ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވެރިކަމުގެ ފުރަތަމަ ދައުރު ނިމެންދާއިރު، އެމަނިކުފާނު ރައްޔިތުންނަށް ވީ ވައުދުތައް ނުފުއްދާ ހުރީ ފުނިޖައްސާފައި ކަމަށާއި، ބަދަލުގައި ސަރުކާރުން ކުރިހާވެސް ކަމަކީ ވައްކަން ކުރުންކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަހީދު (ވައްޑެ) ވިދާޅުވެއްޖެ އެވެ. 

ރައްޔިތުންގެ މަޖިލީހުގެ މިއަދުގެ ޖަލްސާއަށް ހުށައަޅާފައިވާ ރާއްޖޭގއި މުދަލާއި ޚިދުމަތުގެ އަގުބޮޑުވުން ކޮންޓްރޯލުކުރުމަށް ސަރުކާރަށް ގޮވާލާ ގަރާރަށް ބަހުސްކުރައްވަމުން ވަހީދު ވިދާޅުވީ ރައްޔިތުންގެ ޖީބަށް ލުއިވާނެ އެއްވެސް ކަމެއް ކުރުމުގެ ވިސްނުން ސަރުކާރުން ނުގެންގުޅޭ ކަމަށެވެ. 

އައްޑޫ ސިޓީއަށް ރައީސުލްޖުމްހޫރިއްޔާ ކުރެއްވި ދަތުރުފުޅުގައި އިފްތިތާހުކޮށްދެއްވި މަޝްރޫއުތަކުން މިސާލު ނަންގަވަމުން ވަހީދު ވިދާޅުވީ ރައީސް ޞާލިހު ވެރިކަމަށް ވަޑައިގަތީ އައްޑޫ އަކީ އިޤްތިޞާދީ ހަބަކަށް ހަދާނެކަމުގެ ވައުދާއި އެކުގައި ކަމަށެވެ. އެހެން ނަމަވެސް ދައުރު ނިމެންދާއިރު ވެސް އައްޑޫ ރައްޔިތުންނަށް ވީ ވައުދުތައް ފުއްދާދެވިފައި ނުވާކަމަށާއި، މަޝްރޫއުތަކުގެ ނަމުގައި ނަންބޯޑެއް ހަރުކުރުމަކީ ވައުދު ފުއްދާދިނުން ނޫން ކަމަށެވެ. 

Advertisement

ވަހީދުގެ ވާހަކައިގައި ވިދާޅުވީ ރިޔާސީ އިންތިޚާބު ބޯމަތިވުމުން، މަޝްރޫއުތައް އިއުލާނުކުރަމުންދަނީ ވެސް ވައްކަން ކުރުމަށް ކަމަށެވެ. އަދި އޭނާ ވަނީ މަޝްރޫއުތައް ހިންގުމުގެ ނަމުގައި ސަރުކާރުން ވައްކަން ކުރަމުންދާ ގޮތުގެ ބައެއް މިސާލުތައްވެސް ހިއްސާކުރައްވާފަ އެވެ. 

ވަހީދު އިތުރަށް ވިދާޅުވީ އެމްޑީޕީގެ ރިޔާސީ ޕްރައިމަރީ ހޯނުނު ގޮތަކަށް ހޯއްދަވައިގެން ހުންނެވީ އެތައް ދުވަހެއް ފާއިތުވެގެން ދިޔަނަމަވެސް ރައީސް ޞާލިހު އެމަނިކުފާނަށް ރިޔާސީ އިންތިޚާބު ކާމިޔާބުކުރެއްވުމަށް އެންމެ ވޯޓެއް ވެސް އިތުރުވާނެ މަސައްކަތްޕުޅެއް ކުރައްވާފައި ނުވާކަމަށެވެ. 

ބަދަލުގައި އެމަނިކުފާނު މަސައްކަތްޕުޅު ކުރައްވަނީ މަޝްރޫއުތަކުން ކަޓު ނަންގަވައި، ދައުލަތުގެ ބައިތުލްމާލުން ގެނެން އޮތް އެއްޗެއް ހޯއްދުމަށްކަމަށެވެ. 

އެގޮތުން އިންތިޚާބުގެ އަހަރުގައި ޖީއެސްޓީ ބޮޑުކުރީވެސް ވައްކަންތައް ދެމެހެއްޓުމަށްކަމަށް ވަހީދު ވަނީ ވިދާޅުވެފަ އެވެ.