ވޯޓަރސް ލިސްޓަށް އެންމެ ގިނައިން ޝަކުވާ ހުށަހަޅާފައި ވަނީ މަރުވެފައިވާ މީހުންގެ ނަން އޮވެގެން ކަމަށް އިލެކްޝަންސް ކޮމިޝަންގެ ތަފާސްހިސާބުތަކުން ދައްކައިފިއެވެ.

މި މަހުގެ 11 ވަނަ ދުވަހުން ފެށިގެން އިއްޔެގެ ނިޔަލަށް އީސީއަށް ވަނީ 185 ޝަކުވާ ހުށަހަޅާފައެވެ.

އޭގެ ތެރެއިން 148 މައްސަލަ އަކީ، މަރުވެފައިވާ މީހުންގެ ނަން ވޯޓަރސް ލިސްޓުގައި އޮތުމުން ހުށަހަޅާފައިވާ ޝަކުވާއެވެ. އަދި ދިރިއުޅޭ އެޑްރެސް ބަދަލުވެގެން 21 ޝަކުވާ ހުށަހަޅާފައި ވާއިރު، ލިސްޓުގައި ނަން ނެތިގެން 10 ޝަކުވާ ހުށަހަޅާފައި ވެއެވެ.

މީގެ އިތުރުން ހިމެނެނީ ދާއިރާ ބަދަލުވެގެން ހުށަހަޅާފައިވާ ތިން ޝަކުވާއާއި ނަން ބަދަލުވެގެން ހުށަހަޅާފައިވާ ދެ ޝަކުވާ އަދި އައިޑީ ބަދަލުވެގެން ހުށަހަޅާފައިވާ ޝަކުވާއެކެވެ.

ސެޕްޓެމްބަރު މަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގެ ވޯޓަރސް ލިސްޓަށް ނަން ހުށަހެޅުމުގެ ސުންގަޑި މާދަމާއަށް ހަމަވާނެއެވެ.

މި އަހަރު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި ވޯޓުލާ މީހުންގެ ލިސްޓު އީސީއިން އާންމުކުރީ މިދިޔަ މަހުގެ ކުރީކޮޅުގައެވެ.

އީސީ އިން އާންމު ކުރި ވޯޓާސް ލިސްޓުގައިވާ ގޮތުން ރިޔާސީ އިންތިހާބުގައި މިފަހަރު 282755 މީހުންނަށް ވޯޓު ލުމުގެ ހައްގު ލިބޭނެއެވެ. އެއީ ސެޕްޓެމްބަރު ނުވަ ވަނަ ދުވަހުގެ ނިޔަލަށް 18 އަހަރު ފުރޭ މީހުން ހިމަނައިގެން ތައްޔާރު ކޮށްފައިވާ ލިސްޓެކެވެ.

އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބު ކުރެއްވި ޓުވީޓެއްގައި ވިދާޅުވީ، ވޯޓުލާމީހުންގެ ލިސްޓު ސައްހަ ކުރުމަށްޓަކައި ފަރުދުންނާއި ޕާޓީތަކުން މަސައްކަތް ކޮށްދެއްވުން އެދޭ ކަމަށެވެ.

ލިސްޓު ކައުންސިލްތަކުގެ އިދާރާއިން ވެސް ބެލޭނެ ކަމަށް ހަބީބު ވިދާޅުވިއެވެ.

މިއަހަރުގެ ރިޔާސީ އިންތިޚާބު ސެޕްޓެމްބަރު މަހުގެ ނުވަ ވަނަ ދުވަހު ބާއްވަން އިލެކްޝަންސް ކޮމިޝަނުން ވަނީ ނިންމާފައެވެ. އަދި ރިޔާސީ އިންތިޚާބުގެ ދެވަނަ ބުރެއް ބާއްވަން ޖެހިއްޖެ ހާލަތެއް އަތުވެއްޖެނަމަ ދެވަނަ ބުރުގެ ވޯޓުލުން އޮންނާނީ ސެޕްޓެމްބަރުމަހުގެ 30 ގައެވެ.