ރައްޔިތުންގެ މަޖިލީހުގެ ރައީސްކަމުން މިވަގުތު ދުރުވުމަކީ ޤައުމަށް އެންމެ ރަނގަޅުގޮތް ނޫންކަމަށް މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ރައީސްކަމުގެ މަޤާމުން ނަޝީދު ދުރުކުރުމަށް މަޖިލީހުގެ މެޖޯރިޓީ ޕާޓީ އެމްޑީޕީގެ ގިނަ އަދަދެއްގެ މެމްބަރުންނާއެކު ވަނީ ނަޝީދުގެ އިތުބާރު ނެތްކަމުގެ މައްސަލަ ހުށައަޅާފަ އެވެ.
ނަޝީދުގެ އިތުބާރު ނެތްކަމުގެ މައްސަލަ ހުށައަޅާފައިވަނީ މަޖިލީހުގެ ނައިބުރައީސް އީވާ އަބްދުاللهގެ އިތުބާރު ނެތްކަމުގެ މައްސަލަ ވެސް ހުށައަޅާފައި ވަނިކޮށެވެ.
ނަޝީދުގެ އިތުބާރު ނެތްކަމުގެ މައްސަލަ ހުށައެޅުމާއި ގުޅިގެން އޭނާ ވަނީ މަޖިލީހުގެ ރިޔާސަތު ބެލެހެއްޓުމަށް އުޒުރުވެރިވާކަމަށް ވިދާޅުވެފަ އެވެ. އަދި މިހާރު ރިޔާސަތު ބަލަހައްޓަވަމުން ގެންދަވަނީ މަޖިލީހުގެ ވިލިފުށީ ދާއިރާގެ މެމްބަރު ހަސަން އަފީފެވެ.
މަޖިލީހުގެ ރައީސާއި ނައިބުރައީސްގެ އިތުބާރު ނެތްކަމުގެ މައްސަލަ އެއްފަހަރާ މަޖިލީހަށް ހުށައެޅުމާއި ގުޅިގެން، މަޖިލީހުގެ މަސައްކަތްތައް ވަނީ ހުއްޓިފައެވެ. އަދި މަޖިލީހުގައި ވަނީ "މަރު ތަޅު" އެޅުވިގެން ގޮސްފައެވެ.
މިކަމާއި ގުޅޭގޮތުން ނަޝީދު މިއަދު ރައްޔިތުންގެ މަޖިލީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ރައީސް ނަޝީދުގެ އިތުބާރު ނެތްކަމަށް ގިނަ މެމްބަރުންތަކެއް ސޮއިކޮށް މައްސަލައެއް ހުށައަޅާފައިވާއިރު އިސްތިއުފާ ނުދެއްވަނީ ކީއްވެތޯ އައްސަވާފަ އެވެ.
އެ ސުވާލަށް ޖަވާބުދެއްވަމުން ނަޝީދު ވިދާޅުވީ އެމަނިކުފާނުގެ އިތުބާރު ނެތްކަން ޔަގީންވާނީ އެ މައްސަލައާއި ގުޅިގެން ވޯޓެއް ނެގުމުން ކަމަށެވެ.
ރައްޔިތުންގެ މަޖިލީހަކީ މިއަދު ރައީސުލްޖުމްހޫރިއްޔާ ކޮންޓްރޯލު ކުރައްވާ ތަނަކަށް ވެފައި، އެމަނިކުފާނުގެ އިތުބާރު ނެތްކަމުގެ މައްސަލައިގައި ސޮއި ކުރި ގިނަ މެމްބަރުން ސޮއިކުރީ ޕްރެޝަރު އޮވެގެންކަމަށް އެ މެމްބަރުން ބުނަމުންދާއިރު، ހަޤީގަތުގައި އޭނާއާއި މެދު މެމްބަރުންގެ އިތުބާރު ނެތްކަމަށް އަދި ދެންނެވެން ވެސް ނެތްކަމަށް ނަޝީދު ވިދާޅުވި އެވެ.
އެއާއެކު އޭނާ ވިދާޅުވީ މިވަގުތު އޭނާ މަޖިލީހުގެ ރައީސްކަމުން ދުރުވުމަކީ ރާއްޖެއަށް އެންމެ ރަނގަޅުގޮތް ނޫންކަމަށް ޤަބޫލުފުޅުކުރައްވާ ކަމަށެވެ.
"ސޮއިކޮށްފަ ތިބި ކިތަންމެ ބޭފުޅުންނެއް އެބަ އެކަމަށް އިންކާރުކުރައްވާ. ދެވަނަ ކަމަކަށް އަޅުގަނޑަށް ފެންނަ ފެނުމުގައި ދިވެހިރާއްޖޭގެ ކަންކަމުން ނުވަތަ ރައްޔިތުންގެ މަޖިލީހުގެ ރައީސްކަމުން މިވަގުތު އަޅުގަނޑު ދުރުވުމަކީ އަޅުގަނޑު ދެކޭގޮތުގައި ދިވެހިރާއްޖެއަށް ރަނގަޅު ގޮތެއް ނޫން"
މަޖިލީހުގެ ރައީސް ނަޝީދު
ނަޝީދު ވަނީ މަޖިލީހުގެ ރައީސް އާއި ނައިބު ރައީސްގެ އިތުބާރު ނެތްކަމުގެ މައްސަލަ ކުރިއަށް ގެންދިއުމަށް މި ވަގުތު ކޮންމެވެސް އެއްބޭފުޅެއްގެ މައްސަލަ އަނބުރާ ގެންދިއުމަށް އެދިވަޑައިގެންފަ އެވެ. އަދި އެ އުސޫލުގެ ތެރެއިން ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދިއުމަށް ފުރިހަމައަށް އެއްބާރުލުން ދެއްވާނެކަމަށް ވެސް ނަޝީދު ވިދާޅުވި އެވެ.
އެހެން ނަމަވެސް އެމަނިކުފާނުގެ އިތުބާރު ނެތްކަމުގެ މައްސަލަ ހުށައަޅާފަ އޮތީތީ އޭ ކިޔާ އަމިއްލަފުޅަށް އިސްތިއުފާ ނުދެއްވާނެކަމަށް ނަޝީދު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
