ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް ޤަބޫލުފުޅު ކުރައްވަން ދަތިފުޅުވި ނަމަވެސް ރައްޔިތުންގެ މަޖިލީހުގެ މެޖޯރިޓީ މެމްބަރުން އެމަނިކުފާނަށް އިތުބާރު ނުކުރައްވާކަމަށް އެމްޑީޕީގެ ޕާލަމެންޓްރީ ގުރޫޕުގެ ލީޑަރު މުޙައްމަދު އަސްލަމް ވިދާޅުވެއްޖެ އެވެ. 

އަސްލަމް މިފަދައިން ވިދާޅުވެފައިވަނީ އެމްޑީޕީގެ ޕާލަމެންޓްރީ ގުރޫޕުން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބުދެއްވަމުން ނެވެ. 

މަޖިލީހުގެ ރައީސް މުޙައްމަދު ނަޝީދު އިއްޔެ ބޭއްވި ނޫސްވެރިންގެ ބައްދަލުވުމުގައި ވިދާޅުވީ އެމަނިކުފާނުގެ އިތުބާރު ނެތްކަމުގެ މައްސަލަ މަޖިލީހަށް ހުށައެޅުމަށް ސޮއިކުރެއްވި ބޭފުޅުންގެ ތެރެއިން ވަރަށް ގިނަ މެމްބަރުން އެމަނިކުފާނަށް ގުޅުއްވާ، އެ މައްސަލައިގައި ސޮއިކުރައްވަން ޖެހިވަޑައިގަތީ މަޖުބޫރުވެގެންކަމަށް ވިދާޅުވެފައިވާ ކަމަށެވެ. 

އެކަމާއި ގުޅޭގޮތުން ނޫސްވެރިން ވަނީ އަސްލަމާއި ސުވާލު ކުރައްވާފަ އެވެ. 

އެ ސުވާލުތަކަށް ޖަވާބުދެއްވަމުން އަސްލަމް ވިދާޅުވީ، ނަޝީދު އަމަލުކުރައްވާ ގޮތާއި ގުޅިގެން މެމްބަރުންގެ މެދުގައި ތަންކޮޅެއް ކުރިންވެސް ނުތަނަސްކަން އުފެދިފައިވާ ކަމަށެވެ. އަދި ޕާލަމެންޓްރީ ގުރޫޕުން އެންގުމުގެ މާކުރިން މެމްބަރުންތަކެއް އިސް ނަގައިގެން ނަޝީދުގެ އިތުބާރު ނެތްކަމުގެ މައްސަަލަ މަޖިލީހަށް ހުށައެޅުމަށް ވެސް މަސައްކަތް ކޮށްފައިވާ ކަމަށެވެ. 

އަސްލަމް ވިދާޅުވީ ނަޝީދުގެ އިތުބާރު ނެތްކަމުގެ މައްސަލައިގައި ސޮއިކުރުމަށް އެއްވެސް ފަރާތަކުން ނުފޫޒު ފޯރުވިކަމަށް ނުވަތަ ޕްރެޝަރެއް ކޮށްފައިވާކަމަށް މިހާތަނަށް އެއްވެސް މެމްބަރަކު ވިދާޅުވެފައި ނުވާކަމަށެވެ. އަދި އެފަދަ އެއްވެސް ޝަކުވާއެއް މެމްބަރކު ކުރައްވާތީ އަޑުވެސް އައްސަވާފައި ނުވާކަމަށެވެ. 

އެހެން ނަމަވެސް މެމްބަރުންގެ މެދުގައި ނަޝީދުގެ މަގުބޫލުކަން ވަރަށް ބޮޑަށް ކުޑަވެގެން ގޮސްވައިވާކަން ފާހަގަކުރެވުނު ކަމަށާއި، އެމަނިކުފާނަށް ޤަބޫލުފުޅު ނުކުރެއްވުނު ނަމަވެސް މަޖިލީހުގެ ގިނަ މެމްބަރުން މިހާރު ނަޝީދަށް އިތުބާރު ނުކުރައްވާކަމަށް އަސްލަމް ވިދާޅުވި އެވެ. 

އަސްލަމް އިތުރަށް ވިދާޅުވީ ރައީސް ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ވެއްދުމަށް ސޮއި ނުކުރައްވާ އިތުރު 6 މެމްބަރަކު އޭނާއަށް ގުޅުއްވާ ވޯޓުދެއްވާނެ ކަމުގެ ޔަގީންކަން ވެސް ދެއްވާފައިވާ ކަމަށެވެ. 

އެހެންކަމުން އެމަނިކުފާނާއި ދެކޮޅަށް ހުށައެޅި މައްސަލައިގައި ސޮއިކުރީ ނުޒޫފު ފޯރުވައިގެންކަމަށް ބެލެވެން ނެތްކަމަށް އަސްލަމް ވިދާޅުވި އެވެ. 

އެއާއެކު އަސްލަމް ވިދާޅުވީ މިވަގުތު މަޖިލީހުގެ ރިޔާސަތުގައި ނަޝީދު ހުންނެވުމަކީވެސް ގައުމަށް އެންމެ ރަނގަޅުގޮތް ކަމަށް ދެކިވަޑައި ނުގަންނަވާ ކަމަށެވެ. 

މަޖިލީހުގެ މަސައްކަތްތައް ހުއްޓުވާފައިވަނީ ރައީސް ނަޝީދު ކަމަށާއި، ޒިންމާ އަދާ ނުކުރެވޭނަމަ ނަޝީދު މަގާމުން އިސްތިއުފާދެއްވުމަށް ވެސް އަސްލަމް ވަނީ ގޮވާލައްވާފަ އެވެ.