މަޖިލީހުގެ ޖަލްސާގެ ރިޔާސަތު ބަލަހައްޓަވަން ވަޑައިގަތީ އެއީ ވާޖިބެއް ވީމަ: ރައީސް ނަޝީދު
ރައްޔިތުންގެ މަޖިލީހުގެ ޖަލްސާތައް ނުބާއްވާތާ ތިން ދުވަސް ވުމަށްފަހު، މިއަދަށް ޖަލްސާއެއްް އެޖެންޑާކޮށް، ޖަލްސާ ފަށައިފި އެވެ.
މިއަދުގެ ޖަލްސާގެ ރިޔާސަތުގައި އިންނެވީ މަޖިލީހުގެ ރައީސް މުހައްމަދު ނަޝީދެވެ.
މިއަދުގެ ޖަލްސާ ފައްޓަވަމުން ރައީސް ނަޝީދު ވަނީ، އެޖެންޑާ އިއުލާން ކުރައްވަމުން، ރިޔާސަތުން އަންގަވާ އެންގެވުން މެންބަރުންނަށް ދަންނަވާފައެވެ.
Advertisement
އެގޮތުން ވިދާޅުވީ، އެމަނިކުފާނުގެ މައްޗަށް ހުށަހަޅާފައިވާ އިތުބާރު ނެތް ކަމުގެ މައްސަލަ އާއި މެދު ގޮތެއް ނިމެންދެން މަޖިލީހުގެ ރިޔާސަތު ބެލެހެއްޓުމަށް އުޒުރުވެރިވެވަޑައިގަންނަވާކަން އަމީން އާންމަށް އެންގެވި ކަމަށާ، އަދި އެފަދައިން އެންގެވީ މަޖިލީހުގެ ގަވާއިދުގެ ދަށުން ކަމަށެވެ.
ނަމަވެސް ރާއްޖޭގެ ރައްޔިތުންގެ މަޖިލިސް ހުއްޓިފައި އޮތުމަކީ ރައްޔިތުން ނުހަނު ކަންބޮޑުވާ މައްސަލައެއް ކަމަށާ، އެކަން އެހެން ދިމާވި އެމްޑީޕީން، މަޖިލީހުގެ ރައީސް އަދި ނާއިބު ރައީސް ގެ އިތުބާރު ނެތްކަމުގެ މައްސަލަ އެއްކޮށް މަޖިލީހަށް ވެއްދުމުން ކަމަށްވެސް ނަޝީދު ވިދާޅުވި އެވެ.
ރާއްޖޭގެ ރައްޔިތުންގެ މަޖިލިސް ހުއްޓިފައި އޮތުމަކީ ގިނަ ދިވެހި ރައްޔިތުން ނުހަނު ކަންބޮޑުވާ ކަމެއް. މަޖިލިސް ބަލަހައްޓަވަމުން ގެންދެވި ވިލިފުށި ދާއިރާގެ މެންބަރު ހަސަން އަފީފު ރައީސުލްޖުމްހޫރިއްޔާ އާއި ބައްދަލުކުރެއްވި. އެހެން ނަމަވެސް އެ ބައްދަލު ކުރެއްވުމަކުން މި މަޖިލިސް ކުރިއަށް ގެންދިޔުމަށް ފުރުސަތު ލިބިގެނެއް ނުދިޔަ. މަޖިލިސް ކުރިއަށް ނުގޮސް އޮތް އޮތުން އެއީ އަޅުގަނޑަށް ފެނުނު ގޮތުގައި، އެއީ މަޖިލީހުގެ ރައީސް އާއި ނާއިބު ރައީސްގެ އިތުބާރު ނެތް ކަމުގެ މައްސަލަ އެއްފަހަރާ ވެއްދުމުން ދިމާވެފައި އޮތް އަރަތެއް.
މަޖިލީހުގެ ރައީސް މުހައްމަދު ނަޝީދު
ރައީސް ނަޝީދު ވިދާޅުވީ އެމަނިކުފާނު މަޖިލީހުގެ ރިޔާސަތު ބަލަހައްޓަވަން ވަޑައިގެންނެވީ، އެމަނިކުފާނުގެ އުޒުރަށްވުރެ، ރައްޔިތުންގެ މަސްލަހަތު އިސްވުމުން ކަމަށެވެ. އަދި މިވަގުތު މަޖިލީހުގެ ރިޔާސަތާއި ހަވާލުވެވަޑައިގެންނެވުމަކީ ވާޖިބެއް ކަމަށް ވުމުން ކަމަށެވެ.
އަޅުގަނޑު މިއަދު މިތަނުގައި ރިޔާސަތު ބެލެހެއްޓުމަށް މި އިނީ، އަޅުގަނޑު ދެކޭ ގޮތުގައި، އަޅުގަނޑުގެ އުޒުރުތަކަށްވުރެ އަދި މާ މަތީ މަސްލަހަތެއް އަޅުގަނޑު އެބަ ހިފަހައްޓަން ޖެހޭ. އެއީ ދިވެހި ރައްޔިތުންގެ މަސްލަހަތު. ދިވެހި ރާއްޖޭގެ މަސްލަހަތު. މި ރައްޔިތުންގެ މަޖިލިސް ހުއްޓިފައި އޮތުން އެއީ، ރައްޔިތުންގެ މަސްޓހިފެހެއްޓޭނެ ގޮތެއް ނޫން. އަޅުގަނޑު މިއަދު ހިތާމަ ކުރަން ދައުލަތުގެ އެހެން ބާރު ތަކުން އަދި ޚާއްސަގޮތެއްގައި، މިތަނުގެ މެޖޯރިޓީ ޕާޓީ، މި މައްސަލަ ހައްލު ކޮށްދިނުމުގައި އެއްގޮތަކަށްވެސް އެހީތެރިވެފައި ނުވާކަމަށް. އެހެން ނަމަވެސް އަޅުގަނޑު ދުށީ، މިއީ އަޅުގަނޑުގެ ވާޖިބެއް ކަމަށް. އެހެން ކަމުން މިއަދު އަޅުގަނޑު މަޖިލީހުގެ ރިޔާސަތު ބަލަހައްޓަން ގަސްތުކޮށް އެ ރިޔާސަތު މި ބަލަހައްޓަނީ.
މަޖިލީހުގެ ރައީސް މުހައްމަދު ނަޝީދު
ރައީސް ނަޝީދުގެ އެންގެވުން ނިންމަވާ ލެއްވީ މިއަދުގެ ޖަލްސާއަކީ މިދައުރުގެ ފަހު ޖަލްސާ ކަމާއި، މިއަދުގެ ޖަލްސާއަށްފަހު މަޖިލިސް ޗުއްޓީއަށް ދާނެކަން ވެސް އިއުލާން ކުރައްވަމުންނެވެ.
Advertisement
Advertisement
Advertisement
This content is created and paid for by advertisers and does not involve Voice Journalists
Advertisement
