އިންޑިޔާގެ ކެރެލާއަށް ނިސްބަތްވާ ޝިހާބުއްދީން ސައްޔިދު އަލާވީ ފައިމަގުގައި 8000 ކިލޯމީޓަރު ހުރަސްކޮށް ޙައްޖުގެ އަޅުކަން އަދާކުރުމަށް މައްކާއަށް ހިނގައްޖެއެވެ.

ޝިހާބުއްދީން އޭނަގެ ހަޔާތުގައި ދެކެމުންދިޔަ އެންމެ ބޮޑު ހުވަފެން ކަމަށްވާ ފައިމަގުގައި ޙައްޖުއަޅުކަން އަދާކުރަން ޝިހާބުއްދީން 8640 ކިލޯމީޓަރު ފައިމަގުގައި ހުރަސްކޮށްފައިވެއެވެ.

ޝިހާބުއްދީން މައްކާއަށް ދިޔުމަށް ފެށި މި ދަތުރުގައި ފަސް ޤައުމެއް ހުރަސްކޮށްފައިވެއެވެ. އެގޮތުން އިންޑިޔާ، ޕާކިސްތާން، އިރާން، އިރާޤް އަދި ކުވައިތް ހުރަސްކޮށްފައިވެއެވެ. ޝިހާބުއްދީންގެ މި ދަތުރަށް އެއް އަހަރާއި 17 ދުވަސް ހޭދަ ކޮށްފައިވެއެވެ.

ޝިހާބުއްދީން ގެ މިދަތުރު ފަށައިފައިވަނީ 2022 ވަނަ އަހަރުގެ ޖޫން މަހުގެ 2 ވަނަ ދުވަހުއެވެ. އޭނާއަށް މައްކާއަށް ދެވިފައިވަނީ މިއަހަރުގެ ޖޫން މަހުގެ 7 ވަނަ ދުވަހުއެވެ.  

"ކުވައިތާއި ސަޢުދީ ގުޅޭ ބޯޑަރު އަހަންނަށް ހުރަސް ކުރެވުނީ ރަމަޟާން މަހު، އަހަންނަށް އެވަގުތު ސަޖިދައަށް ތިރިވެވުނު، ސަޢުދީ ގެ ބިމުގެ ވެލީގައި އަހަންނަށް އަތްލެވުނު" ޝިހާބުއްދީން ޢަރަބް ނިއުސް އަށް ބުނެފައިވެއެވެ.

"ނަބިއްޔާގެ މިސްކިތަށް އަހަންނަށް ދެވުމުން އަހަންނަށް އިހްސާސް ކުރެވުނީ  އަހަރެންގެ ދަތުރު ފުރިހަމަވިކަމަށް، އަހަރެން ރައުދާ އަށް ދިޔައިން، އަހަންނަށް ޔަޤީން ކުރެވުނު މައްކާއަށް ގޮސް އަހަންނަށް ޙައްޖުވެވޭނެކަން" ޝިހާބުއްދީން ބުނެފައިވެއެވެ.

31 އަހަރުގެ ތިން ކުދިންގެ ބައްޕަ ޝިހާބުއްދީން ބުނެފައިވަނީ އޭނާ އޭނާގެ މިދަތުރަށް އެއްއަހަރު ކުރިން ތައްޔާރުވާން ފެށިކަމަށެވެ.