ރައްޔިތުންގެ މަޖިލީހުގެ ޖަލްސާތަކުގެ ރިޔާސަތު ބަލަހައްޓާނެ މެންބަރަކު ނެތި، މިއަދުގެ ޖަލްސާ އިންތިޒާމު ވެސް ނުކުރެވި، ކެންސަލްވެއްޖެއެވެ. 

ރައްޔިތުންގެ މަޖިލީހުގެ ރައީސް ނެތް ހާލަތުގައި ރިޔާސަތު ބަލަހައްޓާނެ ބޭފުޅަކު ކަނޑައަޅަންޖެހެނީ މަޖިލީހުގެ ރައީސް އެވެ. ނަމަވެސް މަޖިލީހުގެ ރައީސް މުހައްމަދު ނަޝީދު މިއަދު މަޖިލީހުގެ ރިޔާސަތު ބަލަހައްޓާނެ މެންބަރަކު ކަނޑައަޅާފައި ނުވާތީ މިއަދުގެ މަޖިލީހުގެ ޖަލްސާ ވަނީ ކެންސަލްވެފައެވެ.

ރައީސް ނަޝީދުގެ އިތުބާރު ނެތް ކަމުގެ މައްސަލައެއް މަޖިލީހަށް ހުށަހަޅާފައި ވާތީ އެމަނިކުފާނު ވަނީ މަޖިލީހުގެ ރިޔާސަތު ބަލަހައްޓަން އުޒުވެރިވާ ކަމަށް ވިދާޅުވެ މަޖިލީހުގެ ރިޔާސަތު ބަލަހައްޓަން ދެކޮޅު ހައްދަވާފައެވެ.

Advertisement

އަދި މަޖިލީހުގެ ނައިބު ރައީސް އީވާ އަބްދުالله ގެ އިތުބާރުނެތް ކަމުގެ މައްސަލަ ހުށަހެޅުމާއި ގުޅިގެން މަޖިލީހުގެ ރިޔާސަތު ބެލެހެއްޓުމަށް އީވާވެސް ވަނީ އުޒުރުވެރިވެވަޑައިގަންނަވާފައެވެ. 

އެހެންކަމުން، މިއަދާއި ޖެހެންދެންވެސް ރިޔާސަތު ބަލަހައްޓަވަމުން ދިޔައީ ވިލިފުށީ ދާއިރާގެ މެންބަރު ހަސަން އަފީފެވެ. އަފީފާއި ރިޔާސަތު ބެލެހެއްޓުން ހަވާލު ކުރެއްވީ ރައީސް ނަޝީދެވެ. ނަމަވެސް ގަވައިދުގައި ބުނެފައިވާ ގޮތުގައި އެގޮތައް ރިޔާސަތާއި ހަވާލުވާ މެންބަރަކަށް ރިޔާސަތުގައި އިންނެވޭނީ ޖެހިޖެހިގެން ތިން ޖަލްސާ ގައެވެ. އަފީފް ޖަލްސާތަކުގެ ރިޔާސަތު ބަލަހައްޓާތާ އިއްޔެއަށް ވަނީ ޖެހިޖެހިގެން ތިން ދުވަސް ވެފައެވެ. އެހެންކަމުން އަފީފް ޖަލްސާތަކުގެ ރިޔާސަތު ބަލަހައްޓަމުން އަންނަތާ ތިން ދުވަސް ވުމުން ދެން މަޖިލީހުގެ ޖަލްސާތައް ނުބޭއްވޭނެ ކަމަށް އިއްޔެ ނަޝީދު ވަނީ ވިދާޅުވެފައެވެ. 

މަޖިލީހުގެ ރިޔާސަތު ބަލަހައްޓަން ދެން ނަޝީދަށް ހަވާލު ކުރެވޭނެ މެންބަރުންގެ ގޮތުގައި ތިއްބެވީ އެމްޑީޕީގެ ޕީޖީ ލީޑަރު މުހައްމަދު އަސްލަމް އާއި މީދޫ ދާއިރާގެ މެންބަރު އަހްމަދު ސިޔާމްގެ އިތުރުން މަރަދޫ ދާއިރާގެ މެންބަރު އިބްރާހިމް ޝަރީފް އަދި ގާސިމް އިބްރާހިމް އެވެ. 

ނަމަވެސް ރައީސް ނަޝީދު އެއިން ބޭފުޅަކާއި ރިޔާސަތު ހަވާލު ކުރައްވާފައެއް ނުވެއެވެ.