ޕާޓީ ރަޖިސްޓްރީ ނުކޮށް ލަސްކުރުމަކީ ގާނޫނުން ލިބިދޭ ހައްގުތައް ހިފެހެއްޓުން ކަމަށް ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވެއްޖެއެވެ.

ހަސަން ލަތީފް މިހެން ވިދާޅުވީ "ދަ ޑިމޮކްރެޓްސް" ގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.

ޕާޓީ ރަޖިސްޓްރީ ކޮށްދިނުމަށް ތިންމަސް އޮތްކަމަށް އިލެކްޝަންސް ކޮމިޝަންގެ ބައެއް މެމްބަރުން ވިދާޅުވާކަން ފާހަގަ ކުރައްވައި ހަސަން ލަތީފް ވިދާޅުވީ އެއީ ގާނޫނީ ގޮތުން ގަބޫލު ކުރެވޭނެ ވާހަކައެއް ނޫން ކަމަށެވެ.

Advertisement

"އިލެކްޝަންސް ކޮމިޝަނަށް ހުށަހަޅަން ޖެހޭ މައުލޫމާތު، އަދި އެ ބޭފުޅުންގެ އިޖުރާއަތްތަކާ ގަވާއިދުތަކާ އުސޫލުތަކާ އެއްގޮތަށް އަޅުގަނޑުމެން ހުށައެޅުމަށްފަހު ދެން ހަމަ އެއްވެސް ސަބަބަކާ ނުލާ އެ ބޭފުޅުންނަށް އެ ހިފަހައްޓާލައިގެން ތިބެވިދާނެ ކަމަކަށް އަޅުގަނޑު ގަބޫލެއް ނުކުރަން. އެއީކީ ގާނޫނުއަސާސީގެ ރޫހެއްވެސް ނޫން" ހަސަން ލަތީފް ވިދާޅުވިއެވެ.

އޭނާ ވިދާޅުވީ އެ ހިފެހެއްޓެނީ ބައެއްގެ ހައްގެއް ކަމަށެވެ.

"ދަ ޑިމޮކްރެޓްސް" ރަޖިސްޓްރީ ނުވީ، މިދިޔަ އާދީއްތަ ދުވަހު ބޭއްވި އީސީގެ ބައްދަލުވުމުގައި ދެ މެމްބަރަކު ވޯޓު ނުދިނުމުންނެވެ.

ޕާޓީ ރަޖިސްޓްރީކުރަން ބޭނުންވާ އަދަދަށް މެމްބަރުންގެ ފޯމު ހަމަކޮށް، ޑިމޮކްރެޓްސްއިން އީސީއަށް ހުށަހެޅީ މި މަހުގެ ކުރީކޮޅުގައެވެ. ނަމަވެސް އަދިވެސް ޕާޓީ ރަޖިސްޓްރީ ކޮށްދީފައި ނުވާތީ މިއަދު އެ ޕާޓީން ވަނީ އީސީ ދޮށަށް އެއްވެފައެވެ.

އެކަމާ ގުޅިގެން އީސީގެ ރައީސް ފުއާދު ތައުފީގު ޑިމޮކްރެޓްސްގެ މެމްބަރުންނަށް މައުލޫމާތު ދެއްވަމުން ވިދާޅުވީ، މިވަގުތު އީސީގައި ތިބީ ހަތަރު މެމްބަރުން ކަމަށާއި، އޭގެ ތެރެއިން، މިހާރުން މިހާރަށް ރަޖިސްޓްރީ ކޮށްދޭން ވޯޓު ދިނީ ދެ މެމްބަރުން ކަމަށެވެ. އަނެއް ދެ މެމްބަރުން ވޯޓު ދިނީ ރަޖިސްޓްރީ ކޮށް ނުދިނުމަށް ކަމަށެވެ.

ރަޖިސްޓްރީ ކޮށް ނުދިނުމަށް ވޯޓުދިން މެމްބަރުން ސަބަބެއް ކަމުގައި ދެއްކީ، އަދި ބަލަންޖެހޭ ކަންތައްތައް ހުރުން ކަމަށް ފުއާދު ވިދާޅުވިއެވެ.

ދެކޮޅަށް ވޯޓު ދެއްވާފައި ވަނީ އީސީގެ މެމްބަރު ޢަލީ ނަޝާޠުއާއި މުހައްމަދު ޢާސިފްއެވެ.