ދިވެހިރާއްޖޭގައި ވަޒީފާތައް ނެތް މިންވަރަށް ލޯނުތައް ދިނުމަކީ ދެކޮޅު ޖެހޭ ކަމެއް ތޯ އައްސަވާ ރައްޔިތުންގެ މަޖިލީހުގެ ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުއްލަތީފު ސުވާލުކުރައްވައިފި އެވެ. 

ޔާސިރު މިފަދައިން ސުވާލުކުރައްވާފައިވަނީ ތަކެތީގެ އަގުތައް އިންތިހާއަށް އުފުލިގެންދާއިރު އެކަން ޙައްލު ކުރުމަށް ސަރުކާރުން އެކަށީގެންވާ ހަރުދަނާ ސިޔާސަތުތަކެއް ނުގެންގުޅުއްވާކަން ފާހަގަކުރައްވާ ރައްޔިތުންގެ މަޖިލީހުގެ މިއަދުގެ ޖަލްސާގައި ފާޑުވިދާޅުވަމުން ނެވެ. 

ޔާސިރު ވިދާޅުވީ މުސާރަ ބޮޑުކުރުމާއި، ލޯނު ދޫކުރުމަކީ އަދި ފައިސާ ޗާޕުކުރުމަކީ ތަކެތީގެ އަގުތައް އުފުލުމާއި ގުޅިގެން ރައްޔިތުންނަށް އުފުލަން ޖެހޭ ތަކުލީފުތަކަށް ލިބޭނެ ހައްލެއް ނޫން ކަމަށެވެ. އަދި އެފަދައިން އެކަން ކޮށްގެން ދުރު ރާސްތާއަށް ބަލާއިރު ތަކެތީގެ އަގުތައް ކޮންޓްރޯލު ކުރެވޭނެކަމަށް ދެކިވަޑައިނުގަންނަވާ ކަމަށެވެ.  

ޔާސިރު ވިދާޅުވީ މި ކަންކަމަކީ ރައްޔިތުން ވަރަށް ފުންކޮށް ވިސްނަން ޖެހޭ ކަންކަން ކަމަށެވެ. 

ފާއިތު އަހަރުގައި ރައްޔިތުންގެ ދިރިއުމަށް އައި ބަދަލުތަކާއި، ފުދުންތެރިކަމާއި އާމްދަނީއަށް ކުރި އަސަރުގެ ބޮޑުމިނަކީ ރައްޔިތުން ރަނގަަޅަށް ވިސްނާ ވަޒަންކުރަން ޖެހޭ ކަންކަމުގެ ގޮތުގައި އޭނާގެ ވާހަކައިގައި ވަނީ ފާހަގަކުރައްވާފަ އެވެ. 

އެއާއެކު އޭނާ ވިދާޅުވީ ސަރުކާރުން ރައްޔިތުންގެ ފުދުންތެރިކަން އިތުރުކުރުމަށް މަސައްކަތް ކުރުމުގެ ބަދަލުގައި، ސިޔާސަތުތައް އެކުަވާލަމުންދަނީ ހަގީގީ ޙައްލާއި ހަމަޔަށް ނުދެވޭނެ މަގުން ކަމަށެވެ. އެއީ ހިތާމަކުރައްވާ ކަމެއް ކަމަށް އޭނާ ވިދާޅުވި އެވެ.