އިތުބާރެއް ނެތި މަޖިލީހުގެ ރިޔާސަތު ބެލެހެއްޓުމަކީ އެންމެ އެކަށީގެންވާ ގޮތެއް ނޫން ކަމަށް ހިތަދޫ އުތުރު ދާއިރާގެ މެމްބަރު އަދި އެމްޑީޕީ ޕީޖީގެ ލިޑަރު މުޙައްމަދު އަސްލަމް ވިދާޅުވެއްޖެއެވެ.

އަސްލަމް މިހެން ވިދާޅުވީ ރޭ ޕީއެސްއެމް ގެ ރާއްޖެ މިއަދު ޕްރޮގްރާމްގައި ވާހަކަ ދައްކަަވަމުންނެވެ.

އަސްލަމް ވިދާޅުވީ ބޭފުޅެެއްގެ އިތުބާރު ނެތް ކަމަށް އެހާބޮޑު އަޤްލަބިއްޔަތަކުން ހުށައެޅުނީމަ އަސްލުގައި އިތުބާރެއް ނުއޮންނާނެ ކަމަށެވެ. އެހެންވީމަ އިތުބާރެއް ނެތި މަޖިލީހުގެ ރިޔާސަތު ބެލެހެއްޓުމަކީ އެންމެ އެކަށީގެންވާ ގޮތް ނޫން ކަމަށް ވެސް އަސްލަމް ވިދާޅުވިއެވެ.

"މަޖިލީހުގެ ޢާންމު އުސޫލުން މިވީ ހިސާބަށް ޢަމަލުކުރެވެމުންދާ ގޮތައް ބަލާއިރު، އިތުބާރުނެތް ކަމުގެ މައްސަލައެއް މަޖިލީހުގެ ރިޔާސަތުގައި ހުންނަވާ ބޭފުޅަކާއި މެދުގައި ކުރިމަތި ވެއްޖެ ކަމުގައި ވަނީ ނަމަ އެބޭފުޅަކު ރިޔާސަތަކު ނުއެއް އިންނަވާނެ" އަސްލަމް ވިދާޅުވެފައިވެއެވެ.

އަސްލަމް ވިދާޅުވީ އެބޭފުޅާ ގަބޫލުފުޅު ކުރައްވާ ގޮތުން މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ ހުށައެޅިފައި ވާއިރު، އަންނަ ހޯމަ ދުވަހު އެ މަނިކުފާނު މަޖިލީހުގެ ރިޔާސަތުގައި އިންނަވައިގެން ނުވާނެ ކަމަށެވެ.

އަދި އިތުބާރު ނެތް ކަމަށް ހުށައެޅުނީމަ މަޖިލީހުގެ ރިޔާސަތުގަ މަޖިލީހުގެ ނައިބު ރައީސްވެސް އިންނަވައިގެން ނުވާނެ ކަމަށް އަސްލަމް ވިދާލުވިއެވެ.

"އެއީ މިހިސާބަށްވެސް މަޖިލީހުގަ ޢަމަލު ކުރެވެމުން ދާގޮތަކީ" އަސްލަމް ވިދާޅުވިއެވެ.

"އެހެންވީމާ އަޅުގަނޑު އުންމީދު ކުރަނީ ހޯމަދުވަހު ދެން މަޖިލީހުގެ ގަވާއިދު ބަޔާންކުރާ ގޮތުގެ މަތިން މަޖިލީހުގެ ރިޔާަސަތު ކަނޑައެޅިގެން ދާއިރު ވީހާވެސް އަވަހަކަށް ކޮމިޓީތަކަށް މިގެނެވެން ޖެހޭ ބަދަލުތައް ގެނެވިގެން ދާނެ ކަމަށް" އަސްލަމް ވިދާޅުވިއެވެ.

އަސްލަމް ވިދާޅުވީ ރައްޔިތުންގެ މަޖިލީހުގެ ރިޔާސަތުގައި ރައީސް މުޙައްމަދު ނަޝީދު އަދި އީވާ އަބްދުالله މިހާރު ތިއްބަވައިގެން ނުވާނެ ކަމަށެވެ.

ރައީސް ނަޝީދުގެ އިތުބާރު ނެތް ކަމުގެ މައްސަލަ 54 ސޮޔާއި އެކު މަޖިލީހުގެ އިދާރާއަށް ހުށައެޅީ އިއްޔެއެވެ. މަޖިލީހުގެ ނައިބު ރައީސް އީވާގެ އިތުބާރު ނެތް ކަމުގެ މައްސަލަ ހުށައަޅައި ފައިވަނީ މެއި މަހުގެ 23 ވަަނަ ދުވަހު 50 ސޮޔާއި އެކުއެވެ.