ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދަށް މަޖިލީހުގެ ރައީސްކަން ދެއްވީ ވަރަށް އިހްތިރާމާއި އެކުގައި ކަމަށާ، އެހެންނަމަވެސް، ރައްޔިތުންގެ ހައްގުތަކަށް އަރައިގަންނަ ނަމަ، އެމަނިކުފާނު ރިޔާސަތުން ދުރުކުރަންވެސް ޖެހޭނެ ކަމަށް މަޖިލީހުގެ އިހަވަންދޫ ދާއިރާގެ އެމްޑީޕީ މެންބަރު މުހައްމަދު ޝިފާއު ވިދާޅުވެއްޖެއެވެ. 

މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ހުށަހަޅުއްވާފައިވާ، ރާއްޖޭގައި މުދަލާއި ޚިދުމަތުގެ އަގު ބޮޑުވުން ކޮންޓްރޯލް ކުރުމަށް ސަރުކާރަށް ގޮވާލައި ހުށަހަޅުއްވާފައިވާ ގަރާރަށް ބަހުސް ކުރައްވަމުން، ޝިފާއު ވިދާޅުވީ ދުނިޔޭގެ އެހެން ގައުމު ތަކުގައިވެސް އިންފްލޭޝަން ރޭޓް މައްޗަށްދާ ކަމަށާ، އަދި ރާއްޖޭގައި އިންފުލޭޝަން ރޭޓް މައްޗަށް ދާއިރު، އެކަން ކުޑަ ކުރުމަށް ސަރުކާރުން މަސައްކަތް ތަކެއް ކުރަމުން އަންނަ ކަމަށެވެ. އެގޮތުން ސަރުކާރުގެ މުވައްޒަފުންގެ މުސާރަ ބޮޑު ކުރި ކުރުން ފާހަގަކުރައްވައި އޭނާ ވަނީ އެކަމަށްޓަކައި ސަރުކާރަށް ޝުކުރު އަދާ ކުރައްޖެހޭނެ ކަމަށް ވިދާޅުވެފައެވެ. 

އިހަވަންދޫ ދާއިރާގެ މެންބަރު މުހައްމަދު ޝިފާއު-- ފޮޓޯ/ މަޖިލިސް

މިއާއެކު ޝިފާއު ވިދާޅުވީ ފަހަކަށް އައިސް އެންމެ އަޑުގަދަކޮށް އިވުނު އަޑަކީ ކޮތަޅުގެ އަގު ބޮޑު ވާހަކަ ކަމަށެވެ. އަދި ކޮތަޅުން އިތުރުވާ 2 ރުފިޔާގެ މައްސަލައާއި، އެނޫންވެސް އެ ގާނޫނުގައި ހުރި މައްސަލަތައް ހައްލު ކުރުމަށް ސަރުކާރުގެ ފަރާތުން ރައްޔިތުންގެ މަޖިލީހަށް ބިލެއް ފޮނުވާފައިވާ ކަމަށް އޭނާ ވަނީ ހަނދާންކޮށްދެއްވާފައެވެ. 

ޝިފާއު ވިދާޅުވީ، ރައްޔިތުންނަށް ލުއި ހޯދައިދޭން ބޭނުންވާނަމަ އެކަން ކަން ކުރަންޖެހޭ ކަމަށެވެ. އަދި ސަރުކާރުން ރައްޔިތުންނަށް ލުއި ހޯދައި ދިނުމުގެ މަގުސަދުގައި ހުށަހަޅާ އެފަދަ ބިލުތަކަށް ހުރަސްއަޅާތަނަކަށް މަޖިލީހުގެ ރިޔާސަތު ވެގެން ނުވާނެ ކަމަށްވެސް އޭނާ ވިދާޅުވި އެވެ. 

ޝިފާއު އިތުރަށް ވިދާޅުވީ ލަސްވަނީ ކޮތަޅުގެ މައްސަލަ އާއި ގުޅޭ ބިލު އެކަނި ނޫން ކަމަށާ، އޭގެ އިތުރުން ވެސް ސަރުކާރުން ފޮނުވާފައިވާ، ރައްޔިތުންނާއި ގުޅުންހުރި، އެތައް ބިލެއްގެ މަސައްކަތް ލަސްވެފައިވާ ކަމަށެވެ. 

ޝިފާއު ވިދާޅުވީ، މަޖިލީހުގެ އެމްޑީޕީ މެންބަރުންގެ މަސައްކަތަކީ ރައްޔިތުންނަށްޓަކައި މަސައްކަތް ކޮށް، ރައްޔިތުންގެ ދަތިތަކަށް ލުއި ހޯދައި ދިނުން ކަމަށެވެ. އަދި ރިޔާސަތު ބަދަލުކޮށްގެން ނަމަވެސް، އެކަން ކުރައްވާނެ ކަމަށް އޭނާ ވިދާޅުވި އެވެ.