ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ވެރިކަން ނިމުމަކަށް ގެނައުމަށް ކުރަންޖެހުނު ހުރިހާ ކަމެއް ކުރަން ތައްޔާރަށް ހުންނެވި ކަމަށް ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެންބަރު ޢަލީ އާޒިމް ވިދާޅުވެއްޖެއެވެ. 

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ވެރިކަން ނިމުމަކަށް ގެނައުމަށްޓަކައި، ކުރިއަށް އޮތް ރިޔާސީ އިންތިހާބުގައި އެކީގައި މަސައްކަތް ކުރުމަށް ޕީޕީއެމާއި ދަ ޑިމޮކްރެޓްސް ނިންމި ނިންމުމާއި ގުޅިގެން މައުލޫމާތު ދެއްވުމަށް ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ، ޑިމޮކްރެޓްސް އާއި ޕީޕީއެމް ގުޅިގެން އެއް ކެންޑިޑޭޓަކު ނެރޭނެތޯ ސުވާލު ކޮށްފައެވެ. 

އެ ސުވާލުގެ ޖަވާބު ދެއްވަމުން އާޒިމް ވިދާޅުވީ، ޕީޕީއެމާއި އެ ޕާޓީއާއި ދެމެދުވެސް ގަބޫލުކުރެވޭ އެއްގޮތް ކަންކަން ހުރި ކަމަށެވެ. އަދި ހަމައެހެންމެ، ދެ ޕާޓީ ދެމެދުގައި ފުށުއަރާ ކަންކަންވެސް ހުރި ކަމަށެވެ. އެހެންކަމުން ދެ ޕާޓީން މަސައްކަތް ކުރަމުންދަނީ ފުށުއަރާ ކަންކަމާއި މެދު އެއްބަސްވެގެން އެކުގައި މަސައްކަތް ކުރައްވަން ކަމަށް އޭނާ ވިދާޅުވި އެވެ. 

Advertisement

އަދި، ދެ ޕާޓީ އެއްވެގެން ވަކި ކެންޑިޑޭޓަކު ނެރޭނެ ކަމަށް ސީދާ ޖަވާބު ނުދެއްވި ނަމަވެސް އެކަމުގެ އިޝާރާތެއް ދެއްވަމުން އާޒިމް ވަނީ، ރައީސް ޞާލިހުގެ ވެރިކަން ނިންމުމަށް ކުރަންޖެހުނު ކަންކަން ކުރައްވާނެ ކަމަށެވެ. 

އާޒިމްގެ ވާހަކައާއި ގުޅުވައި ޕީޕީއެމްގެ ނާއިބު ރައީސް އަހުމަދު ޝިޔާމް ވިދާޅުވީ، ރިޔާސީ އިންތިހާބު ކައިރި ވެފައިވާއިރު, އެ އިންތިހާބަކީ މިނިވަން އިންތިހާބަކަށް ވުމަށް ވެސް ހުރަސްތަކެއް އޮތް ކަމަށެވެ. އަދި އެކަންކަން ނިމެންޖެހޭ ކަމަށް އޭނާ ވިދާޅުވި އެވެ. އަދި އެ ކަމުގައި ޑިމޮކްރެޓްސް އާއި އެކުވެސް މަސައްކަތް ކުރެވިދާނެ ކަމަށެވެ.