ރައްޔިތުން މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމަށް ރައްޔިތުންގެ މަޖިލީހަށް ހުށަހަޅާފައި އޮތް ގަރާރާމެދު ގޮތެއް ނިންމުމުގެ ކުރިން އެ މަޖިލީހުގެ ރިޔާސަތު ބެލެހެއްޓުމަށް އުޒުރުވެރިވެވަޑައިގަންނަވާ ކަމަށް އެމަނިކުފާނު ރައްޔިތުންގެ މަޖިލީހަށް އަންގަވައިފިއެވެ.

ރައީސް ނަޝީދު އެފަދައިން އަންގަވާފައިވަނީ އަމީން އާންމަށް ފޮނުއްްވާފައިވާ ސިޓީއެއްގައެވެ.

އެގޮތުން އެ ސިޓީގައި ވިދާޅުވީ އެމަނިކުފާނު ނިސްބަތްވާ އެމްޑީޕީގެ މެންބަރުން ވަނީ އެމަނިކުފާނުގެ މައްޗަށް ވަނީ އތުބާރު ނެތް ކަމުގެ ހުށަހަޅާފައި ކަމަށާއި އެމައްސަލައަށް ވަކިގޮތެއް ނިމުމާއި ހަމައަށް، މަޖިލީހުގެ ޖަލްސާތަކުގެ ރިޔާސަތު ބެލެހެއްޓުމަށް އުޒުރުވެރިވާ ކަމަށެވެ.

Advertisement

"[އިތުބާރު ނެތް ކަމުގެ] އެ މައްސަލައަށް ވަކި ގޮތެއް ނިމުމާ ހަމައަށް މަޖިލީހުގެ ޖަލްސާތަކުގެ ރިޔާސަތު ބެލެހެއްޓުމަށް އަޅުގަނޑު އުޒުރުވެރިވަމެވެ. މަޖިލީހުގެ ގަަވައިދުގެ 44 ވަނަ މާއްދާގެ (ހ) ގެ ދަށުން އަޅުގަނޑަށް މި އިހްތިޔާރު ލިބޭ ކަމަށް ދެކެމެވެ،" ނަޝީދުގެ ސިޓީގައިވެ އެވެ.

ނަޝީދުގެ ސިޓީގައި އިތުރަށް ވިދާޅުވެފައި ވަނީ އެމަނިކުފާނުގެ އިތުބާރު ނެތްކަމުގެ މައްސަލައިގައި ވަކިގޮތެއް ނިންމުމާއި ހަމައަށް މަޖިލީހުގެ ރިޔާސަތު ބެލެހެއްޓުމުން އެއްކިބައިވީނަމަވެސް، މަޖިލީހުގެ ގަވައިދުގައި ބަޔާންކުރާ މިންވަރުގައި، މަޖިލީހުގެ އެންމެހާ ކަންކަން ހިންގުމުގައި ދެމިހުންނާނަން ކަމަށެވެ.

"އަޅުގަނޑުގެ އިތުބާރު ނެތް ކަމުގެ މައްސަލަ ހިނގަމުންދާއިރު ކަމަނާގެ (އަމީން އާންމުގެ) މަސްއޫލިއްޔަތުތަކަށާއި ވާޖިބުތަކަށް ކުޑަވެސް ހުރަސްއެޅޭ ބާވަތުގެ އެއްވެސް ކަމެއް ނުކުރާނެ ކަމުގެ ޔަގީންކަން މި ފުރުސަތުގައި އަރުވަމެވެ،" ނަޝީދު ވިދާޅުވި އެވެ.

ރައީސް ނަޝީދުގެ އިތުބާރު ނެތް ކަމުގެ މައްސަލަ އެމްޑީޕީން މަޖިލީހަށް ހުށަހެޅީ ނައިބު ރައީސް އީވާ އަބްދުالله ގެ މައްސަލަވެސް ހުށަހަޅައި، އެ މައްސަލަ ނިމުމުގެ ވެސް ކުރިންނެވެ. އަދި އެފަދައިން ކަން ކުރީ އެމްޑީޕީއަށް އެނގިގެން މަޖިލިސްގައި "މަރުތަޅު އަޅުވަން" ކަމަށް އީވާ ތުހުމަތުކުރައްވަ އެވެ.

ނަމަވެސް އެމްޑީޕީ ބުނަމުން އަންނަނީ، މަޖިލީހުގައި މަރު ތަޅު ނޭޅޭނެ ކަމަށާ، މަޖިލިސް ހުއްޓުވާލައިގެން އުޅެނީ އީވާގެ އިތުބާރު ނެތް ކަމުގެ ވޯޓު ނެގިޔަ ނުދޭން ކަމަށެވެ.