އެމްޑީޕީގެ ރައީސްގެ މަޤާމުގައި ވެސް ހުންނަވަނިކޮށް، މަޖިލީހުގެ ރައީސްކަމުގެ މަޤާމުން ވަކިކުރުމަށް އަމިއްލަފުޅު ޕާޓީގެ ގިނަ އަދަދެއްގެ މެމްބަރުން ހުށައަޅާފައިވާއިރު، ޕާޓީން ވަކިވެ ވަޑައިނުގަންނަވާ ހުންނަވާ ސަބަބު ރައީސް މުޙައްމަދު ނަޝީދު ހާމަކުރައްވައިފި އެވެ.
ނަޝީދު ވަނީ މިއަދު ރައްޔިތުންގެ މަޖިލީހުގައި ނޫސްވެރިންގެ ބައްދަލުވުމެއް ބާއްވާ މަޖިލީސް ނުހުއްޓި މަޖިލީހުގެ ރައީސްއާއި ނައިބު ރައީސްގެ އިތުބާރު ނެތްކަމުގެ މައްސަލަތައް ކުރިއަށް ގެންދެވޭނެ ގޮތާއި ގުޅިގެން އެމަނިކުފާނު ދެކެވަޑައިގަންނަވާ ގޮތް ހާމަކުރައްވާފަ އެވެ.
މި ބައްދަލުމުގައި ނޫސްވެރިން ވަނީ ރައީސް ނަޝީދުގެ ލަފާފުޅާއި އެއްގޮތަށް އެމްޑީޕީން ވަކިވި އެމަނިކުފާނަށް ވަފާތެރި މެމްބަރުންތަކެއް "ދަ ޑިމޮކްރެޓްސް" ގެ ގޮތުގައި ޕާޓީއެއް އުފައްދަން މަސައްކަތް ކުރަމުންދާއިރު، އަދި އެމްޑީޕީއަކީ މިއަދި ޚުދު ނަޝީދު ޤަބޫލުކުރައްވާ މިސްރާބަށް ދަތުރުކުރާ ޕާޓީއަކަށް ނުވާއިރު، އެމްޑީޕީގައި މަޑުކުރައްވަނީ ކޮން ސަބަބާއި ހުރެތޯ ސުވާލުކޮށްފަ އެވެ.
އެ ސުވާލަށް ޖަވާބުދެއްވަމުން ނަޝީދު ވިދާޅުވީ އެމްޑީޕީގެ މިސްރާބު މިހާރު ހުރީ ގޯސްކޮށްކަން އެމަނިކުފާނު ޤަބޫލުކުރައްވާ ކަމަށެވެ. އަދި މި ހާލަތުގައި އެމްޑީޕީގައި މަޑުކުރެއްވުމަކީ ވެސް ނުހަނު ދަތިކަމެއް ކަމަށެވެ.
އެހެން ނަމަވެސް އެމްޑީޕީން ބަޔަކު ނިކުމެ ދަ ޑިމޮކްރެޓްސް ކިޔާ ޕާޓީއެއް އުފައްދާ، ރިޔާސީ އިންތިޚާބުގައި އެ ޕާޓީން ވާދަކުރާނަމަ ކުރިއަށް އޮތް ރިޔާސީ އިންތިޚާބު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ކާމިޔާބު ކުރެވުމަކީ ނާދިރު ކަމެއް ކަމަށެވެ.
ރިޔާސީ އިންތިޚާބަށް ފަހު ރައީސް ޞާލިހު މިހާރު މުޅި ޕާޓީ ކޮންޓްރޯލު ކުރައްވަމުންދާ ދިއުމަށް ނިމުމެއް އަންނާނެ ކަމަށާއި، އެހިސާބުން އެމްޑީޕީގެ ކޮންޓްރޯލު އަލުން އަނބުރާ އެމަނިކުފާނަށް ލިބިވަޑައިގަންނަވާނެ ކަމަށް ނަޝީދު ވިދާޅުވި އެވެ. އަދި މިހާރު ދަތިތަކާއެކު ވެސް އެމްޑީޕީގައި މަޑުކުރައްވަނީ އެމްޑީޕީ އަލުން އަނބުރާ ހޯއްދެވުމަށްކަމަށް ނަޝީދު ވިދާޅުވި އެވެ.
"އަޅުގަނޑު އެމްޑީޕީ ދޫކޮށްނުލާ މިހާރު މިހުންނަނީ މި ޕާޓީ ޑިމޮކްރެޓްސްގެ ތެރެއަށް، މުޅި އެމްޑީޕީ ގެނައުމުގެ ނިޔަތުގަ. އަޅުގަނޑު ދެންމެވެސް ދަންނަވައިފިން އެ މަސައްކަތް ހިނގާނެއޭ ސެޕްޓެމްބަރު ނުވައެއްގެ ފަހުން. އެހެންވީމަ އިރާދަކުރެއްވިއްޔާ އަޅުގަނޑު އެކަން އެގޮތަށް ހިންގާނަން"
އެމްޑީޕީގެ ރައީސް މުޙައްމަދު ނަޝީދު
ނަޝީދު އިތުރަށް ވިދާޅުވީ އޭނާގެ އިތުބާރު ނެތްކަމުގެ މައްސަލައިގައި ސޮއިކުރި ގިނަ މެމްބަރުން ސޮއިކޮށްފައިވަނީ ރައީސް ޞާލިހު އެކިވަރުގެ ފިއްތުންތައް ކުރިމަތި ކުރުވައިގެންކަމަށް ގިނަ މެމްބަރުން އޭނާގެ އަރިހުގައި ވިދާޅުވެފައިވާ ކަމަށެވެ.
ރައީސް ޞާލިހު މިއަދު ހުންނެވީ މަޖިލީހުގެ ކޮންޓްރޯލުވެސް ނަންގަވައިގެން ކަމަށާއި، މިއަދު ޑިމޮކްރެޓިކް ހަމަތަކާއި އެއްގޮތަށް ކަންކަން ކުރުމަށް ބޮޑެތި ހުރަސްތަކެއް ކުރިމަތިވެފައިވާކަން ހިތާމައާއެކު ފާހަގަ ކުރައްވާކަމަށް ނަޝީދު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
