ސަރުކާރުން އެމްއާރްއެމްއާއެކު ހަދާފައިވާ ކޯލިޝަނާއި ޚިލާފަށް، އެޕާޓީގެ ސްލޮޓުގައި ހަޔަރ އެޑިޔުކޭޝަން މިނިސްޓްރީގެ ޑެޕިޔުޓީ މިނިސްޓަރގެ މަގާމްގައި ހުންނެވި އިސްމާއިލް ޒަބީހް ވަކިކުރުމަށް ނިންމާފައިވާތީ އެމްއާރްއެމް އިން ކަންބޮޑުވުން ފާޅުކޮށްފިއެވެ.

އެގޮތުން މިކަމާއި ގުޅިގެން އެމްއާރްއެމް އިން ނެރުން ބަޔާނުގައި ބުނެފައިވަނީ ޒަބީޙު ވަކި ކުރުމަށް ރައީސުލްޖުމްހޫރިއްޔާގެ އޮފީހުން އަންގާފައިވަނީ މިދިޔަ ބުރާސްފަތި ދުވަހުގެ ރޭ ކަމަށެވެ.

އަދި ޒަބީހު އަކި ތައުލީމީ އަދި ޤާބިލު ބޭފުޅެއްކަން ފާހަގަކޮށް އެމްއާރްއެމް އިން ވަނީ ކުއްލިއަކަށް ޒަބީހު މަގާމުން ވަކިކޮށްފައިވާ ގޮތާއިމެދު ކަންބޮޑުވުން ފާޅުކޮށްފައެވެ.

މިއާއިއެކު ޒަބީހްް މަޤާމުން ވަކިކުރަންޖެހޭވަރުގެ އަމަލެއް ކޮށްފައިނުވާނެކަން ކަށަވަރުކޮށްދީ އެމްއާރްއެމްއިން ބުނެފައިވަނީ ޒަބީހްއަކީ ހަވާލުކުރެއްވި މަގާމްގެ މަސްއޫލިއްޔަތު ނުހަނު ފަރުވާތެރިކަމާއި ތެދުވެރިކަމާއި އިޚްލާސްތެރިކަމާއެކު އަދާކުރެއްވި ބޭފުޅެއް ކަމަށެވެ. 

އެގޮތުން ފާއިތުވެިދޔަ 4 އަހަރާއި 4 މަހުގައި ޒަބީހް ޑެޕިއުޓީ މިނިސްޓަރެއްގެ ގޮތުގައި ހުންނަވައިގެން ކޮށްދެއްވި ޚިދުމަތްތައް އެމްއާރްްއެމްގެ ބަޔާނުގައި ވަނީ ފާހަގަކޮށްފައެވެ.

މީގެ ތެރޭގައި ތަފާތު އެކި ސަބަބުތަކާހުރެ ދަރިވަރުންނަށް ނުދެއްކި، ބޮޑެތި އަދަދު ތަކުން އަރައިގެން ގޮސްފައިވާ ސްޓޫޑެންޓް ލޯނު ރީޕޭމެންޓް ފައިސާ ވަކި އުސޫލެއްގެ ދަށުން އެކި މަސް މަހަށް ބަހާލައިގެން ދެއްކޭނެ ގޮތްތައް ހަމަޖައްސަވާ ދައުލަތަށް ނުލިބި ހުރި އެތައް މިލިއަން ރުފިޔާ ހޯއްދަވައި ދެއްވި ކަމަށް އެމްއާރްއެމް އިން ވަނީ ބުނެފައެވެ.

އެހެންކަމުން، ތައުލީމީ ގާބިލް ޒުވާނުން ގައުމަށް ޚިދުމަތްކުރުމުގެ ފުރުސަތު ދިނުމަކީ އެމްއާރްއެމް އިން ނުހަނު އިސްކަމެއްދޭކަމަކަށް ވާއިރު، ޒަބީހު ފަދަ ޚިދުމަތްތެރި ޒުވާނަކު މަގާމުން ވަކިކުރެއްވުމަކީ ބަލައިގެނެވޭނެ ކަމެއް ނޫން ކަމަށް އެ ޕާޓީއިން ވަނީ ބުނެފައެވެ.

މިއާއިއެކު ޕާޓީއާއި މަޝްވަރާނުކޮށް އަދި ވަކި ސަބަބެއް ބަޔާން ކުރުމެއް ނެތި ކޯލިޝަން އެގްރީމެންޓާއި ހިލާފަށް ސަރުކާރުން މި ނިންމުން ނިންމާފައިވާތީ އެމްއާރްއެމް އިން ވަނީ ކަންބޮޑުވުން ފާޅުކޮށްފައެވެ.

އަދި ސިޔާސީ މަޤްސަދު ހާސިލުކުރެވޭނެކަމަށް، މަޤާމުގެ މަސްއޫލިއްޔަތު އަދާކުރަން ބޭނުން ޝަރުތު ހަމަނުވާ ގިނަ އަދަދެއްގެ ބަޔަކަށް ހަދިޔާ ބަހާ އުސޫލުން ސިޔާސީ މަގާމު ދިނުމަކީ ޤައުމަށް ނުހަނު ގެއްލުން ބޮޑު ކަމެއް ކަމުގައި އެމްއާރްއެމް އިން ދެކޭ ކަމަށްް އެ ޕާޓީއިން ވަނީ ބުނެފައެވެ.