އެމްޑީޕީގެ ރައީސް، މުހައްމަދު ނަޝީދު އެޕާޓީން ވަކިވެވަޑައިގެންފި އެވެ. 

އެމްޑީޕީން ވަކިވެވަޑައިގެންނެވި ކަން އިއުލާން ކުރައްވައި ރައީސް ނަޝީދު، އެމްޑީޕީގެ ޗެއާޕާސަން ފައްޔާޒް އިސްމާއިލް އަށް ފޮނުވި ސިޓީއެއްގައި ވިދާޅުވީ ރާއްޖޭގެ ކަންކަން މިހާރު ހިނގަމުންދާ ގޮތައް ބަލާއިރު އެމަނިކުފާނު އެމްޑީޕީގައި ހުރުން އެއީ އެންމެ ރަނގަޅު ގޮތް ކަމަށް ނުދެކޭ ކަމަށެވެ. އެހެންކަމުން އެމްޑީޕީން އިސްތިއުފާ ދެއްވާފައިވާ ކަމަށްވެސް އެ ސިޓީގައި ވިދާޅުވިއެެވެ.

2003 ވަނަ އަހަރުގެ ތެރޭގައި އެމްޑީޕީ އުފެއްދުމަށް ހަރަކާތްތެރިވި އެންމެ އިސް ބޭފުޅުންގެ ތެރޭގައި ނަޝީދު ހިމެނިވަޑައިގަންނަވައެވެ. އަދި ރާއްޖޭގައި ސިޔާސީ ޕާޓީ އުފެއްދުމުގެ ހުއްދަ އޭރުއޮތް ރައީސް މައުމޫން އަބްދުލްޤައްޔޫމްގެ ސަރުކާރުން 2005 ވަނަ އަހަރު ދެއްވުމުން އެމްޑީޕީ ރަޖިސްޓްރީ ކުރުމުގެ ހުއްދައަށް އެދި ހުށަހެޅިއިރު ވެސް ނަޝީދު އެހުށަހެޅުމުގައި ސޮއި ކުރެއްވިއެވެ. އަދި ހަމަ އެ އަހަރު، އެމްޑީޕީގެ ފުރަތަމަ ޗެއާޕާސަން ކަމުގެ މަގާމަށްވެސް ނަޝީދު ހޮވިވަޑައިގެންނެވިއެވެ. 

ރައީސް ނަޝީދު އެމްޑީޕީން ވަކިވެވަޑައިގެންފައި މިވަނީ، އެމަނިކުފާނަށް ވަފާތެރި ފަރާތްތަކުން 'ދަ ޑިމޮކްރެޓްސް'ގެ ނަމުގައި ޕާޓީއެއް އުފެއްދުމަށް ނިންމަށް އެ ޕާޓީ ރެޖިސްޓާރ ކުރަން އިލެކްޝަންސް ކޮމިޝަނަށް ހުށަހަޅާފައިވަނިކޮށް އެ ކޮމިޝަންގެ މަސައްކަތްތައް ހުއްޓިފައިވާ ދަނޑިވަޅެއްގައެވެ. 

އެ ކޮމިޝަންގެ މަސައްކަތްތައް ހުއްޓުމަކަށް އައިސްފައިވަނީ، ކޮމިޝަންގެ ރައީސް، ފުއާދު ތައުފީގާއި އެކު، ކޮމިޝަންގެ ޖަލްސާތަކުގައި ބައިވެރި ނުވާނެ ކަމަށް، ކޮމިޝަންގެ މެމްބަރުން ކަމަށްވާ އަލީ ނަޝާތާއި މުހައްމަދު އާސިފާއި ޑރ. މުހައްމަދު ޒާހިރު އެންގެވުމާއި ގުޅިގެންނެވެ.