މޯޮލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޕާލިމެންޓްރީ ގްރޫޕުގެ 4 މެމްބަރެއް ރައީސް މުހައްމަދު ނަޝީދުގެ މައްސަލައިގައި ވޯޓު ނުދެއްވާކަން ހާމަވެއްޖެއެވެ.

އެމްޑީޕީގެ ޕާލިމެންޓަރީ ގްރޫޕުން އިސްނަގައިގެން ރައްޔިތުންގެ މަޖިލީހަށް ހުށައެޅި ރައީސް ނަޝީދުގެ އިތުބާރު ނެތް ކަމުގެ މައްސަލައިގައި އެމްޑީޕީގެ ޕީޖީ އިން ސޮއި ނުކުރައްވަނީ ބިލެއްދޫ ދާއިރާގެ މެމްބަރު އަހުމަދު ހަލީމް (ދޮންބިލެއް)، ކުޅުދުއްފުށި ދެކުނު ދާއިރާގެ މެމްބަރު ޖަމްޝީދު މުހައްމަދު، ހިތަދޫ މެދު ދާއިރާގެ މެމްބަރު އަހުމަދު ރަޝީދު (ޗެކްމާކް) އަދި ފޮނަދޫ ދާއިރާގެ މެމްބަރު މޫސާ ސިރާޖެވެ.

އެމްޑީޕީގެ ޕީޖީގައި ދެން ތިއްބެވި ބޭފުޅުންނާއި އެކު މުޅިއެކު 54 މެމްބަރެއްގެ ސޮއި މިހާރު ވަނީ މިމައްސަލައިގައި ލިބިފައެވެ.
ރައީސް ނަޝީދު ނުހިމަނައި މަޖިލީހުގައި މިހާރު ތިއްބެވީ އެމްޑީޕީގެ 56 މެމްބަރެކެވެ. އޭގެ ތެރެއިން  ރައީސް ނަޝީދު މަގާމުން ވަކިކުރަން ހުށަހަޅާ ލިޔުމުގައި ސޮއިކުރެއްވީ 52 މެމްބަރެކެވެ.

Advertisement

ރައީސް ނަޝީދުގެ އިތުބާރު ނެތްކަމުގެ ލިޔުމުގައި 54 މެމްބަރުންގެ ސޮއި ހަމަކުރީ އެމްޑީޕީގެ ބޭރުން ހަތަރު މެމްބަރެއްގެ ސޮޔާ އެކު އެވެ. އެއީ މި އަހަރުގެ ރިޔާސީ އިންތިހާބަށް އެމްޑީޕީއާ އެކު ކޯލިޝަން ހަދަން ނިންމާފައިވާ އެމްޑީއޭގެ ލީޑަރު އަދި މީދޫ ދާއިރާގެ މެމްބަރު އަހުމަދު ސިޔާމް މުހައްމަދު، ކާށިދޫ ދާއިރާގެ މެމްބަރު އަބްދުالله ޖާބިރު، ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުالله އަދި ތުލުސްދޫ ދާއިރާގެ މެމްބަރު އިބްރާހިމް ނަސީމެވެ.

މަޖިލީހުގެ ގަވާއިދުގައި ވާ ގޮތުން މަޖިލީހުގެ ރައީސްގެ އިތުބާރު ނެތްކަމުގެ މައްސަލައެއް މަޖިލިހަށް ހުށަހެޅޭނީ 29 މެމްބަރުންގެ ސޮޔާ އެކު އެވެ. މަޖިލިހުގައި މިހާރު 87 މެމްބަރުން ތިއްބަވާއިރު އެ ވޯޓު ފާސްކުރަން ބޭނުންވަނީ 44 ވޯޓެވެ. މަޖިލީހުގައި ޕާޓީތައް ބެހިފައިވާ ގޮތުން ނަމަ އެއް ޕާޓީއެއްގައި އެންމެ ގިނަ މެމްބަރުން ތިއްބެވީ އެމްޑީޕީގަ އެވެ. 

މިމައްސަލަ މިހާރު ވަނީ މަޖިލީހަށް ހުށައަޅައިފައެވެ.