މާލޭ މީހުނަށް ހިލޭ ގޯތި ދިނުމަށްފަހު އަނެއްބައެއް އަތުން މިލިއަނުން ކުލި ނެގުމުން އިންސާފު ކޮބައިތޯ، ޖުމްހޫރީ ޕާޓީގެ ލީޑަރު އަދި އެ ޕާޓީގެ ރިޔާސީ ކެނޑިޑޭޓް ޤާސިމް އިބްރާހިމް ސުވާލު އުފައްދައިފިއެވެ.
ޖޭޕީގެ 158 ވަނަ ކައުންސިލް ބައްދަލުވުމުގައި ވާހަކަ ދައްކަވަމުން ޤާސިމް ވިދާޅުވީ، އެމަނިކުފާނުގެ ވެރިކަމެއްގައި ހުޅުމާލޭގައި ހުރި ފްލެޓްތަކިގެ ކުލި އެއްފަހަރާ މާފުކޮށްދެއްވާނެ ކަމަށެވެ.
"ދެން މިހާރު މި ދައްކަނީ ގޯތީގެ ވާހަކަ. މާލޭ މީހުންނަށް 4000، 5000 ގޯތި ދޭ ވާހަކަ. އެއްބަޔަކަށް ވިއްކަނީ ހެޓުކިޔާފަ. ބޮޑުއަގުގަ 8 މިލިއަން 10 މިލިއަން ރުފިޔާއަށް ވިއްކަނީ. އަނެއް ބަޔަކަށް ދޭންވީ ހިލޭ. ބަލަ ކޮބައި އިންސާފު. ކޮބައި އިހުސާންތެރިކަން" ޤާސިމް ވިދާޅުވިއެވެ.
މި ސަރުކާރަށްވެސް ވަރަށް ބޮޑަށް ފާޑުވިދާޅުވެ، އެމަނިކުފާނުގެ ކުންފުނިން ހިއްކާފައިވާ ބިމުންވެސް ކުލި ބޮޑުކުރާ ކަމަށް ޤާސިމް ވިދާޅުވިއެވެ.
ބޯހިޔާވަހިކަމަކީ އަސާސީ ހައްޤަކަށް ވާއިރު، ބައެއް ފަރާތްތަކަށް އަގުބޮޑުކޮށް ބިންތައް ދޫކުރާއިރު، ސަރުކާރުގެ ވަކި ސިޔާސަތެއްގެ ތެރެއިން ހިލޭ ބިންތައް ބަހަން ނިންމާފައިވާކަން އެމަނިކުފާނު ފާހަގަކުރެއްވި އެވެ. އަދި މިހާރު ދޫކޮށްފައިވާ ފްލެޓުތައް ހަދާފައިވާ އަގާއި ނުބައްދަލު ކުލި ނަގަމުންދާކަމަށް ޤާސިމް ވިދާޅުވި އެވެ.
އެކަންކަން ފާހަގަކުރައްވާ ޤާސިމް ވިދާޅުވީ ރައްޔިތުންގެ މެދުގައި އޮތް ތަފާތުކުރުންތައް ނައްތާލުމަށް އެމަނިފާނުގެ ވެރިކަމެއްގައި ހުޅުމާލޭގައި ސަރުކާރުން ބޯހިޔާވަހިކަން ފޯރުކޮށްދިނުމަށް އަޅާފައިވާ ފްލެޓުތަކުގެ ކުލި އެއްކޮށް މާފުކޮށްދޭނެ ކަމަށެވެ.
Advertisement
This content is created and paid for by advertisers and does not involve Voice Journalists
