ރައީސް މުޙައްމަދު ނަޝީދު މަޖިލީހުގެ ރައީސް ކަމުން ވަކިކުރަންޖެހޭ އެއްވެސް ސަބަބެއް ނެތް ކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހްމަދު ޝިޔާމް ވިދާޅުވެއްޖެއެވެ.
ޝިޔާމް މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.
އެގޮތުން ޝިޔާމް ވިދާޅުވީ މަޖިލީހަކީ ސަރުކާރުން ބޭނުންހާ ކަމެއް ކުރަން އޮންނަ ތަނެއް ނޫން ކަމަށެވެ. އަދި މަޖިލީހުގެ މައިގަނދު މަސްޢޫލިއްޔަތަކީ ސަރުކާރު ޖަވާބު ދާރީ ކުރުވުން ކަމަށްވެސް އޭނާ ވިދާޅުވި އެވެ.
"މަޖިލީހުގެ ރައީސް ކަމުން ނަޝީދު ވަކިކުރަންޖެހޭ އެއްވެސް ސަބަބެއް ނެތް. ޖިލީހަކީ ސަރުކާރުން ބޭނުންހާ ކަމެއް ކުރަން އޮންނަ ތަނެއް ނޫން، މަޖިލީހުގެ މައިގަނދު މަސްޢޫލިއްޔަތަކީ ސަރުކާރު ޖަވާބު ދާރީ ކުރުވުން" ޝިޔާމްގެ ޓުވީޓުގައި ވިދާޅުވެފައި ވެއެވެ.
ޝިޔާމް މިހެން ވިދާޅުވެފައި ވާއިރު މަޖިލީހުގެ މެޖޯރިޓީ އޮތް އެމްޑީޕީގެ ޕީޖީ ގުރޫޕުން މިހާރު ވަނީ ރައީސް ނަޝީދު މަޖިލީހުގެ ރައީސް ކަމުން ވަކިކުރުމަށް ނިންމާފައެވެ.
ނަޝީދުގެ އިތުބާރު ނެތްކަމުގެ މައްސަލަ ހުށައެޅުމަށް މިއަދު ޕީޖީގެ ބައްދަލުވުމެއްގައި ވަނީ މަޝްވަރާކުރެވިފައެވެ. އެ ބައްދަލުވުމުގައި ބައިވެރިވި 42 މެމްބަރުންގެ ތެރެއިން 36 މެމްބަރުން ވަނީ ނަޝީދުގެ އިތުބާރު ނެތްކަމުގެ މައްސަލަ ހުށައެޅުމަށް އެއްބަސްވެފައިކަން އެމްޑީޕީ ޕީޖީ ގްރޫޕްގެ ލީޑަރ އަސްލަމް ވަނީ މިއަދު ބޭއްވުނު އެމްޑީޕީ ޕީޖީގެ ނޫސްވެރިންގެ ބައްދަލުވުމުގައި ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
