްވެސް އަސަރުކޮށްފައިވާ ކަމަށް ބުނެފައިވެއެވެ. 

ޗައިނާގެ ލޮލުގެ ޑޮކްޓަރުންގެ ޓީމް--

އެހެންކަމުން، މަޔޯޕިއާ ހުންނަ ކުދިންނަށް އަވަހަށް ފަރުވާ ކުރުމާއި، އަދި އެކަމުން ރައްކާތެރިވުމަށް އެޅެންހުރި ފިޔަވަޅުތައް އެޅުމަށް އެ ޑޮކްޓަރުން ވަނީ އިރުޝާދު ދެއްވާފައެވެ.

އެގޮތުން ފާހަގަކޮށްފައިވާ ކަންކަމަކީ؛

1) އައުޓް ޑޯ ކުޅިވަރުތައް، ނުވަތަ ބޭރުގައި ކުޅެވޭ ކުޅިވަރުތަކާއި ހަރަކާތް ތަކުގައި ބައިވެރި ވުމަކީ ދުރު ނުފެނުމުގެ މައްސަލައިން ރައްކާތެރިވާ ކަމެއް ކަމަށް ދިރާސާތަކުން ދައްކައެވެ. އެހެންކަމުން ކުދިންނާއި އުމުރުން ދުވަސްވީ މީހުންވެސް ކޮންމެ ދުވަހަކު މަދުވެގެން 2 ގަޑި އިރު ގެއިން ބޭރުގައި އެފަދަ ކަމެއްގައި ވަގުތު ހޭދަކުރުން.

2) ރަނގަޅު އާދަތައް އަށަގެންނެވުމާއި، އިލެކްޓްރޯނިކް ވަސީލަތްތައް ބޭނުންކުރާ މިންވަރު މަދުކުރުން. ކިޔަވާ ވަގުތު ތަކުގައި ވެސް 20-20-20 އުސޫލާއި އެއްގޮތަށް ކިޔެވުން. އެއީ، 20 މިނެޓް ވަންދެން ކިޔެވުމަށްފަހު، ބްރޭކް އެއް ނަގައި އެމީހަކާއި 20 ފޫޓު ދުރުގައި ހުރި އެއްޗަކަށް 20 މިނެޓް ވަންދެން ބެލުމެވެ. 

3) ރަނގަޅު އަލީގައި ކިޔެވުން. ރަނގަޅަށް ދުވާލުގެ އަލި ނުލިބޭ ނަމަ، ކިޔަވާ ބޮކި ދިއްލުމަށްފަހު ކިޔެވުން. އަދި ރޭނގަޑު ނުވަތަ ހަވީރު ކިޔަވާ ނަމަ، މޭޒުމަތީގައި ހުންނަ ކިޔަވާ ބޮކީގެ އިތުރުން ކޮޓަރީގައި ހުންނަ ބޮކި ވެސް ދިއްލުން. 

4) ކުޑަކުދިންނާއި ބޮޑުވަމުން އަންނަ ހުރިހާ ކުދިންވެސް ލޮލުގެ ރަނގަޅު ކްލިނިކް އަކުން އަހަރަކު ދެފަހަރު ލޮލުގެ ޗެކްއަޕެއް ހެދުން. އަދި މައްސަލައެއް ފެންނަ ނަމަ، ފަރުވާކޮށް ޑޮކްޓަރ ގެ އިރުޝާދާއި އެއްގޮތަށް އަމަލު ކުރުން. 

5) ފެނުމުގެ ދަތިކަން އުޅޭ ނަމަ، ލޮލުގެ ރަނގަޅު ކްލިނިކް އެއް ނުވަތަ ހޮސްޕިޓަލަކަށް ދައްކައި، ލޮލުގެ ނަންބަރާއި އެއްގޮތަށް ނަންބަރު އައިނު އެޅުން. 

މިކަންކަމަށް ސަމާލުވެ، ކުދިން ވީހާވެސް ބޮޑަށް ގުދުރަތީ ވެށިތަކުގައި ގެންގުޅުމަކީ މަޔޯޕިއާ އިން ރައްކާތެރިވުމަށާ، އެކުދިންގެ ފުރިހަމަ ހެދިބޮޑުވުމާއި، ނަފްސާނީ ދުޅަހެޔޮ ކަމަށް މުހިންމު ކަމެކެވެ.