އެމްޑީޕީގެ ރައީސް މުޙައްމަދު ނަޝީދަކީ އިދިކޮޅު ޕީޕީއެމް ފިކުރުގެ މީހެއްކަން ޔަގީންވާކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފް (މަވޯޓާ) ވިދާޅުވެއްޖެ އެވެ.
ޝަރީފު މިފަދައިން ވިދާޅުވެފައިވަނީ ނަޝީދަށް ފާޑުވިދާޅުވެ ކުރެއްވި ޓްވީޓެއްގަ އެވެ.
ރައްޔިތުންގެ މަޖިލީހުގެ ރިޔާސަތުގައި އިންނަވާ ނަޝީދު މަޖިލީސް ކުރިއަށް ގެންދަވާ ގޮތަށް އެމްޑީޕީގެ މެމްބަރުން ގިނަ ފާޑުކިޔުންތައް އަމާޒުކުރައްވަމުން ދާ މި ދަނޑިވަޅުގައި ޝަރީފު ވިދާޅުވީ ނަޝީދަކީ ޕީޕީއެމް ފިކުރު މީހެއްކަން މީހާރު ޔަގީން ކުރެވޭ ކަމަށެވެ.
މަރަދޫ ދާއިރާގެ މެމްބަރު އިބްރާހީމް ޝަރީފް
"ފެންނަ މަންޒަރުތަކަށް ބަލާއިރު މުޙައްމަދު ނަޝީދަކީ ސީދާ ޕީޕީއެމް ފިކުރުގެ ބޭފުޅެއްކަން ޔަގީން ވެއްޖެ"
މަރަދޫ ދާއިރާގެ މެމްބަރު އިބްރާހީމް ޝަރީފް
ޝަރީފު މިފަދައިން ވިދާޅުވެފައިާއިރު، ރައީސް ނަޝީދު މަޖިލީހުގެ ރައީސްކަމުން ވަކިކުރުމުގެ މަސައްކަތް އެމްޑީޕީގެ ޕާލަމެންޓްރީ ގުރޫޕުން ވަނީ ފަށާފައެވެ. އަދި ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ހުށައެޅުމަށް މިހާތަނަށް 50 މެމްބަރުންގެ ސޮއި ވަނީ ހަމަކޮށްފަ އެވެ.
ނަޝީދު އެމްޑީޕީގެ ރައީސްގެ މަޤާމުގައި ހުންނެވި ނަމަވެސް، އެ ޕާޓީގެ ތެރޭގައި ނަޝީދު ވަނީ ވަރަށް ބޮޑަށް ބާކީކޮށް އެކަހެރިކޮށްފަ އެވެ.
ނަޝީދަށް ތާއީދުކުރައްވާ ގިނަ މެމްބަރުން ވެސް މިހާރު ވަނީ އެމްޑީޕީއިން އިސްތިއުފާދެއްވާ އާ ސިޔާސީ ޕާޓީއެއް ހެދުމުގެ މަސައްކަތް ފަށާފަ އެވެ.
Advertisement
This content is created and paid for by advertisers and does not involve Voice Journalists
