ރައްޔިތުންގެ މަޖިލީހުގައި އަޅުވާފައި އޮތް "މަރުތަޅު" ނައްޓާލުމަށް ނަޝީދު ހުށައެޅުއްވި ޙައްލު ޤަބޫލުކޮށް އެމްޑީޕީގެ ޕާލަމެންޓްރީ ގުރޫޕުގެ ނިންމުން ކޮމްޕްރޮމައިސް ނުކުރާނެކަމަށް އެމްޑީޕީގެ ޕާލަމެންޓްރީ ގުރޫޕުގެ ލީޑަރު މުޙައްމަދު އަސްލަމް ވިދާޅުވެއްޖެ އެވެ. 

ރައްޔިތުންގެ މަޖިލީހުގެ ރައީސާއި ނައިބުރައީސްގެ އިތުބާރު ނެތްކަމުގެ މައްސަލަ އެކު އެކީގައި ކަހަލަ ގޮތަކަށް މަޖިލީހަށް ހުށައެޅުމާއި ގުޅިގެން އެ ދެބޭފުޅުން ވެސް ވަނީ މަޖިލީހުގެ ރިޔާސަތު ބެލެހެއްޓުމަށް އުޒުރުވެރިވާކަމަށް ވިދާޅުވެފަ އެވެ. އެކަމާއި ގުޅިގެން މަޖިލީހުގެ ރިޔާސަތު ބަލަހައްޓާނެ މީހަކު ނެތި، މަޖިލީހުގެ މަސައްކަތްތައް ހުއްޓި މަޖިލީހުގައި ވަނީ މަރުތަޅު އެޅުވިފައެވެ. 

އެކަމަށް ޙައްލެއް ހޯދުމަށް މަޖިލީހުގެ ރައީސް މުހައްމަދު ނަޝީދު ވަނީ މިހާރު ހުށައަޅާފައިވާ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަތަކުގެ ތެރެއިން ކޮންމެެސް އެއް މައްސަލައެއް އަނބުރާ ގެންގޮސް، މަޖިލީހުގެ މަސައްކަތްތައް ކުރިއަށް ގެންދިއުމަށް އެދިވަޑައިގެންފަ އެވެ. 

ރައްޔިތުންގެ މަޖިލީހުގެ މެޖޯރިޓީ އެމްޑީޕީގެ އަތުގައި އޮތްއިރު އެ އުސޫލުން އެކަން ކުރުމަށް ޕާޓީއަށް އެއްވެސް ހުރަހެއް ނެތްކަމަށް ނަޝީދު ވަނީ ވިދާޅުވެފަ އެވެ. 

މިއަދު އެމްޑީޕީގެ ޕާލަމެންޓްރީ ގުރޫޕުން ބޭއްވި ނޫސްވެރިންގެ ބައްދަލުވުމުގައި ނޫސްވެރިން ވަނީ އެ ސުވާލު އަމާޒުކޮށްފަ އެވެ. 

އެގޮތުން މަޖިލީހުގެ މަސައްކަތްތައް ހުއްޓާނުލާ ކުރިއަށް ގެންދިއުމަށް ނަޝީދު ހުށައެޅުއްވި ޙައްލު ޤަބޫލުކުރައްވާނެތޯ ނޫސްވެރިން ސުވާލުކުރި އެވެ. އަދި އެ އުސޫލުން އެކަން ކުރުމަށް އެއްވެސް ހުރަހެއް އޮތް ތޯ ވެސް ނޫސްވެރިން އެހިއެވެ. 

ނޫސްވެރިންގެ އެ ސުވާލުތަކަށް ޖަވާބުދެއްވަމުން ޕީޖީ ލީޑަރު އަސްލަމް ވިދާޅުވީ، މިހާރު ހުށައަޅާފައިވާ އިތުބާރު ނެތްކަމުގެ އެއްވެސް މައްސަލައެއް އަނބުރާ ނުގެންދަވާނެ ކަމަށެވެ. އަދި ގެންދަން ޖެހޭފަދަ ހާލަތެއް ވެސް ނެތް ކަމަށެވެ. 

އަސްލަމް އިތުރަށް ވިދާޅުވީ މިހާރު ހުށައަޅާފައިވާ އިތުބާރު ނެތްކަމުގެ މައްސަލަ އެގޮތަށް އޮވެ މަޖިލީސް ކުރިއަށް ނުގެންދާކަމަށް ވާނަމަ، އެކަން ޙައްލު ކުރުމަށް ދެން އެމްޑީޕީން ދާނީ ސުޕްރިމް ކޯޓަށް ކަމަށެވެ. 

ސުޕްރިމް ކޯޓަށް އެ މައްސަލަ ހުށައަޅައިގެން ކޯޓު މެދުވެރިކޮށް މައްސަލަ ޙައްލު ކުރުމަކީ އެންމެ ބޭނުންވާ ގޮތް ނޫން ކަމަށާއި، އެހެން ނަމަވެސް މަޖިލީހުގައި މަރުތަޅު އަޅުވާފައި ބޭއްވިޔަ ނުދިނުމަށް ސުޕްރިމް ކޯޓަށް ދާން ޖެހިއްޖެ ނަމަ އެކަން ވެސް ކުރައްވާނެކަމަށް އަސްލަމް ވަނީ ވިދާޅުވެފަ އެވެ.