އިދިކޮޅު ކޯލިޝަނުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހާއި ބައްދަލުކުރަން ރައީސް އޮފީހަށް އަންނަނީ ރައްޔިތުންގެ ވަރަށް ގިނަ ސުވާލުތަކަކަށް އެމަނިކުފާނުގެ ފަރާތްޕުޅުން ޖަވާބު ހޯދަން ކަމަށާއި، އެ ސުވާލުތަކަށް ޖަވާބު ނުދެއްވާ ރައީސް ފިލާވަޑައިގަންނަވާނީ ފިނޑިކަމުން ކަމަށް އިދިކޮޅުން ބުނެފި އެވެ. 

ރައީސުލްޖުމްހޫރިއްޔާ އާއި ބައްދަލުކުރުމަށް މިއަދުވެސް އިދިކޮޅު ލީޑަރުން ވަނީ ރައީސް އޮފީހަށް ވަޑައިގެންފަ އެވެ. 

އެހެން ނަމަވެސް މިއަދުވެސް ރައީސުލްޖުމްހޫރިއްޔާ އެބޭފުޅުންނާއި ބައްދަލުކުރައްވާފަ އެއް ނުވެއެވެ. 

ރައީސް އޮފީހަށް ވަޑައިގަތުމަށްފަހު މީޑިއާއަށް މައުލޫމާތު ދެއްވަމުން އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވީ ރައީސުލްޖުމްހޫރިއްޔާ އާއި ބައްދަލުކުރަން އިދިކޮޅުން ކޮންމެ ދުވަހަކު ރައީސް އޮފީހަށް ދަނީ ރައްޔިތުންގެ ހުރި ވަރަށް ގިނަ ކަންބޮޑުވުން ތަކާއި، ރައްޔިތުން ޖަވާބު ހޯދަން އެދޭ ވަރަށް ގިނަ ސުވާލުތަކެއް ހިއްޕަވައިގެން ކަމަށެވެ. 

އަބްދުއްރަހީމް ވިދާޅުވީ ރައްޔިތުންގެ ސުވާލުތަކަަށް ޖަވާބެއް ހޯދުމަށް ރައީސްއާއި ބައްދަލުވޭތޯ އިދިކޮޅުން ވަރަށް ގިނަ މަސައްކަތްތަކެއް މިހާތަނަށް ކުރައްވާފައިވާ ކަމަށެވެ.

އެގޮތުން ރައީސް އޮފީހުގައި ތިއްބަވައިގެން އެބޭފުޅުން ބޭނުންފުޅުވާ ގޮތަށް ސިޓީ ލިޔެ ތިން ފަހަރުމަތިން ހުށައަޅުއްވާފައިވާ ކަމަށާއި، އެހެން ނަމަވެސް މިހާތަނަށް އިދާރީ ޖަވާބެއް ފިޔަވައި އެއްވެސް ޖަވާބެއް ލިބިފައި ނުވާކަމަށް އަބްދުއްރަހީމް ވިދާޅުވި އެވެ. 

އިދިކޮޅު ލީޑަރުންނާއި ބައްދަލުކުރުމަށް ގަޑި ދިނުމަށްފަހު ވެސް ބައްދަލުނުކުރައްވާ ކޮންމެ ދުވަހަކު ރައީސުލްޖުމްހޫރިއްޔާ އޮފީހުން ނިކުމެވަޑައިގަންނަވާ ކަމަށާއި، ރައްޔިތުންގެ ސުވާލުތަކަށް ޖަވާބު ނުދެއްވާ އެގޮތަށް ފިއްލަވަނީ ރައީސުލްޖުމްހޫރިއްޔާ ފިނޑިކަމުންކަމަށް އަބްދުއްރަހީމް ވިދާޅުވި އެވެ. 

އެކަންކަން ފާހަގަކުރައްވާ އަބްދުއްރަހީމް ވަނީ ރައީސް ޞާލިހުގެ އިސްތިއުފާއަށް ގޮވާލައްވާފަ އެވެ. 

އޭނާ ވިދާޅުވީ ރައްޔިތުންގެ ސުވާލުތަކަށް ޖަވާބުދެއްވަން ކެރިވަޑައި ނުގަންނަވާނަމަ، އަދި ވާދަވެރިންނާއި ބައްދަލުކުރެއްވުމުގެ ޤާބިލުކަން ރައީސް ޞާލިހުގެ ކިބައިގައި ނެތްކަމަށް ވާނަމަ ދެން އެންމެ ރަނގަޅުވާނީ މަޤާމުން އިސްތިއުފާދެއްވުން ކަމަށެވެ. ޖަވާބުދާރީ ނުވެވޭ ބޭފުޅަކު ރައީސުލްޖުމްހޫރިއްޔާގެ މަގާމު ފުރުއްވުމަށް ކުފޫ ހަމަނުވާކަމަށް އަބްދުއްރަހީމް ވިދާޅުވި އެވެ.