އދ. މަހިބަދޫ ކައުންސިލުން އެ ރަށުގައި އަޟުހާ ޢީދު ކުލަގަދަކޮށް ފާހަގަކުރުމުގެ ގޮތުން ހަވާއެރުވުމަށް ނިންމައިފިއެވެ.
މަހިބަދޫ ކައުންސިލްގެ ކައުންސިލަރ ޝައުފާ އާދަމް "ވޮއިސް" އަށް މައުލޫމާތު ދެއްވަމުން ވިދާޅުވީ، ހަވާ އެރުވުމަށް ހަމަޖެހިފައިވަނީ ޢީދު ވިލޭރޭ 10:00 ގައި ކަމަށެވެ. އަދި ހަވާ އަރުވަނީ ހެޔޮ އެދޭ ފަރާތެއްގެ އެހީތެރިކަމާއިއެކުކަން ފާހަގަ ކުރައްވައި ޝައުފާ ވަނީ އެފަރާތަށް ޝުކުރު އަދާކުރައްވާފަ އެވެ.
އަދި ހަވާ އެރުވުމުގެ އިތުރުންވެސް، އެ ރަށު ކައުންސިލުން އިންތިޒާމްކޮށްގެން ޢީދު އުފަލުގައި ދެ ޖިންސުގެ މީހުންނަށް ޚާއްސަކޮށްގެން އިތުރު ހަރަކާތްތަކެއް ބޭއްވުމަށް ހަމަޖެހިފައިވާ ކަމަށް ޝައުފާ ފާހަގަކުރެއްވިއެވެ.
އެގޮތުން އަންހެނުންނަށް ޚާއްސަ ކޮށްގެން ވާދެމުގެ މުބާރާތަކާއި، "ވަންޑޭ ފައިގަތަޅާ" މުބާރާތެއް ބޭއްވުމަށް ހަމަޖެހިފައިވާއިރު، ފިރިހެނުންނަށް ޚާއްސަކޮށްގެން ވެޓަރަންސް ފުޓްބޯޅަ މުބާރާތެއް ބޭއްްވުމަށް ހަމަޖެހިފައިވާ ކަމަށް ޝައުފާ ވިދާޅުވި އެވެ.
ޢީދު އުފަލުގައި ބޭއްވޭ މި ތިން މުބާރާތުންވެސް ވަނަވަނައަށް އަންނަ ޓީމުތަކަށް ފައިސާގެ އިނާމް ދިނުމަށް ހަމަޖެހިފައިވާ ކަމަށް އެ ރަށު ކައުންސިލުން މައުލޫމާތު ދެއެވެ.
އަޟުހާ ޢީދު ކުލަގަދަކޮށް މަހިބަދޫގައި ފާހަގަކުރުމުގެ ތައްޔާރީތައް އެރަށުން ވާން ފަށާފައިވާއިރު, ދާދިފަހުންވަނީ، ކައުންސިލްއިން އިންތިޒާމް ކޮށްގެން ރަށް ސާފުކުރުމުގެ ބޮޑު ޕްރޮގްރާމެއްވެސް ހިންގާފައެވެ. އަދި ޢީދަށް ރަށަށް ޒިޔާރަތްކުރާ ފަރާތްތަކަށް އުފާވެރި މާހައުލެއް ގާއިމް ކޮށްދިނުމަށް އެނޫންވެސް ގިނަ މަސައްކަތްތަކެއް އެ ރަށު ކައުންސިލުން އަންނަނީ ކުރަމުންނެވެ.
Advertisement
This content is created and paid for by advertisers and does not involve Voice Journalists
