ސަރުކާރުން މާލެ ސަރަހައްދުގައި އިމާރާތް ކުރަމުންދާ ސުކޫލު ތަކުގެ ތެރެއިން ނިމިދިޔަ ދިރާސީ އަހަރަށް ނިންމާނެ ކަމަށް ބުނި ސުކޫލުތައް މި ފެށޭ އައު ދިރާސީ އަހަރުތެރޭ ނިންމާލެވޭނެ ކަމަށް އެޑިއުކޭޝަން މިނިސްޓްރީން ބުނެފިއެވެ. 

އެޑިއުކޭޝަން މިނިސްޓްރީން ނެރުނު ބަޔާނެއްގައި ބުނީ، މާލެ ސަރަހައްދުގައި އިމާރާތް ކުރަމުންދާ ތިން ސުކޫލެއްގެ މަސައްކަތް މިފެށޭ ދިރާސީ އައު އަހަރުގެ ފުރަތަަމަ ޓާމު ތެރޭގައި ނިމިގެންދާނެ ކަމަށެވެ. އެ ތިން ސުކޫލަކީ، ހުޅުމާލެ ފޭސް ދޭއްގައި ތަރައްގީ ކުރަމުންދާ ސަލާހުއްދީން ސްކޫލާއި މާލޭގައި ހަދާ ދަރުމަވަންތަ ސްކޫލްގެ އާ އިމާރާތުގެ އިތުރުން ހުޅުމާލޭގައި އިމާރާތް ކުރަމުންދާ ސީއެޗްއެސްސީގެ އާ އިމާރާތެވެ. 

އެތަނުން، ސަލާހުއްދީން ސްކޫލް އިމާރާތް ކުރުމުގެ މަސައްކަތް އަމީން ކޮންސްޓްރަކްޝަން އާ ހަވާލުކޮށްފައި ވަނީ 2021 ވަނަ އަހަރުގެ ފެބްރުއަރީ މަހުގެ ތެރޭގައެވެ. 118،336،879 ރުފިޔާގެ އަގަކަށް، އަމީން ކޮންސްޓްރަކްޝަން އާ މަސައްކަތް ހަވާލުކޮށްފައި ވަނީ 390 ދުވަހުގެ ތެރޭގައި ނިންމާ ގޮތަށެވެ.

އެ ސުކޫލުގެ މަސައްކަތް ނިމި، ނިމިގެން ދިޔަ ދިރާސީ އަހަރުގެ ދެވަނަ ޓާރމުގައި ސުކޫލުގައި ކިޔަވައިދިނުން ފެށިގެންދާނެކަމަށް، މިދިޔަ އަހަރު ހުޅުމާލޭ ދެވަނަ ފިޔަވަހީގައި ހުޅުވި “އަހުމަދު ކާމިލްދީދީ ޕްރައިމަރީ ސްކޫލް” ހުޅުވުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރު އައިޝަތު އަލީ ވަނީ ވިދާޅުވެފަ އެވެ. 

ދަރުމަވަންތަ ސްކޫލުގެ އާ އިމާރާތުގެ މަސައްކަތް 2020 ވަނަ އަހަރުގެ ފެބްރުއަރީ މަހު އެސްޖޭ ކޮންސްޓްރަކްޝަނާއި ހަވާލު ކޮށްފައި ވަނީ އެއް އަހަރު ދުވަހުގެ ތެރޭގައި މަސައްކަތް ނިންމުމަށެވެ. ނަމަވެސް ކޮވިޑް-19 ގެ ހާލަތުގެ ސަބަބުން މި އިމާރާތުގެ މަސައްކަތް މަޑުޖެހުނީއެވެ. އެހެންކަމުން އެ މަސައްކަތް ނިންމުމުގެ މުއްދަތު އިތުރު ކޮށް، ޑިސެންބަރު މަހަށް ނިންމާ 2022 ވަނަ އަހަރު ކިޔަވާއިދޭން ފަށޭނެ ކަމަށް އެޑިއުކޭޝަން މިނިސްޓްރީން ކުރިން ވަނީ ބުނެފަ އެވެ. 

އެ ސްކޫލް ޑިޒައިން ކޮށްފައި ވަނީ 1000 ދަރިވަރުންނަށް ކިޔެވޭގޮތަށް 41 ކްލާސްރޫމް ހިމަނައިގެންނެވެ.

ދަރުމަވަންތަ ސްކޫލްގެ އާ އިމާރާތް ނިމުމާއެކު ދަރުމަވަންތަ ސްކޫލް މިހާރު ހިންގަމުންދާ އިމާރާތަށް އަރައްބިއްޔާ ސްކޫލްގެ ދަރިވަރުން ބަދަލު ކުރުމަށް ހަމަޖެހިފައިވާ ކަމަށްވެސް އެޑިއުކޭޝަނުން ވަނީ ބުނެފައެވެ.

މީގެ އިތުރުން، މާލޭގައި ތޮއްޖެހުން އިތުރުވުމާއި، ގިނަ ކުދިންނަށް އޭ ލެވެލް ކިޔެވުމަށް ފުރުސަތު ދިނުމުގެ ގޮތުން، 2020 ވަނަ އަހަރު ސީއެޗްއެސްއީ ހުޅުމާލޭ އަށް ބަދަލު ކުރަން ސަރުކާރުން ނިންމިއެވެ. 

19 ކްލާސްރޫމާއި ހަ ލެބޯޓަރީގެ އިތުރުން ހަތަރު ސްޓާފްރޫމް ހެދުމަށް ރަޝީދު ކާޕެންޓްރީއާ މަސައްކަތް ހަވާލުކުރީ 33.4 މިލިއަން ރުފިޔާއަށް 420 ދުވަހުގެ ތެރޭގައި ނިންމާ ގޮތަށެވެ. އެ މުއްދަތު މިހާރު ހަމަވެފައިވާއިރު، އަދި މިހާތަނަށް ސްކޫލް ނިމިފައެއް ނުވެއެވެ.