ރައްޔިތުންގެ މަޖިލީހުގެ މިއަދުގެ ޖަލްސާގައި ކުރުމަށް މުހިންމު މަސައްކަތްތަކެއް ހުރި ނަމަވެސް، ނިޒާމު ގެއްލި މަޖިލީސް ކުރިއަށް ގެންދިއުމަށް ރިޔާސަތަށް ހުރަސްއަޅަމުން ދިއުމާއި ގުޅިގެން މިއަދުގެ މަޖިލިސް ޖަލްސާ ނިންމާލައިފި އެވެ. 

ރައްޔިތުންގެ މަޖިލީހުގެ މިއަދުގެ އެޖެންޑާގެ އެންމެ ފުރަތަމަ ކަމެއްގެ ގޮތުގައި އޮތީ ބަންޑާރަ ނައިބު އިބްރާހިމް ރިއްފަތުގެ އިތުބާރު ނެތްކަމުގެ މައްސަލައިގެ ބަހުސް ކުރިއަށް ގެންދިއުމެވެ. 

އެހެން ނަމަވެސް މިއަދުގެ ޖަލްސާގައި ބަންޑާރަނައިބު އިބްރާހީމް ރިފްއަތުގެ އިތުބާރުނެތްކަމުގެ މައްސަލައިގައި ލިޔުމުން ޖަވާބުދާރީ ވެވަޑައިގެންނެވިއިރު ރައްޔިތުންގެ މަޖިލީހުގެ އިމްތިޔާޒަށާއި ގަދަރަށް އުނިކަން ލިބޭ އަމަލެއް ކުރައްވާފައިވާ ކަމަށް ބުނެ ރައްޔިތުންގެ މަޖިލީހަށް އިމްތިޔާޒު މައްސަލައެއް ހުށައަޅާފަ އެވެ. 

މި މައްސަލަ ހުށައަޅާފައިވަނީ ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެމްބަރު ހުސެއިން މުޙައްމަދު ލަތީފެވެ. 

މެމްބަރު ހުސެއިން މުޙައްމަދު ލަތީފު

މައްސަލަ ހުށަހަޅުއްވަމުން ހުސެއިން ވިދާޅުވީ އިތުބާރު ނެތްކަމުގެ މައްސަލައިގައި ބަންޑާރަނައިބު ރިފްއަތު ލިޔުމުން ހުށަހެޅުއްވި ޖަވާބުގައި މަޖިލީހުގެ އިމްތިޔާޒުތަކަށް ގޮންޖައްސަވާފައިވާ ކަމަށެވެ.

ރިފްއަތު ލިޔުމުން ހުށަހެޅި ޖަވާބުގައި، މަޖިލީހަށް ބަންޑާރަ ނައިބުގެ މަސައްކަތްތަކާ ގުޅޭ ގޮތުން ސުވާލުނުކުރެވޭނެ މޭރުމަކުން ލިޔުއްވާފައިވާތީ، އެއީ މަޖިލީހަށް ކުރި މަލާމާތެއް ކަމަށް އެ މައްސަލައިގައި ފާހަގަކޮށްފައިވެ އެވެ.

ލިޔުމުން ހުށަހެޅި ޖަވާބުގައި މުޅި މަޖިލީހުގެ އިމްތިޔާޒާއި ގަދަރަށް އުނިކަން އަންނާނެ ގޮތަށް އަމަލުކޮށްފައިވާތީ މައްސަލަ އިމްތިޔާޒް ކޮމެޓީއަށް ފޮނުވަން ހުށަހަޅާފައިވެ އެވެ.

އެ މައްސަލައާއި ގުޅޭގޮތުން މެމްބަރުންގެ މެދުގައި ނެގި ވޯޓުގައި ބަހުސްކުރުމަށް ފެންނަ ކަމަށް ވޯޓު ދެއްވީ އެންމެ 20 މެމްބަރުންނެވެ. 58 މެމްބަރުން ވޯޓު ދެއްވީ އެ ބަހުސް ކުރަން ނުފެންނަކަމަށެވެ. އެއާއެކު އެ މައްސަލައަށް ބަހުސްކުރާކަށް ފާހެއް ނުވިއެވެ. 

އެ ވޯޓަށްފަހު ބަންޑާރަ ނައިބު ރިއްފަތުގެ އިތުބާރު ނެތްކަމުގެ މައްސަލައިގެ ބަހުސް ކުރިއަށް ގެންދިއުމަށް ރިޔާސަތުން މަސައްކަތްޕުޅު ފެއްޓެވިއެވެ. 

އެހެން ނަމަވެސް، އިދިކޮޅު މެމްބަރުން ވަނީ، އިމްތިޔާޒާއި ބެހޭ މައްސަލައެއް ހުށައަޅާފައި ވަނިކޮށް، އެ މައްސަލަ ނުބަލާ ބަހުސް ކުރިއަށް ނުގެންދެވޭނެކަމަށް ބުނެ އިންކާރުކޮށްފަ އެވެ. 

