ކޮންމެ ދުވަހަކު އެކިއެކި ވުޒާރާތަކަށާއި މިނިސްޓްރީތަކަށް އަދި މުއައްސަސާތަކަށް އިދިކޮޅުގެ ފަރާތުން ޓީމުތައް ގޮސް، ބޭނުންވާ މައުލޫމާތު އެއްކޮށް، މައުލޫމާތު ހޯދުމަށް އިދިކޮޅު ކޯލިޝަނުން ކުރާ މަސައްކަތުގައި މުއައްސަސާތަކުން އެއްބާރުލުމެއް ނުދޭ ކަމަށް އިދިކޮޅުން ބުނެފިއެވެ.

އިދިކޮޅު ޕީޕީއެމް/ޕީއެންސީން ތައްޔާރުވަމުން ދަނީ ވެރިކަމާ ހަވާލުވާން ކަމަށް ބުނެ ޕްރޮގްރެސިވް ކޮންގްރެސް ކޯލިޝަނުން ވަނީ މައުލޫމާތު އެއްކުރަން މުއައްސަސާތަކަށް ޒިޔާރަތް ކުރަން ފަށާފައެވެ.

އެގޮތުން ޖުމުލަ 31 ޓީމަކަށް ބަލާހައިގެން 31 ލީޑަރުން ހިމެނޭ ގޮތަށް، ޓީމްތަކުގެ މަސައްކަތް ކުރިއަށް ގެންދަން ވަނީ ފަށާފައެވެ.

Advertisement

އެ މަސައްކަތުގެ ތެރެއިން މިހާތަނަށް ނުވަ މުއައްސަސާއަކަށް ދެވުނު އިރު، ގިނަ ތަންތަނުން މިކަމުގައި އެއްބާރުލުން ނުދޭކަމަށް އިދިކޮޅުން ވަނީ ބުނެފައެވެ.

އިދިކޮޅުން މިހާތަނަށް ޒިޔާރަތް ކޮށްފައި ވަނީ އާސަންދަ، އެޑިއުކޭޝަން މިނިސްޓްރީ، އިކޮނޮމިކް މިނިސްޓްރީ، ހެލްތް މިނިސްޓްރީ، އިމިގްރޭޝަން، އެޗްއާރްސީއެމް، އެންޓި ކޮރަޕްޝަން ކޮމިޝަން، ވެމްކޯ އަދި ފެނަކައަށެވެ.

އިދިކޮޅުން ބުނީ އޭގެ ތެރެއިން ކިރިޔާވެސް އެއްބާރުލުން ދިނީ އެންޓި ކޮރަޕްޝަން ކޮމިޝަނުން ކަމަށެވެ.

އިދިކޮޅުން ދިޔަ ޓީމާ އިކޮނޮމިކް މިނިސްޓްރީން ބައްދަލު ކުރާނެ މީގެއް ނުވި ކަމަށާއި ހެލްތް މިނިސްޓްރީއަށް ގޮސް މާ ގިނައިން ސުވާލު ކުރުމުން އެތަނުގެ މުވައްޒަފުން ތިބީ ކޯފާވެފައި ކަމަށް އިދިކޮޅުން ބުންޏެވެ.

އަދި އެހެން ވުޒާރާތަކުން މައުލޫމާތުދޭން ޖެހިލުންވާކަމަށް އިދިކޮޅުން ފާހަގަކުރިއެވެ.