ދަ ޑިމޮކްރެޓްސް ޕާޓީއާ އެކީ މަސައްކަތް ކުރި ކަމުގައި ވިޔަސް ޕީޕީއެމްގެ އަސާސް ތަކަށް ބަދަލެއް ނާންނާނެ ކަމަށް އެ ޕާޓީން ބުނެފި އެވެ. 

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ވެރިކަން ނިމުމަކަށް ގެނައުމަށްޓަކައި، ކުރިއަށް އޮތް ރިޔާސީ އިންތިހާބުގައި އެކީގައި މަސައްކަތް ކުރުމަށް ޕީޕީއެމާއި ދަ ޑިމޮކްރެޓްސް ނިންމި ނިންމުމާއި ގުޅިގެން ވާހަކަދައްކަވަމުން ޕީޕީއެމްގެ ނާއިބު ރައީސް، އަދި ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވީ، ޑިމޮކްރެޓްސް ޕީޕީއެމް އެކީގައި މަސައްކަތް ކުރަން ނިންމެވީ، ރައީސް ޞާލިހުގެ 'ނާގާބިލް، ވެރިކަމެއްގެ ސިފަ ނެތް ވެރިކަން ވައްޓާލުމަށް' ކަމަށެވެ. 

އަދި ކުރިއަށް އޮތް ރިޔާސީ އިންތިހާބުގައި ޑިމޮކްރެޓްސް އާއި އެކީގައި މަސައްކަތް ކުރި ނަމަވެސް، ޕީޕީއެމްގެ މައިގަނޑު އަސާސްތަށް "ކޮންޕްރޮމައިޒް" ނުވާނެ ކަމަށް ޝިޔާމް ވިދާޅުވި އެވެ. 

Advertisement

"އަޅުގަނޑުމެންގެ މައިގަނޑު އަސާސްތައް ކޮންޕްރޮމައިޒް ނުވާނެ. އެނގިވަޑައިގަންނަވާނެ އެކަކު އަނެކަކާ އޮންނައިރު ވެސް، ދެމީހުން އެއްބަސްވާންޖެހޭ ނޫންތޯ؟ ދެ ފަރާތުން އެއްބަސްވާ ކަންތަކާއެކީގައި މިއުޅެނީ. އަޅުގަނޑުމެން ޔަގީނުންވެސް އަޅުގަނޑު މެންގެ މައިގަނޑު އަސާސްތައް ކޮންޕްރޮމައިޒް ވާނެ އެއްވެސް ކަމަކާ އެކީގައި މަސައްކަތެއް ނުކުރާނަން."

"އަޅުގަނޑުމެންނަށްވެސް މަސައްކަތް ކުރެވޭ ކޮމަން ގްރައުންޑެއް މި ހޯދަނީ. ދެން މިއީ ސިލްސިލާ ބައްދަލުވުން ތަކެއް. މިއަދު ހަމައެކަނި މި ބެލި ކަމަކީ އަޅުގަނޑުމެންގެ މައިގަނޑު. އަޅުގަނޑު މެންގެ މައިގަނޑަކީ މިހާރު މިއޮތް ވެރިމީހާ. މި ވެރިމީހާ ބާލަން އަޅުގަނޑުމެންނަށް ކުރެވޭނެ މަސައްކަތް ތަކަކީ ކޮބާތޯ؟ ދެން އަޅުގަނޑުމެން ތަރުތީބު ކުރާނީ. އަޅުގަނޑުމެން މި ގަސްތު ކުރަނީ ހަފްތާ އަކު ތިން ބައްދަލުވުން ކުރިއަށް ގެންގޮސްގެން ވާހަކަ ދައްކަން." ޝިޔާމް ވިދާޅުވި އެވެ.

ޝިޔާމް އިތުރަށް ވިދާޅުވީ، ރިޔާސީ އިންތިހާބު ބާއްވަން ވަގުތު ވަރަށް ކުޑަތަން ވެފައިވާ ކަމަށެވެ. އެހެންކަމުން، ކަންކަން ވަރަށް އަވަހަށް ތަރުތީބު ކޮށްގެން ކުރިއަށް ދިޔުމަށް މަސައްކަތް ކުރައްވާނެ ކަމަށެވެ.