ޓައިޓޭނިކް ބަލަން ފީނިފަހުން ޚަބަރެއް ނުވެގެން ހޯދަމުން ދިޔަ "ޓައިޓަން" ސަބްމާސިބަލް އިން ދަތުރުކުރަން ބިރުގެންފައި ހުރި ކަމަށް، އެ ހާދިސާގައި ނިޔާވި 19 އަހަރުގެ ސުލޭމާން ބުނި ކަމަށް އޭނާގެ ބޮޑުދައިތަ ހާމަކޮށްފިއެވެ. 

މީގެ 111 އަހަރު ކުރިން ފެތުނު އާރް.އެމް.އެސް ޓައިޓޭނިކް ކައިރިއަށް ފަތުރުވެރިންނާ އެކު ފީނި ޓައިޓަންގެ ނަން ދީފައިވާ ކުޑަ ސަބްމެރިންގައި ދަތުރުކުރި ފަސް މީހުން މަރުވެފައިވާ ކަން ކަށަވަރު ކުރެވިފައިވާ އިރު، އެ ސަބްމެރިން ހަލާކުވީ ކަނޑުގެ އަޑީގެ ޕްރެޝަރަށް ކެތް ނުވެގެން ކަމަށް މިހާތަނަށް ހޯދި ހޯދުމުން ވަނީ އެނގިފައެވެ.

އެގޮތުން، އެ އުޅަނދުގެ ކިބާގައި، ޓައިޓެނިކް އޮތް ހިސާބުގެ ކަނޑުއަޑީގެ ޕްރެޝަރ ގާތަށް ވެސް ޕްރެޝަރު ހިފެހެއްޓުމުގެ ކުޅަދާނަކަން ނެތުމުން ސަބްމެރިންގެ އެތެރޭގެ ޕްރެޝަރު މަތިވެގެން ގޮސް "އިމްޕްލޯޑް" ވީ ކަމަށް ތަޖުރިބާ ކާރުން އަންނަނީ ބުނަމުންނެވެ.

އަދި އެ އުޅަނދު "އިމްޕްލޯޑް" ވީތާ ހިނދުކޮޅެއްގެ ތެރޭގައި ދަތުރު ކުރި މީހުންވެސް، މަރުވެގެން ގޮސްފައިވާނެ ކަމަށް މިހާތަނަށް ބެލި ބެލުމުން ލަފާކުރެވިފައި ވާއިރު، އެ "އިމްޕްލޯޝަން"ގެ ސަބަބުން އެ މީހުންގެ ހަށިގަނޑުތައް ވެސް ކުދިކުދި ވާނެ ކަމަށާއި އަދި ނެގޭނެ ހަށިގަނޑުގެ ބައިތަކެއް ނުހުންނާނެ ކަމަށް އެމެރިކާގެ ކަނޑުގެ ސިފައިންގެ ކުރީގެ ކެޕްޓަން ޑޭވިޑް މާކެޓް ވަނީ ވިދާޅުވެފަ އެވެ.

މިހިތާމަވެރި ހާދިސާގައި ނިޔާވި މީހުންގެ ތެރޭގައި ޕާކިސްތާނުގެ ވިޔަފާރިވެރިއެއް ކަމުގައިވާ ޝާހުޒާދާ ދާވޫދާއި އޭނާގެ ދަރިފުޅު ސުލައިމާން ދާވޫދު ހިމެނެއެވެ. 

ސުލައިމާން އަކީ ޔުނިވާސިޓީ ތައުލީމް ހާސިލް ކުރަމުންދާ 19 އަހަރުގެ ޒުވާނެކެވެ. 

ޓައިޓޭނިކް ބަލާލުމަށް ޓައިޓަންގައި ސުލައިމާނު ކުރި އެ ދަތުރު، އޭނާގެ ހަޔާތުގެ ފަހު ދަތުރަށް ވެގެން ގޮސްފައިވާއިރު، އޭނާގެ ބޮޑުދައިތަ، އަދި ޝާހުޒާދާ ދާވޫދުގެ ދައްތަ، އަޒުމީ ދާވޫދު ބުނެފައިވާ ގޮތުގައި، އެ ހިތާމަވެރި ދަތުރު ކުރަން ސުލައިމާނު ހުރީ ބިރުންނެވެ. 

އެގޮތުން އަޒުމީ ބުނީ، ސުލައިމާނު އެ ދަތުރު ކުރަން އެހާ ތައްޔާރު ނޫން ކަމަށާ، އަދި އޭނާ ހުރީ ފާޑަކަށް "ބިރުގެންފައި" ކަމަށް ތިމާގެ މީހެއް ގާތުގައި ބުނެފައިވާ ކަމަށެވެ. 

އެހެން ނަމަވެސް، އޭނާ އެ ދަތުރު ކުރީ، އެ ދަތުރު އޮތީ، ބައްޕައިންގެ ދުވަހާއި ދިމާވާ ގޮތަށް އައި ހަފްތާ ބަންދުގައި ކަމަށް ވުމާއެކު، ބައްޕަ އުފާ ކޮށްދިނުމުގެ މަގުސަދުގައި ކަމަށްވެސް ސުލައިމާނު ބުނެފައިވާ ކަމަށް އަޒުމީ ހާމަކޮށްފައިވެއެވެ. 

މިހިތާމަވެރި ހާދިސާގައި ސުލައިމާނު އާއި އޭނާގެ ބައްޕަވެސް ނިޔާވެފައި ވާއިރު، އެ ދެމީހުންގެ ޢާއިލާއިން ވަނީ، ދެ މީހުންނަށްޓަކައި އަދި ޢާއިލާއަށްވެސް ހެޔޮ ދުޢާ ކޮށްދިނުމަށް އެދިފައެވެ. 

ސަބްމާސިބަލް އިން ދަތުރު ކުރި މީހުންގެ ހަށިތައް ފެނޭތޯ އެމެރިކާގެ ކޯސްޓްގާޑުން އަދިވެސް އަންނަނީ މަސައްކަތް ކުރަމުންނެވެ.  

ޓައިޓަން އިމްޕްލޯޝަންގެ ސަބަބުން މަރުވި މީހުން 

މި ހާދިސާގައި މަރުވެފައި ވަނީ އިނގިރޭސިވިލާތުގެ ބިލިޔަނަރެއް ކަމުގައިވާ ހޭމިޝް ހާޑިންގާއި، ޕާކިސްތާނުގެ ވިޔަފާރިވެރިއެއް ކަމުގައިވާ ޝާހުޒާދާ ދާވޫދާއި އޭނާގެ ދަރިފުޅު ސުލައިމާން ދާވޫދާއި، ފަރަންސޭސިވިލާތުގެ ދިރާސާކުރާ މީހެއް ކަމުގައިވާ ޕޯލް-އޮންރީ ނާގޮލޯއެވެ. ސަބްމެރިން ދުއްވަން އިން ޕައިލެޓަކީ އޯޝަންގޭޓް ކުންފުނީގެ ބާނީ އަދި ސީ.އީ.އޯ ސްޓޮކްޓަން ރަޝްއެވެ.