އެގޮތުން ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު އަދި ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ނިޒާމީ ނުކުތާއެއް ނަންގަވާ ބަހުސް ކުރިއަށް ގެންދިއުމަށް ދެކޮޅު ހެއްދެވިއެވެ.

މެދު ހެންވޭރު ދާއިރާގެ މެމްބަރު އަލީ އާޒިމް

އެ މެމްބަރުން ވިދާޅުވީ އިމްތިޔާޒާއި ބެހޭ މައްސަލައެއް ހުށައަޅައިފި ނަމަ އެންމެ އިސްކަން ދޭން ޖެހޭނީ އެ މައްސަލައަކަށް ކަމަށެވެ. އަދި އެކަން މަޖިލީހުގެ ޤަވައިދުގައި ބަޔާންކޮށްފައި ވާ ކަމަށެވެ. 

ބަހުސް ކުރިއަށް ގެންދިއުމަށް މެމްބަރުން އެތައް އިއުތިރާޒެއް ކުރަމުން ދިއުމާއި ގުޅިގެން މަޖިލީހުގެ ރައީސް މުޙައްމަދު ނަޝީދު ނިންމެވީ ކޮމެޓީގައި އޮތް އިމްތިޔާޒާއި ބެހޭ މައްސަލަ ނުނިންމާ ރިއްފަތުގެ އިތުބާރު ނެތްކަމުގެ މައްސަލަ ކުރިއަށް ނުގެންދިއުމަށެވެ. 

މަޖިލީހުގެ ރައީސް މުޙައްމަދު ނަޝީދު

ނަޝީދުގެ އެ ނިންމެވުމަށްފަހު، އެމްޑީޕީގެ މެމްބަރުން ވަނީ ނުރުހުން ފާޅުކޮށްފަ އެވެ. އަދި ނަޝީދު މަޖިލީސް ހިންގަވަނީ ގާނޫނާއި ޚިލާފަށް ކަމަށާއި، އެ މަގުން މަޖިލީސް ހިންގަން ފުރުސަތު ނުދެއްވާނެކަމަށް ބުނެ އެމްޑީޕީގެ މެމްބަރުން މަޖިލީހުގައި އިހުތިޖާޖުކޮށް އަޑުގަދަކުރަން ފެއްޓެވިއެވެ. 

ސައިގަނޑިއަށް މަޖިލީސް މެދުކަނޑާލިއިރު ވެސް މެމްބަރުން ގެންދިޔައީ ނަޝީދާއި ދެކޮޅަށް އިހުތިޖާޖުކޮށް މަޖިލީސް ކުރިއަށް ނުގެންދެވޭނެކަމަށް ވިދާޅުވެ އަޑުއުފުއްލަވަމުން ނެވެ. 

ވިލުފުށި ދާއިރާގެ މެމްބަރު އަފީފު 

ސައިގަނޑިއަށްފަހު މަޖިލީހުގެ ރިޔާސަތު ބެލެހެއްޓެވީ މަޖިލީހުގެ ވިލިފުށީ ދާއިރާގެ މެމްބަރު ހަސަން އަފީފެވެ. 

އަފީފު ޖަލްސާ ފެއްޓެވިއިރުވެސް އެމްޑީޕީގެ މެމްބަރުން އަޑުގަދަކޮށް އިހުތިޖާޖުކުރަމުން ދިޔައެވެ.

އެ މެމްބަރުން ވިދާޅުވަމުން ގެންދެވީ ބަންޑާރަނައިބުގެ އިތުބާރު ނެތްކަމުގެ މައްސަލައާއި ގުޅިގެން އިއްޔެ ފެށި ބަހުސް މެދުކަނޑާލާފައި ވަނީ ގަވައިދާއި ޚިލާފަށް ކަމަށެވެ. އަދި އެގޮތަށް މަޖިލީސް ކުރިއަށް ގެންދިއުމަށް ފުރުސަތު ނުދެއްވާނެކަމަށެވެ. 

އެމްޑީޕީގެ މެމްބަރުން އަޑުގަދަކޮށް އިހުތިޖާޖުކުރަމުން ދިއުމާއި ގުޅިގެން އެންމެ ފަހުން ރިޔާސަތުން ނިންމެވީ މަޖިލީހުގެ ނިޒާމު ގެއްިފައިވާކަމަށެވެ. އަދި އިތުރަށް މަޖިލީސް ކުރިއަށް ގެންދެވެން ނެތް ކަމަށެވެ. 

އެއާއެކު މިއަދުގެ ޖަލްސާ ވަނީ ނިންމާލާފަ އެވެ. ދެން މަޖިލީހުގެ ޖަލްސާއެއް އޮންނާނީ 7 ޖޫން 2022 ވާ ބުދަ ދުވަހުގައިކަމަށް އަފީފު ވިދާޅުވި އެވެ.