ކ. ވާވެއްދިފަޅާ ގުޅިގެން ވިލާ ކުންފުނިން އެއްވެސް މުޢާމަލާތެއް ނުހިންގުމަށް އޭސީސީ އިން ވިލާ ކުންފުންޏަށް އެންގީ ރައީސުލް ޖުމްހޫރިއްޔާގެ އޮފީހުގެ ވެރިން އެންޓިކޮރަޕްޝަން ކޮމިޝަނަށް އަންގައިގެން ކަމަށް ޖުމްހުރީ ޕާޓީގެ ލީޑަރު ގާސިމް އިބްރާހިމްގެ އެޑްވައިޒަރު އަހުމަދު ނިހާން ހުސެއިން މަނިކު ވިދާޅުވެއްޖެއެވެ.
ނިހާނު މިހެން ވިދާޅުވީ ޖުމްހޫރީ ޕާޓީގެ 158 ވަނަ ކައުންސިލް ބައްދަލުވުމުގައި ވާހަކަދައްކަވަމުންނެވެ.
ނިހާން ވިދާޅުވީ، އެންޓި ކޮރަޕްޝަން ކޮމިޝަންނުން ޤާސިމްގެ އަމިއްލަ ހަލާލު ވިޔަފާރިއެއްގެ ތެރެއަށް ވަދެ އެކަން ހުއްޓުވުން އެއީ ކުޑަކުޑަ ކަމެއް ނޫން ކަމަށެވެ.
"މިއޮތް ބޮޑު މާސިންގާ ސިޔާސީ ޕާޓީއާ އަދި ދިވެހިރާއްޖޭގެ އެތައް ސަރަހައްދެއްގަ ތިބި އެތައް ސަތޭކަ ދިވެހި ރައްޔިތުން، އެތައް ހާސް ދިވެހި ރައްޔިތުންގެ ވަރަށް ގިނަ ކަންތައްތަކާ ގުޅި ލާމެހިފަ ވާ ފަރާތެއް. ރައްޔިތުންގެ ހައްގުތަކެއް މަނިކުފާނުގެ ހުރިހާ ދިމާލަކުން، މިކަހަލަ ކަންތައްތަކުގެ ތެރެއަށް އެބަ ހުރި ހިމެނިފަ" ނިހާން ވިދާޅުވިއެވެ.
މީގެ އިތުރުން ނިހާން ވިދާޅުވީ ހަސްމެއްގެ މެދުގައި އޮންނަ މައްސަލައެއް ނިންމާނީ އެ ގައުމެއްގެ ސްޕްރިން ކޯޓުން ކަމަށެވެ. ރާއްޖޭގެ ސްޕްރިމް ކޯޓުން މި މައްސަލައިގައި ގޮތެއް ނިންމާފައި އޮއްވާ، ސިޔާސީ ބޭނުމަށް، ރިޔާސީ އަހަރަށް ވާތީ ވިލާ ކުންފުނިން ވިއްކަން އުޅުނު ފަޅު ހުއްޓުވީ ކަމަށް ނިހާން ވިދާޅުވިއެވެ.
ޓޫރިޒަމް މިނިސްޓްރީން ދޫކުރި ބޭނުމާ އެއްގޮތަށް މަސައްކަތް ކުރިއަށް ނުދާ ކަމަށް ބުނެ ވާވެއްދި ފަޅު ވިލާ ކުންފުނީގެ އަތުން އަތުލީ ކުރީގެ ރައީސް އަބްދުالله ޔާމީންގެ ވެރިކަމުގައި 2015 ގައެވެ. އޭރު އަތުލި ތަންތަނުގެ ތެރޭގައި ވާވެއްދި ފަޅާއި ކ. ބޮލިދިއްފަރާއި ރ. މާނެންފުއްޓާއި ގދ. ގަޒީރާ އާއި ކ. މާދިއްގަރުފަޅު ހިމެނެއެވެ. ނަމަވެސް މި މައްސަލައިގައި ސަރުކާރުން އެއްބަސްވުން އުވާލީ ގާނޫނާ ހިލާފަށް ކަމަށް ބުނެ ސުޕްރީމް ކޯޓުން ވަނީ އެ މައްސަލަ ވިލާއާ އެއްކޮޅަށް ފަހުން ނިންމައިފައެވެ.
އެފަދައިން ކަން ހިނގާފައިވަނިކޮށް، ވާވެއްދިފަޅާއި ގުޅިގެން އެއްވެސް މުޢާމަލާތެއް ނުހިންގުމަށް ދާދިފަހުން އެންޓި-ކޮރަޕްޝަން ކޮމިޝަނުން ވިލާ އަށް ވަނީ އަންގާފައެވެ.
Advertisement
This content is created and paid for by advertisers and does not involve Voice Journalists
