ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލައެއް މަޖިލީހަށް ވެއްދުމަށް އެމްޑީޕީ ޕާލަމެންޓްރީ ގުރޫޕުން ނެގި ވޯޓުގައި، އެ މައްސަލަ މަޖިލީހަށް ވައްދަން އެމްޑީޕީގެ 5 މެންބަރުން ވޯޓު ނުލާ ކަމަށް އެ ޕާޓީގެ ޕާލަމެންޓްރީ ގްރޫޕުން ބުނެފި އެވެ.
އެމްޑީޕީގެ ޕާލަމެންޓްރީ ގުރޫޕުން ބޭއްވި ނޫސްވެރިންގެ ބައްދަލުވުމުގައި، އެމްޑީޕީގެ ޕީޖީ ލީޑަރު މުހައްމަދު އަސްލަމް ވިދާޅުވީ، ނަޝީދުގެ އިތުބާރު ނެތްކަމުގެ މައްސަލަ ހުށައެޅުމަށް މިއަދު އެމްޑީޕީ ޕީޖީގެ ބައްދަލުވުމެއްގައި މަޝްވަރާކުރެވިފައިވާ ކަމަށެވެ.
އަދި އެ ބައްދަލުވުމުގައި ބައިވެރިވި 42 މެމްބަރުންގެ ތެރެއިން 36 މެމްބަރުން ވަނީ ނަޝީދުގެ އިތުބާރު ނެތްކަމުގެ މައްސަލަ ހުށައެޅުމަށް އެއްބަސްވެފައިކަން އަސްލަމް ފާހަގަކުރެއްވި އެވެ. އަދި އެކަމަށް ވޯޓު ނުދެއްވަނީ ފަސް މެންބަރުން ކަމަށާ، އެހެން ނަމަވެސް އެ މެންބަރުން ނަން ހާމަ ކުރެވެން ނެތް ކަމަށް އެނާ ވިދާޅުވި އެވެ.
އަސްލަމްގެ އެ ވާހަކަ އާއި ގުޅުވައި ނޫސްވެރިއަކު ވަނީ އެ މެންބަރުންނާއި މެދު އެއްވެސް ފިޔަވަޅެއް އަޅުއްވާނެތޯ ސުވާލުކޮށްފައެވެ.
އެ ސުވާލުގެ ޖަވާބުގައި އަސްލަމްވަނީ އެމްޑީޕީގެ ޕީޖީ ގުރޫޕުން ކަންކަން ކުރައްވަމުން ދަނީ މިނިވަންކަމާއި އެކުގައި ކަމަށާ، މެންބަރުންނަށް އަމިއްލަ އިޚްތިޔާރު ދެވިފައިވާ ކަމަށެވެ. އަދި ވޯޓު ނުދެއްވާ މެންބަރުންވެސް މައްސަލަ ހުށަހަޅާ ފޯމުގައި ސޮއި ކުރެއްވުމަށް ދެކޮޅު ނުހައްދަވާ ކަމަށާ، އެކަން ކުރައްވާނެ ކަމަށްވެސް ވިދާޅުވެފައިވާ ކަމަށް އަސްލަމް ވިދާޅުވި އެވެ.
"ފިޔަވަޅު އެޅުމުގެ މަރުހަލާގައެއްވެސް ނޫން، ހަމަ ވަރަށް މިނިވަންކޮށް އަޅުގަނޑުމެންގެ ޕާލަމެންޓްރީ ގުރޫޕުގައި، މެންބަރުންނަށް އަމަލު ކުރުމުގެ ހައްގާއި، ޖާގަ ލިބިގެންދޭ. އެ ބޭފުޅުންވެސް ( ވޯޓު ނުދޭ 5 މެންބަރުން) އެކަން ކުރިއަށް ނުގެންދަވާކަށް ނޫން، އެހެން ނަމަވެސް، އަޅުގަނޑުމެންގެ މަޝްރަހާއި، އަދި އެހެނިހެން މަރުހަލާ ތަކުގެ ވާހަކަ އެބޭފުޅުން ދެއްކެވީ. އެހެންވީމާ އެ މަރުހަލާތައް. މަޝްވަރާ އިތުރަށް ކުރެއްވުމަށާ، އަދި އަޅުގަނޑުމެންގެ ބައެއް ހަމަތަކާއި ގުޅޭ ގޮތުން އެބޭފުޅުން ލަފާ ދެއްވީ. އެއްވެސް ގޮތެއްގައި އެއްވެސް ބޭފުޅެއް އެއީ ( ރައީސް ނަޝީދު ގެ އިތުބާރު ނެތް ކަމުގެ މައްސަލަ ހުށަހެޅުން) ކުރައްވަން ފެނިވަޑައި ނުގަންނަވާ ކަމެއްގެ ގޮތުގައި، ނުވަތަ އެއިން އެއްވެސް ބޭފުޅަކު ސޮއި ކުރައްވަން ޗެލެންޖް ކުރެއްވި ތަނެއް އަޅުގަނޑުމެންނަށް ފާހަގަކުރެވިފައެއް ނުވޭ. އަޅުގަނޑުމެންނަށް ފާހަގަ ކުރެވެނީ ހަމަ ނިމުމުން ހުރިހާ ބޭފުޅުންވެސް ސޮއި ކުރައްވާނެ ކަމަށްވެސް ވިދާޅުވި."
އެމްޑީޕީ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމް
އަސްލަމް ވިދާޅުވީ، ރައީސް ނަޝީދުގެ އިތުބާރު ނެތް ކަމުގެ މައްސަލަ ހުށަހަޅަން 50 އަށްވުރެ ގިނަ މެންބަރުންގެ ސޮއި ލިބޭނެ ކަމުގެ ޔަގީންކަން އޮތް ކަމަށާ، އަދި އެ މައްސަލަ ކާމިޔާބު ކުރެވޭނެ ކަމުގެ ޔަގީންކަންވެސް އޮތް ކަމަށެވެ.
Advertisement
This content is created and paid for by advertisers and does not involve Voice Journalists
