ރެހެންދި ސުކޫލަށް "އޮޅިގެން" އެ ސުކޫލުގެ ދަރިވަރެއް ލައްވާ ނަޞާރާދީނުގައި ދުޢާކުރުމުގައި ޢަމަލު ކުރާގޮތް ކިޔައި ދެވިއްޖެ އެވެ. 

މީސްމީޑިއާގައި މިހާރު ދައުރުވަމުންދާ ވީޑިއޯ، އެ ދަރިވަރު ދިޔައީ ފޮތެއް ބަލައިގެން އެ ފޮތުގައި ހުރި އެއްޗެހި ކިޔަމުންނެވެ. ރެހެންދި ސުކޫލުން މައުލޫމާތު ދީފައިވާ ގޮތުގައި، އެއީ އެ ސުކޫލާއި ރީޑިން ރޫމާއި ގުޅިގެން ހިންގި "ރީޑިންގ ޕުރޮގުރާމް"ގެ ތެރެއިން ވަހަކަ ފޮތްބަލައިގެން ކިޔުމުގެ ޕުރޮގުރާމެކެވެ. 

މިޕްރޮގްރާމްގެ ތެރެއިން އެ ދަރިވަރު ކިޔަމުން ދިޔަ ފޮތުގައި ވަނީ ދުއާ ކުރުމުގައި ނަޞާރާ ދީނުގެ ސޮލީބަށް އަމަލު ކުރުމަށް ކިޔައި ދީފައެވެ. 

އެގޮތުން، ދަރިވަރު ކިޔާފައި ވަނީ، "ކްރޮސް ޔުއަރ ހާޓް އެންޑް ޕްރޭ ޓު ހެވަން (ހިތުގައި ސަލީބު (ރަސްގެ) ފަވާލާފައި އުޑަށް/ސުވަރުގެއަށް އަޅުކަން ކުރޭ)" އެފަދައިންނެވެ. 

އެކަމާއި ގުޅިގެން ގިނަ ބައެއްގެ ނުރުހުން އެ ސުކޫލަށް ވަނީ އަމާޒުވެގެން ގޮސްފައެވެ. 

އެގޮތުން، އެއީ މީހުންގެ ޅަ ދަރިން ހަލާކު ކުރުން ކަމަށާ، އެކަމެއް ކުރުވި މީހަކަށް ފިޔަވަޅު އަޅަންޖެހޭ ކަމަށް އެއްބަޔަކު ވަނީ ބުނެފައެވެ. 

އަދި އެފަދަ ކަންކަން ކުރުވަނީ އެޑިއުކޭޝަން މިނިސްޓްރީން އަންގައިގެން ކަމަށް އެއްބަޔަކު ތުހުމަތު ކޮށްފައިވާއިރު, އަނެއް ބަޔަކު ވަނީ އެކަމާއި ގުޅިގެން ތުހުމަތުގެ އިނގިލި ރެހެންދި ސުކޫލުގެ މެނޭޖްމަންޓަށް އަމާޒުކޮށްފައެވެ. އެގޮތުން، އެސުކޫލުގެ މެނޭޖްމަންޓަކީ ލާ ދީނީ މެނޭޖްމަންޓެއް ކަމަށާ، އެ މެނޭޖްމަންޓް ބަދަލު ކުރާންޖެހޭ ކަމަށް ބުނެފައެވެ. 

އެފަދަ ގިނަ ފާޑުކިޔުންތަކެއް ރެހެންދި ސުކޫލަށް އަމާޒުވެފައިވަނިކޮށް އެ ސުކޫލުން ކުރި ޓުވީޓެއްގައި ވަނީ, އެއީ ރީޑިންގ ޕްރޮގްރާމްގެ ތެރެއިން ދަރިވަރެއް ފޮތެއް ކިޔަމުން ދިޔަ ވީޑިއޯ ކަމަށެވެ. އަދި އެ ރީޑިންގ ޕުރޮގުރަމުގެ ތެރެއިން ދުޢާކުރުމުގައި ނަޞާރާދީނުގައި އަމަލުކުރާގޮތަށް އަމަލު ކުރުމަށް ދަރިވަރުންނަށް ކިޔައިދީފައި ނުވާނެ ކަމަށް ބުނެފައެވެ.

ރެހެންދި ސުކޫލުން އެފަދައިން ބުނެފައިވާއިރު, އެފަދަ ފޮތްތައް ދަރިވަރުން ލައްވާ ކިޔުއްވާއިރު އޭގައި ހުރި އެއްޗެއް ނުބެލުމާއި، އެ ކިޔަމުން ދިޔައިރުވެސް ނުހުއްޓުވީތީ މީހުން އަންނަނީ ނުރުހުން ފާޅުކުރަމުންނެވެ. އަދި ރީޑިންގ ޕްރޮގްރާމްގެ ތެރެއިން ނަމަވެސް އެފަދައިން ކިޔައި ނުދެވޭ ކަމަށް ނުވާނެ ކަމަށްވެސް އެއްބަޔަކު އަންނަނީ ބުނަމުންނެވެ.