ފުއްގިރި ޚިޔާނާތުގެ ފައިސާއާއި ގުޅޭ މައްސަލަ 2016 ވަނަ އަހަރު އޭސީސީގެ ސަމާލުކަމަށް ގެނެސް، ބަޔާންދެއްވާފައި ވާނެ ކަމަށް މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) ވިދާޅުވެއްޖެއެވެ.
ރ. ފުއްގިރި ކުއްޔަށް ދޫކުރުމުގެ "ޑީލް" ހަމަޖައްސައިދިން އިންޑިއާގެ ވިޔަފާރިވެރިންގެ ރާއްޖޭގެ މަންދޫބެއްގެ ގޮތުގައި އުޅުއްވީ ރައްޔިތުންގެ މަޖިލިހުގެ މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) ކަމަށް، ކުރީގެ ނައިބު ރައީސް އަހުމަދު އަދީބު އިއްޔެ ކޯޓުގައި ވަނީ ވިދާޅުވެފައެވެ.
އެގޮތުން، އެންމެ ފުރަތަމަ ދުބާއީ ކުންފުނި ހިންގަމުން ދިޔަ ބާރުގަދަ އިންޑިއާގެ ވިޔަފާރިވެރިންތަކާ ފުރަތަމަ ބައްދަލުކުރެއްވި އިރު އެ ބައްދަލުވުމުގައި މެންބަރު އިބްރާހީމް ރަޝީދު ބައިވެރިވެވަޑައިގެންނެވި ކަމަށް އަދީބު ވިދާޅުވި އެވެ. އަދި ބޮންޑެ އެ ބައްދަލުވުމުގައި ބައިވެރިވެވަޑައިގަތީ އެ ކުންފުނީގެ ރާއްޖޭގެ ރެޕްރެޒެންޓެޓިވް ނުވަތަ މަންދޫބެއްގެ ގޮތުގައި ކަމަށްވެސް އަދީބު ވިދާޅުވި އެވެ.
އެކަމާއި ގުޅިގެން ބޮންޑޭ ކުރެއްްވި ޓުވީޓެއްގައި ވިދާޅުވީ، އޭނާގެ އެކައުންޓަކުން ފުއްގިރިއަށް ދެއްކި ފައިސާ (ކޮރޮސްޗެކް ) އެސްއޯއެފްގެ އެކައުންޓަށް ސަރުކާރުން ޖަމާކޮށް ދައުލަތަށް ލިބެންޖެހޭ ފައިސާއަށް ސަރުކާރުން ހިޔާނަތްތެރިވި ކޮރަޕްޝަންގެ މައްސަލަ 2016 ވަނަ އަހަރު އޭސީސީގެ ސަމާލުކަމަށް ގެންނެވީ އޭނާ ކަމަށެވެ. އަދި އެ މައްސަލާގައި ބަޔާންވެސް ދެއްވި ކަމަށް ވިދާޅުވި އެވެ.
"މިވަގުތު ސަރީއަތުގަައި ކުރިއަށްދާ ފުއްގިރީގެ މައްސަލައިގައި އެ ބަޔާނަކީ ސަރުކާރުތެރޭން ބަޔަކު ކޮރަޕްޝަން ހިންގިކަމުގެ ކިތާބީ ހެއްކެކެވެ. އަދި އެފައިސާއަކީ ދައުލަތުގެ ފައިސާކަން ޔަގީންކޮށްދިނުމަށްޓަކައި އޮޑިޓަރ ޖެނެރަލްއަށް އޭސީސީ މެދުވެރިކޮށް ސިޓީއެއްވެސް ވާނީ ހަވާލުކޮށްފައެވެ. އެއީވެސް ކިތާބީ ހެއްކެކެވެެ." ފުއްގިރި މައްސަލާގައި އޭނާގެ ބައިވެރިވުން ނެތް ކަން ހާމަކުރައްވައި ބޮންޑެ ވިދާޅުވި އެވެ.
މީގެ އިތުރުން ބޮންޑެ ވިދާޅުވީ، އެމްއެމްޕީއާރުސީގެ ފައިސާއަށް ސަރުކާރުން ހިޔާނާތްތެރިވަމުންދާކަން ރައްޔިތުންނަށް ތިލަކޮށްދިނުމަށްޓަކައި ހަމަ އެދުވަސްވަރު މީޑިއާތަކުގައި ވެސް އެކިފަހަރު މަތީން ތަކުރާރުކޮށް އެ ވާހަކަތަައް ދައްކަވާފައި ވާނެ ކަމަށް ބޮންޑެ ވިދާޅުވި އެވެ.
އެހެން ކަމުން އޭނާ އާއި ގުޅުވައިގެން އަދީބު ހެއްދެވީ އިތުރުފުޅެއް ކަމަށާ އެކަން، އަދީބު ދޮގު ހެކި ދެއްވިކަން ކޯޓަށް އަންގަވާނެ ކަމަށް ބޮންޑެ ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
