"ދަ ޑިމޮކްރެޓްސް" އަށް ސޮއި ކުރީ ރާއްޖޭގައި މިވަގުތު ތިބި ހިތްވަރުގަދަ ބަޠަލުން ކަމަށް ރައްޔިތުންގެ މަޖިލީހުގެ ނައިބު ރައީސް އީވާ އަބްދުالله ވިދާޅުވެއްޖެއެެވެ.

އީވާ މިހެން ވިދާޅުވީ ޕީއެންސީ ގެ ފަރާތުން، އާދަމް ޝަރީފް ޢުމަރު މުދަލާއި ޚިދްމަތުގެ އަގު ބޮޑުވާތީ އެކަމާއި ގުޅިގެން ހުށަހެޅި ޤަރާރާށް ރައްޔިތުންގެ މަޖިލީހުގައި ވާހަކަދައްވަމުންނެވެ.

އީވާ ވިދާޅުވީ ސިޔާސީ ޕާޓިއެއް އުފައްދަން ބަޔަކު އުޅެންޏާ ސަރުކާރުން އެކަން ކޮންޓްރޯލް ކުރާ ކަމަށާއި، ބަޔަކު މިނިވަންކަމާއި އެކު ނޫސްވެރިކަމެއް ކުރާ ކަމަށް ވާނަމަ އެކަމެއް ސަރުކާރުން ކޮންޓްރޯލް ކުރާކަމަށާއި ވިޔަފާރި ވެރިޔަކު އަމިއްލައަށް ރީއްޗަށް މަސައްކަތް ކޮށްގެން ވިޔަފާރިއެއް ކުރަންޏާ އެކަމެއްވެސް ސަރުކާރުން ކޮންޓްރޯލް ކުރާ ކަމަށެވެ.

"އެހެންވީމަ ތަކެތީގެ އަގު ކޮންޓްރޯލް ނުކުރާށޭ ކިޔައިގެން މިތާކު ވާހަކަ ދެއްކުމުގެ ޖާގައެެއް އެމްޑީޕީ އަކަށް ނެތް" އީވާ ވިދާޅުވިއެވެ.

އީވާ ވިދާޅުވީ ދަ ޑިމޮކްރެޓްސް ގެ ލިސްޓް އީސީ އަށް ހުށައެޅުމާއި އެކު އެ ލިސްޓު ރައީސް އޮފީހަށް ލިބިއްޖެ ކަމަށެވެ. އަދި އެއީ ސަރުކާރަށް އީސީ އިން ހޯދި އެއްޗެއް ނޫން ކަމަށް ބެލެވޭނެ އެެއްވެސް ގޮތެއް ނެތް ކަމަށް ވެސް އީވާ ވިދާޅުވިއެވެ.

އީވާ ވިދާޅުވީ ލިސްޓު ބަލައިގެން އޭގަ ސޮއިކޮށްފަ ތިބި މީހުންނަށް ސްޓްޑެންޓް ލޯނު ނުލިބޭނެ ކަމަށާއި، އޭނާގެ އެސްއެމްއީ ލޯނު ނުލިބޭނެ ކަމަށާއި، ސަރުކާރު ކުންފުނީގެ ވަޒީފާގައި ޕްރޮމޯޝަން ނުލިބޭނެ ކަމަށާއި، ދަރިފުޅު ވަޒީފާއިން ވަކިކުރާނެ ކަމަށް ބުނެ ބިރު ދައްކަމުން ދާ ކަމަށެވެ.

"ފާހަގަ ކޮށްލަން ޖެހޭ ކަމަކީ ދަ ޑިމޮކްރެޓްސް އުފައްދަން މިއުޅޭ 3600 އެއްހާ މީހުންނަކީ،  އެމްޑީޕީ ގަ ތިބި އެތައް ގިނަ ބަޔަކު ވެރިކަމުގެ ތެރޭގަ ތިބެފައި މިހާރު ތިވެރިކަން ކުރާ ގޮތް، ރައީސް ޞާލިޙްގެ ވައްކަމުގެ ޙާލި، ތިމަންނާމެނަށް ކަމަކު ނުދެއޭ ކިޔާފައި ނުކުތް، ދިވެހި ރާއްޖޭގައި މިވަގުތު ތިބި ހިތްވަރު ގަދަ ބަޠަލުން އެއީ" އީވާ ވިދާޅުވިއެވެ.

އީވާ ވިދާޅުވީ އެމީހުންނަށް ބިރު ދައްކައިގެން އެމީހުންެގެ ސޮއިތައް އަނބުރާ ނުގެންދެވޭނެ ކަމަށެވެ.  އަދި އީސީ އަށް ހުށައެޅި ފޯމު ތަކަކީވެސް ސައްޙަ ފޯމް ތަކެެއް  ކަމަށާއި އެއީ ކެރިގެން އަނެއްކާވެސް ދިވެހި ރާއްޖެ ހަމަ މަގަށް އަޅުވަން ކެރިގެން ނުކުމެ ސޮއި ކޮށްގެން ތިބި ބައެއް ކަމަށަށެވެ.

މިއަދު ދަ ދިމޮކްރެޓްސްގެ ފަރާތުން ދަ ޑިމޮކްރެޓްސް އަށް ސޮއިކުރާ މެންބަރުންނަށް ބިރުދައްކާ ކަމަަށް ބުނެ މައްސައެއް މަޖިލިހަށް ވަނީ ހުށައަޅައިފައެވެ.

އެ މައްސަލަ އަށް ބަހުސް ކުރުމަށް މަޖިލީހުގެ ރިޔާސަތުން  ވޯޓަށް އެއްސެވުމުން ވޯޓުގައި ބައިވެރިވި 49 މެންބަރުންގެ ތެރެއިން 33 މެންބަރުން ވޯޓު ދެއްވީ މައްސަލަ ބަލައިގަންނަން ނުފެންނަ ކަމަށެވެ. އަދި ފެންނަ ކަމަށް ވޯޓު ދެއްވީ 16 މެންބަރުންނެވެ. އެހެން ކަމުން އެމައްސަލަ ވަނީ މަޖިލީހުން ބޭރުކޮށްލާފައެވެ.