އިދިކޮޅު ޕީޕީއެމް/ޕީއެންސީގެ ހުރިހާ މެމްބަރުން، ޖުމްހޫރީ ޕާޓީގެ ރިޔާސީ ކެނޑިޑޭޓް ޤާސިމް އިބްރާހީމަށް ވޯޓު ދޭން އެދޭކަމަށް ޤާސިމް ވިދާޅުވެއްޖެއެވެ.
ޤާސިމް މިހެން ވިދާޅުވީ ޖޭޕީގެ 158 ވަނަ ކައުންސިލް ބައްދަލުވުމުގައިި ވާހަކަ ދައްކަަވަމުންނެވެ.
އިންތިހާބުގައި ކޮންމެ ބަޔަކާއެކުވެސް ކުރިއަށް ދާނެކަމަށް އިދިކޮޅުން ބުނެފައިވާކަން ފާހަގަ ކުރައްވައި ޤާސިމް ވިދާޅުވީ، ޖޭޕީއާ ގުޅެން އިދިކޮޅަށް ދައުވަތު ދިނުމުން އެކަން ގަބޫލު ނުކުރެއްވި ކަމަށެވެ.
ޤާސިމް ވިދާޅުވީ ކޮންމެ ޕާޓީއަކުންވެސް ވެރިކަމަށް އަންނަނީ ޖޭޕީން ކޮށްދޭ މަސައްކަތުން ކަމަށެވެ. އެހެންކަމުން މިއީ އެ ބޭފުޅުން ޖޭޕީއަށް އެކަމުގެ ބަދަލު ދެއްވަންވީ ފަހަރު ކަމަށް ޤާސިމް ވިދާޅުވިއެވެ.
"ޕީއެންސީއާ ޕީޕީއެމްގެ ހުރިހާ ބޭފުޅުން އަޅުގަނޑަށް ވޯޓު ދީފިއްޔަ ކީއްތޯ ވާނީ؟ ކޮބައިތޯ މައްސަލައެއް. އެމްޑީޕީއަށް ދެފަހަރަށް ވެރިކަން ހޯދައިދިނީމަ އަޅުގަނޑަށް ވޯޓު ދެއްވިއްޔަ ކީއްތޯ ވާނީ މިފަހަރު" ޤާސިމް ވިދާޅުވިއެވެ.
މީގެއިތުރުން ޤާސިމް ވިދާޅުވީީ އެމަނިކުފާނު ޕީޕީއެމްއަށް ސަޕޯޓް ނުކުރި ފަހަރު އެ ޕާޓީއަށް ވެރިކަން ނުލިބުނު ކަމަށެވެ.
ޤައުމު ތަރައްގީ ކުރެވޭނެ ސްޕީޑު ރަނގަޅަށް އެނގިވަޑައިގަންނަވާ ކަމަށާއި، އެ ސްޕީޑުގައި ގައުމު ކުރިއެރުވުމަށް އެމަނިކުފާނު ހުންނެވީ ތައްޔާރަށްކަމަށް ޤާސިމް ވިދާޅުވި އެވެ. އަދި އެމަނިކުފާނަށް އެ ފުރުސަތު ރައްޔިތުން ދެއްވައިފިނަމަ، ރައްޔިތުންގެ ހައްގުގައި ކުރަން ޖެހުނު ކޮންމެ މަސައްކަތެއް ކުރައްވާނެކަމަށް ޤާސިމް ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
