ރައްޔިތުންގެ މަޖިލީހިގެ ގަދަރާއި އިއްޒަތަށް އަރައި ނުގަތުމަށް މަޖިލީހުގެ ރައީސް މުހައްމަދު ނަޝީދު އިލްތިމާސް ކުރައްވައިފިއެވެ.

މަޖިލީހުގެ ރައީސްގެ ހައިސިއްޔަތުން ނަޝީދު އާއްމުކުރެއްވި ނޫސްބަޔާނުގައި ބުނީ، ގާނޫނުއަސާސީގެ ދަށުން ގާނޫނު ހެދުމުގެ ބާރުތތައް މަޖިލީހަށް ލިބިގެންވާ ކަމަށާއި ގާނޫނު ހެދުމުގެ ބާރުތަކުގެ ތެރޭގައި ގިނަ ވާޖިބުތަކާއި މަސްއޫލިއްޔަތުތައް މަޖިލީހަށް މަތިކޮށްފައިވާ ކަމަށެވެ.

ރައްޔިތުންގެ މަޖިލީހުގެ ގަވާއިދުގައި ޖަލްސާތަކާ ބެހޭ އެންމެހާ ކަންކަމާއި އިދާރީ ކަންކަން ހިންގުމުގެ އުސޫލު ބަޔާންކޮށްފައި ވާނެކަން ފާހަގަ ކުރައްވައި ނަޝީދު ވިދާޅުވީ ގާނޫނު އަސާސީގައި ބަޔާންކޮށްފައިވާ ގޮތަށް ކަންކަން ކުރުމަށްޓަކައި، ގާނޫނާއި މަޖިލީހުގެ ގަވާއިދަށް ރިއާޔަތް ކުރަން ޖެހޭނެ ކަމަށެވެ.

މަޖިލީހުގެ ގަވާއިދަށް ރިއާޔަތް ކުރާއިރު، އަމީންއާމާއި ކައުންސިލް ޖެނެރަލްއަށް ދީފައިވާ މުސްތަގިއްލުކަން ފާހަގަ ވާނެ ކަމަށް ނަޝީދުގެ ބަޔާނުގައިވެއެވެ.

"ރައްޔިތުންގެ މަޖިލީހުގެ 'ޤަދަރާއި ޝަރަފް' އަމީން ޢާއްމު ހިފަހައްޓަންޖެހޭ، އަދި މަޖިލީހުގެ ގަވާއިދާ ގުޅޭގޮތުން އަދާކުރަން ޖެހޭ ވާޖިބުތައް އަދާކުރަންޖެހޭ ހާއްސަ ވަގުތުތަކެއް ރައްޔިތުންގެ މަޖިލީހުގެ ގަވާއިދުގައި ކަނޑައަޅާފައި އެބަވެއެވެ. ހާއްސަ ގޮތެއްގައި ރައްޔިތުންގެ މަޖިލީހުގެ ރައީސެއް ނުހުންނަ ހާލަތުގައެވެ." ބަޔާނުގައި ވެއެވެ.

މި ވަގުތަކީ މަޖިލީހުގެ ރައީސްއާއި ނައިބުރައީސް މަގާމުން ވަކިކުރަން ހުށަހަޅާފައިވާ ވަގުތެއްކަން ފާހަގަ ކުރައްވައި ނަޝީދު ވިދާޅުވީ އެފަދަ ހާލަތެއްގައި ކަން ކުރަންވީގޮތް މަޖިލީހުގެ ގަވާއިދުގައި ސާފުކޮށް ބަޔާން ކޮށްފައި ވާނެ ކަމަށެވެ.

އަދި އެގޮތްތައް މަޖިލިސް މެމްބަރުންނަށް ބުނެދިނުމުގައި 'ގާނޫނީ ލަފަޔާއި ގާނޫނީ އެހީތެރިކަން' ފޯރުކޮށްދެވެން އޮތީ ހަމައެކަނި މަޖިލީހުގެ ކައުންސިލް ޖެނެރަލްއަށް ކަމަށް ނަޝީދު ވިދާޅުވިއެވެ.

އެހެންކަމުން މަޖިލީހުގެ ގާނޫނު މާނަކުރުމުގެ ގާނޫނީ އެހީތެރިކަން ހޯދެން އޮތީ މަޖިލިސް ކައުންސިލް ޖެނެރަލްގެ ފަރާތުންކަން ނަޝީދުގެ ބަޔާނުގައި ފާހަގަ ކުރިއެވެ.

މީގެ އިތުރުން ބަޔާނުގައި ބުނީ، ގާނޫނީ ދައުލަތެއް ހިންގުމަކީ ކޮންމެ ރައްޔިތެއްގެވެސް އަދި މަޖިލީހުގެ އެންމެ މެމްބަރުންގެވެސް ޒިންމާއެއް ކަމަށެވެ. އަދި މަޖިލީހުގެ އަމީންއާއްމާއި އެހެނިހެން އޮފިޝަލުންގެ ގަދަރާއި އިއްޒަތަށް އަރައިގަތުމުގެ ޖާގަ އެއްވެސް މިންވަރަކަށް ދެވިގެން ނުވާނެ ކަމަށެވެ.