ކުރީގެ ރައީސް އަދި މަޖިލީހުގެ ރައީސް މުޙައްމަދު ނަޝީދު ސަރުކާރުން އެމަނިކުފާނަށް ހަމަޖައްސައިފައި ހުންނަ ރަސްމީ ގެކޮޅު ކަމަށްވާ މ މުރައިދޫގެއިން ނުކުމެ ވަޑައިގަންނަވާނެ ކަން އަންގަވައިފިއެވެ.

ރައީސް ނަޝީދުގެ އޮފީހުން ރައްޔިތުންގެ މަޖިލީހަށް ފޮނުވި ސިޓީ ގައި ބުނެފައިވަނީ ނަޝީދު ހުންނަވާ ރަސްމީ ގެކޮޅު، މ. މުރައިދޫއިން ގ. ބޭރުވެއްޔަށް، ހޯމަ ދުވަހު ބަދަލުވެވަޑައިގަންނަވާނެ ކަމަށެވެ.

އެދުވަހަކީ ރައީސް ނަޝީދުގެ އިތުބާރު ނެތް ކަމުގެ މައްސަލައިގެ 14 ދުވަހުގެ ނޯޓިސް ހަމަވާދުވަހެވެ.

ރައީސް ނަޝީދު ދިރިއުޅުއްވުމަށް މުރައިދޫގެ ހަމަޖެއްސެވީ މެއި 6، 2021 ގައި ރައީސް ނަޝީދު އަވަހާރަކޮށްލުމަސް ދިން ބޮމުގެ ހަމަލާއާ ގުޅިގެން ސަލާމަތީ ގޮތުން ބަލަން ޖެހޭ ކަންކަމާ ގުޅިގެންނެވެ.

ކުރިން ސަރުކާރުން ދިރިއުޅުމަށް ރަސްމީ ގެކޮޅު ހަމަޖައްސައިދެނީ ރައީސުލް ޖުމްހޫރިއްޔާ އަދި ރައީސުލް ޖުމްހޫރިއްޔާގެ ނައިބަށެވެ. ނަމަވެސް ރައީސް ނަޝީދަށް ދިން ހަމަލާއާއި ގުޅިގެން ޤާނޫނަށް ގެނައި ބަދަލާއި އެކު މަޖިލީހުގެ ރައީސަށާއި ބަންޑާރަ ނައިބަށްވެސް ރަސްމީ ގެކޮޅު ހަމަޖައްސައި ދޭން ޖެހެއެވެ.

އެ އިސްލާހުގައިވާ ގޮތުން މަޖިލީހުގެ ރައީސާއި އުއްތަމަ ފަނޑިޔާރަށް ދައުލަތުން ހަމަޖައްސައިދޭ ރަސްމީ ތަންތަނަކީ ސަލާމަތީ ގޮތުން އަޅަން ޖެހޭ ފިޔަވަޅުތައް އެޅޭނެ ތަނަކަށް ވާން ޖެހޭނެ އެވެ. އެ ތަންތަނުގެ ސަލާމަތީ ކަންތައްތައް ބަލަހައްޓަން ޖެހޭނީ ސިފައިން ކަމަށާއި މަޖިލީހުގެ ރައީސާއި އުއްތަމަ ފަނޑިޔާރަށް ދޭންޖެހޭ ރައްކާތެރިކަން ސިފައިން ހަމަޖައްސައިދޭން ޖެހޭ ކަމަށް ޤާނޫނުގައިވެ އެވެ.

މުރައިދޫގެ ދޫކުރައްވައި ރައީސް ނަޝީދު ބަދަލުވެވަޑައިގަންނަވާ  ގ ބޭރުވެއްޔަކީ އެމަނިކުފަނު ޚިއްސާވާ އޯޝަން ޕަބްލިޝާސް ވެސް ހިންގާ ގެ އެވެ.