ހިޔާ ސަރަހައްދުގައި 2 ފުޓްސަލް ދަނޑު އެޅުމުގެ މަސައްކަތް އާބަންކޯއިން ފަށައިފިއެވެ.
އާބަންކޯއިން ބުނީ، ހިޔާ ސަރަހައްދުގައި މިހާރު އެ ވަގުތީ ގޮތުން ހަދާފައިވާ ފުޓްސަލް ދަނޑު ހުރި ސަރަހައްދުގައި ޒަމާނީ އަދި ފެންވަރު ރަނގަޅު 2 ދަނޑު އެޅުމަށް މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓުން މިހާރު ޒެބްކޯ ކުންފުންޏާއި ހަވާލުކޮށްފައިވާ ކަމަށެވެ.
އަދި ހުޅުމާލޭ ފޭސް 2 ހިޔާ ސަރަހައްދު (ޕްލޮޓް ނަމްބަރު N6-38a) ގައި މި 2 ދަނޑު އެޅުމަށް ޒެބޮކޯ އާއި ހަވާލުކުރީ 4،265،024.44 (ހަތަރު މިލިއަން ދެލައްކަ ފަސްދޮޅަސް ފަސްހާހް ސައުވީސް ރުފިޔާ ސާޅީސް ހަތަރު ލާރި) އަށް، މަސައްކަތް ފަށާތާ 55 ދުވަހުގެ ތެރޭގައި ނިންމަން ޖެހޭގޮތަށް ކަމަށްވެސް އެ ކުންފުނިން މައުލޫމާތުދެއެވެ.
މި ދަނޑުތައް އެޅުމުން އެސަރަހައްދުގައި ދިރިއުޅޭ ކުދި ބޮޑު އެންމެހާ ފަރާތްތަކަށް ވެސް ކުޅިވަރު ކުޅުމަށް ގިނަ ލުއިތަކެއް ލިބިގެން ދާނެ ކަމަށް އާބަންކޯއިން ދެކެއެވެ.
އާބަންކޯއިން ބުނީ މިނޫން ވެސް ގިނަ އިތުރު ކުޅިވަރުތައް ކުޅޭނެ ތަންތަން ތަރައްޤީ ކުރުމަށް މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓާއި އެ ކޯޕަރޭޝަނާއި ގުޅިގެން މަސައްކަތް ކުރަމުންދާ ކަމަށެވެ.
Advertisement
This content is created and paid for by advertisers and does not involve Voice Journalists
