ބަނޑާރަނައިބު އިބްރާހިމް ރިފްއަތުގެ އިތުބާރު ނެތްކަމުގެ މައްސަލައިގައި މަޖިލީހަށް ފޮނުއްވި ޖަވާބާއި ގުޅިގެން، އޭނާ މަޖިލީހުގެ އިމްތިޔާޒަށް އަރައިގަނެފައިވާކަމަށް ވިދާޅުވެ، ފަރެސްމާތޮޑާ ދާއިރާގެ މެމްބަރު ހުސައިން މުހައްމަދު ލަތީފް ހުށަހެޅުއްވި އިމްތިޔާޒުގެ މައްސަލަ މަޖިލީހުގެ ކޮމިޓީއަށް ފޮނުވައިފި އެވެ. 

ހުސައިން ހުށަހެޅުއްވި މައްސަލައިގައި ވިދާޅުވީ، ބަންޑާރަ ނައިބަކީ މަޖިލީހަށް ޖަވާބުދާރީވާން ޖެހޭނެ ބޭފުޅެއް ކަން ގާނޫނުއަސާސީގައި ވަރަށް ސަރީހަކޮށް ބުނެފައި އޮންނަ ކަމަށެވެ. ކަން މިހެން ހުރިއިރު, ބަންޑާރަ ނައިބުގެ މަގާމުގައި ހުންނަވާ ފަރާތެއްގެ މަސައްކަތްތަކާއި ގުޅޭ ގޮތުން، މަޖިލީހަށް ޖަވާބުދާރީވާން ޖެހޭ ކަމަށް ދެކިވަޑައިނުގަންނަވާކަމަށް ދޭހަވާ މޭރުމަކުން ރިފްއަތު ވާހަކަދައްކަވާފައިވާ ކަމަށާ އެއީ މުޅި ރައްޔިތުންގެ މަޖިލީހަށް އޭނާ ކުރެއްވި މަލާމާތެއްކަމަށެވެ. 

މިއާއެކު ހުސައިން ވިދާޅުވީ ދިވެހިރާއްޖޭގެ ކަނޑުގެ ސަރަހައްދުތަކާއި ބެހޭ ގާނޫނަށް ގެނެވިފައިވާ އިސްލާހުތަކުގައި ރާއްޖޭގެ ކަނޑުގެ ސަރަހައްދަށް އެއްވެސް ބަދަލެއް ގެނެވޭނީ ރައްޔިތުންގެ މަޖިލީހަށް ހުށައަޅައިގެންކަން ބަޔާންކޮށްފައިވާކަމަށެވެ. އަދި ރާއްޖޭގެ އިގްތިސާދީ ސަރަހައްދަށްވެސް ބަދަލުތަކެއް ގެނެވޭނީ މަޖިލީހުން ފާސްކޮށްގެންކަން އެނގެން އޮތް އިރު، އެކަންކަމުގައި މަޖިލީހުން ފާސްކުރަންޖެހޭ ކަމެއް ނެތްކަމަށް ބަންޑާރަ ނައިބު އިބްރާހިމް ރިފްއަތު ވިދާޅުވެފައިވުމަކީ މުޅި މަޖިލީހުގެ އިމްތިޔާޒަށާއި ބާރުތަކަށް އަރައިގަތުން ނޫންކަމަށް ދެކެވޭނެ އެއްވެސް ގާނޫނީ ހަމައެއް ނެތްކަމަށެވެ. 

އެހެންކަމުން މަޖިލީހުގެ ގަދަރަށް އުނިކަން އަންނާނެ ގޮތަށް ކަންތައްކޮށްފައިވާތީ އެ މައްސަލަ ބަލަން ކޮމިޓީއަށް ހުށަހެޅުމަށް ހުސެއިން ވަނީ ގޮވާލައްވާފައެވެ. 

އެއާއެކު މަޖިލީހުގެ ރައީސް މުހައްމަދު ނަޝީދުވަނީ އެ މައްސަލަ ކޮމިޓީއަަށް ހުށަހަޅުއްވާނެ ކަމަށް ވިދާޅުވެފައެވެ. އަދި އެ މައްސަލައިގައި މަޖިލީހުގެ ތަޅުމުގައި ބަހުސްކުރުމަށް ވޯޓަށްވެސް އަހާފައެވެ.

ނަމަވެސް އެ މައްސަލައަށް ބަހުސް ކުރުމަށް ވޯޓު ދެއްވީ 20 މެމްބަރެކެވެ. އަދި 58 މެމެބްރެއްވަނީ ބަހުސްކުރަން ފެނިވަޑައިނުގަންނަވާކަމަށް ވޯޓުދެއްވާފައެވެ. އެހެން ކަމުން އެ މައްސަލަ ބަލައިގަނެ ބަހުސްކުރަން ފާހެއް ނުވިއެވެ.