ރައްޔިތުންގެ މަޖިލީހުގައި މަރުތަޅު އެޅުވި، މަޖިލިސް ހުއްޓުމަކަށް އައީ، މަޖިލީހުގެ ރައީސް އާއި ނާއިބު ރައީސްގެ އިތުބާރު ނެތް ކަމުގެ މައްސަލަ އެއްފަހަރާ މަޖިލީހަށް ވެއްދުމުން ކަމަށާ، އެކަން ހައްލުކުރަން މަޖިލީހުގެ މެޖޯރިޓީ، އަދި ސަރުކާރު ހިންގާ މައި ޕާޓީ، އެމްޑީޕީން އެއްބާރުލުން ނުދޭ ކަމަށް އެ ޕާޓީން އިއްޔެ ވަކިވެވަޑައިގެންނެވި މަޖިލީހުގެ ރައީސް މުހައްމަދު ނަޝީދު ވިދާޅުވުމުން، މެޖޯރިޓީ ލީޑަރ އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ރައްދު ދެއްވައިފިއެވެ. 

ރައްޔިތުންގެ މަޖިލީހުގެ ޖަލްސާތައް ނުބާއްވާތާ ދެ ދުވަސް ވުމަށްފަހު، މިއަދަށް ޖަލްސާއެއްް އެޖެންޑާކޮށް، ކުރިއަށް ގެންދާއިރު، ޖަލްސާގެ ރިޔާސަތުގައި އިންނެވީ މަޖިލީހުގެ ރައީސް މުހައްމަދު ނަޝީދެވެ. 
މިއަދުގެ ޖަލްސާ ފައްޓަވަމުން ރައީސް ނަޝީދު ވަނީ، އެޖެންޑާ އިއުލާން ކުރައްވަމުން، ރިޔާސަތުން އަންގަވާ އެންގެވުން މެންބަރުންނަށް ދަންނަވާފައެވެ. 

އެގޮތުން، ދެއްކެވި ވާހަކަފުޅުގައި ވިދާޅުވީ، މަޖިލިސް ހުއްޓިފައި އޮތުމަކީ، ދިވެހިރައްޔިތުން ނުހަނު ކަންބޮޑުވެވަޑައިގަންނަވާ ކަމެއް ކަމަށެވެ. އަދި އެ މައްސަލަ ހައްލުކުރުމަށް، ދައުލަތުގެ އެހެން ބާރު ތަކުން އަދި ޚާއްސަގޮތެއްގައި، މަޖިލީހުގެ މެޖޯރިޓީ ޕާޓީ، އެންޑީޕީން އެއްގޮތަކަށްވެސް އެހީތެރިވެފައި ނުވާތީ ހިތާމަ ކުރައްވާ ކަމަށްވެސް ނަޝީދު ވިދާޅުވި އެވެ. 

Advertisement

މަޖިލީހުގެ މިއަދުގެ ޖަލްސާގައި ކޮމިޓީތައް އެކުލަވާލުމާއި ގުޅޭގޮތުން، ބަހުސް ކުރައްވަމުން އަސްލަމް ވަނީ، ރައީސް ނަޝީދުގެ އެވާހަކަތަކަށް ރައްދު ދެއްވާފައެވެ. 

އެގޮތުން، އަސްލަމް ވިދާޅުވީ މަޖިލީހުގެ ކޮމިޓީތައް އެކުލަވާލުމާއި ގުޅޭގޮތުން އަމިއްލަ މެންބަރުންނާއި އެހެން ޕާޓީތަކާއި އެކު ގިނަ ބައްލަވުންތަކެއް ބޭއްވިގެން ދިޔައިރު، އެ ހުރިހާ ބައްދަލުވުމެއްގައިވެސް ފުރިހަމަ އެއްބާރުލުން ދެއްވާފައިވާ ކަމަށެވެ. 

މަޖިލިސް މިއަދު ފައްޓަވަމުން ރައީސް ނަޝީދު ވަނީ މިއަދުގެ ޖަލްސާ އަކީ މިދައުރުގެ ފަހު ޖަލްސާކަން އަންގަވާފައެވެ. ނަމަވެސް، އަސްލަމް ވަނީ މަޖިލިސް ޗުއްޓީއަށް ދިޔުމުގެ ކުރިން، ކޮމިޓީ މައްސަލައާއި އެ ނޫންވެސް ނުނިމި ހުރި މުހިންމު ކަންކަން ނިންމެވުމަށް، ދައުރު އިތުރަށް ދަންމަވާލައްވަން އެދިލައްވާފައެވެ.