ތިމާމެންގެ މަސްލަހަތާއި ޖެހުމުން ކުރިން ކިޔާފައިވާ ޅެން ފަރިއްސައްވެ ނިމިއްޖެ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.

ޝަރީފް މިހެން ވިދާޅުވީ އޭނާ ކުރެެއްވެވި ޓްވީޓެއްގައެވެ.

"އީވާ މެން ޕާޓީ ބަދަލުކުރެއްވިޔަސް ވިކުނު ކަމަކަށްނުވޭ، އަދި އެމްޑީޕީ ޓިކެޓެއްގަ ހޮވިފަހުއްޓަސް އެމްޕީކަން ދޫކޮށްލާކަށްވެސް ނުޖެހޭ، އެކަމަކު މީގަ އެބޭފުޅުން ކިޔުއްވީ އެހެން ލަވައެއް، ތިމާމެންގެ އަމިއްލަ މަސްލަހަތާއި ޖެހުނީމަ ކީހާ ޅެން ފަރިއްސައްވެ ނިމިއްޖެ" ޝަރީފްގެ ޓްވީޓުގައި ވެއެވެ.

Advertisement

ޝަރީފް އިތުރަށް ވިދާޅުވީ އީވާ އަދި އިމްތިޔާޒް ފަހުމީ އެހެން މީހަކު ޕާޓީ ބަދަލު ކޮށްފިނަމަ އެމީހަކާއި ދިމާއަށް ވަގަށް ގޮވާކަމަށާއި، އިސްތިއުފާއަށްވެސް ގޮވާ ކަމަށެވެ. އަދި މިހާރު އެ އުސޫލު ކޮބައިތޯ ޝަރީފު ސުވާލު ކުރައްވައިފައިވެއެވެ.

ޝަރީފް މިގޮތަށް ޓްވީޓް ކުރައްވާފައި މިވަނީ ރައްޔިތުންގެ މަޖިލީހުގެ ނައިބު ރައީސްގެ މަގާމުގައި ހުންނެވި އީވާ ޢަބްދުالله ޕާޓީ ބަދަލު ކުރައްވައި، އަދި އެކަމަނާގެ އިތުބާރު ނެތް ކަމުގެ މައްސަލަ އެއް 50 ސޮޔާއި އެކު މަޖިލީހުގެ އިދާރާއަށް ހުށައެޅިފައިވާ ދަނޑިވަޅެއްގައެވެ.

އިއްޔެގެ ރައްޔިތުންގެ މަޖިލީހުގެ ޖަލްސާ ރިޔާސަތު ބައްލަވާނެ ބޭފުޅަކު ނުވެ ވަނީ ހުއްޓައިލައިފައެވެ. އަދި މިއަދުގެ ޖަލްސާ ވެސް ރަނގަޅަށް ނުފެށިގެން އުޅެނިކޮށް "ޗޯރޭ" ގޮވައި އަޑުގަދަކޮށް ނިޒާމު ގެއްލި ހުއްޓައިލައިފައެވެ.