ފަލަސްޠީނުގެ ޖެނީން ސިޓީ އަށް އިޒްރާއިލް ސިފައިން ދިން ހަމަލާތައް ދިވެހި ސަރުކާރުން ކުށްވެރިކޮށްފިއެވެ.

ފަލަސްޠީނުގެ ހުޅަނގު އައްސޭރީގައި އޮންނަ ޖެނީން ސިޓީއަށް އިޒްރާއިލްގެ ސިފައިން ދިން ހަމަލާތައް ކުށްވެރިކޮށް ރާއްޖެގެ ޚާރިޖީ ވުޒާރާއިން ނެރެފައިވާ ބަޔާނުގައި ބުނެފައިވަނީ، އިޒްރާއިލްގެ މި އަނިޔާވެރި ޢަމަލުތައް ހަރުކަށި ޢިބާރާތުން ކުށްވެރިކުރާ ކަމަށެވެ.

އެބަޔާނުގައި އިތުރަށް ބުނެފައިވަނީ އެ ހަމަލާތަކުގައި ކުޑަކުއްޖަކު ހިމެނޭ ގޮތަށް ފަސް މީހުން މަރުވެފައިވާ ކަމަށާއި އެތައް ބަޔަކަށް ކުދި އަނިޔާވެފައިވާތީ، އެކަން ސަރުކާރުން ހަރުކަށި އިބާރާތުން ކުށްވެރި ކުރާ ކަމަށެވެ.

Advertisement

ޚާރިޖިއްޔާގެ ބަޔާނުގައި ބުނެފައިވަނީ ފަލަސްޠީނުގެ ރައްޔިތުން ދިރިއުޅޭ ސަރަހައްދުތަކުގައި ތިބި އަންހެނުންނާއި ކުޑަކުދިން ހިމެނޭ ގޮތަށް ހަތިޔާރު ނެތް އާންމުންނަށް އިސްރާއީލް ސިފައިން ބާރުގެ ބޭނުން ކުރަމުންދިއުމަކީ ދިވެހި ސަރުކާރުން ވަރަށް ކަންބޮޑުވާ ކަމެއް ކަމަށެވެ.

އަދި ހަމަލާތަކުގައި ނިޔާވި މީހުންގެ އާއިލާތަކަށް ދިވެހި ރައްޔިތުންނާއި ސަރުކާރުގެ ނަމުގައި ތައުޒިޔާ ފޮނުވައިފައިވެއެވެ.

މީގެ އިތުރުން މެދުއިރުމަތީގައި ސުލްހަ ދެމި އޮންނާނީ 1967 ގެ ކުރިން އޮތް ބޯޑަރުތަކުގެ މައްޗަށް ބިނާކޮށް ދެ ދައުލަތަށް ހިމެނޭ ގޮތަށް ބަހާލައި ފަލަސްޠީނުގެ ވެރިރަށް ކަމުގައި އިރުމަތީ ޤުދުސް ހަމަޖެއްސުމުން ކަމަށް ސަރުކާރުން ދެކޭ ކަމަށް ވެސް އެ ބަޔާނުގައި ވަނީ ވިދާޅުވެފައެވެ. އަދި އިޒްރާއީލުން ފަލަސްޠީނުގެ ރައްޔިތުންނަށް ދެމުންދާ އަނިޔާތަކާ ދެކޮޅަށް ދިވެހި ސަރުކާރާއި ދިވެހި ރައްޔިތުން އަބަދު ވެސް ތިބޭނެ ކަމަށް އެބަޔާނުގައި ވަނީ ވިދާޅުވެފައެވެ.

އިޒްރާއިލް ސިފައިން ޖެނީން ސިޓީ އަށް އިއްޔެ ދިން ހަމަލާ ތަކުގައި ފަސް މީހަކު އިއްޔެ ޝަހީދު ވެފައިވާއިރު، އިއްޔެ ޒަހަމްތަކެއް ލިބުނު މީހަކު މިއަދު ވަނީ ނިޔާވެފައެވެ.