ފުޓުބޯޅަ ޓީމު އަދި މެޗަކުން ބަލިވިޔަސް އެއީ މާބޮޑު މައްސަލައެއްކަމަށް ނުދެކޭ ކަމަށް މިނިސްޓަރ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަރމެންޓް އަހުމަދު މަހުލޫފް ވިދާޅުވެއްޖެއެވެ.

މިނިސްޓަރު މިހެން ވިދާޅުވީ ސަރަހައްދީ އެންމެ ބޮޑު ފުޓްބޯޅަ މުބާރާތް ސާފްޗެމްޕިއަންޝިޕް 2023 ގައި މިއަދު ހަވީރު ކުޅެވުނު ގްރޫޕް ބީގެ މެޗުގައި ދިވެހިރާއްޖެ އާއި ބަންގްލަދޭޝް ވާދަކުރި މެޗު 3-1 ގެ ނަތީޖާއަކުން ރާއްޖެ ބަލިވުނާ ގުޅިގެންނެވެ.

މިއީ 1985 ވަނަ އަހަރު ސާފު ގޭމްސްގައި 8-0 ގެ ނަތީޖާއަކުން ދިވެހިރާއްޖެ އަތުން މޮޅުވިފަހުން ފާއިތުވެދިޔަ 37 އަހަރުތެރޭގައި ދިވެހިރާއްޖެ އަތުން ބަންގްލަދޭޝަށް ހޯދުނު އެންމެ ތަފާތުބޮޑު ނަތީޖާއެވެ.

Advertisement

އެކަމާ ގުޅިގެން ގިނަ ބަޔަކު ފުޓުބޯޅައަށް ފާޑު ކިޔަމުންދާ ދަނޑިޅެއްގައި މަހުލޫފް ވިދާޅުވީ ޖެހިޖެހިގެން ދެވަނަ ފަހަރަށް ބަންގްލަދޭޝް އަތުން ބަލިވުމަކީ ދެރަކަމެއް ކަމަށެވެ. އަދި ރަނގަޅު ކުރަންޖެހޭ ކަންތައްތަކެއް އެބަހުރިކަމަށް ވިދާޅުވިއެވެ.

ފުޓުބޯޅަ ވަސީލަތްތައް ގާއިމު ކުރުމަށް މީގެކުރިން އެއްވެސް ބަޔަކު ނުކުރާ މަސައްކަތްވެސް މިސަރުކާރުން ކޮށްފައި ވާނެކަން ފާހަގަ ކިރައްވައި މަހުލޫފް ވިދާޅުވީ ހަމައެކަނި ފުޓުބޯޅަ ތަރައްގީކުރުމަށް 50 ބޮޑު ފުޓުބޯޅަ ދަނޑު އެކި ރަށްރަށުގައި ގާއިމް ކުރެވިއްޖެ ކަމަށާއި ޖުމްލަ 120 ދަނޑުގެ މަސައްކަތް ކުރިއަށް ދާ ކަމަށެވެ.

"މިކަންކަމުގެ ނަތީޖާ އަހަރުތަކެއް ފަހުން އިރާދަކުރެއްވިއްޔާ އަދި ފެންނާނެ" މަހުލޫފް ވިދާޅުވިއެވެ.

ނަމަވެސް މިސަރުކާރުން ހަމައެކަނި ކުރިއަރުވާ ތަރައްގީކުރަން މަސައްކަތްކުރަނީ ފުޓުބޯޅަ އެކަނި ނޫން ކަމަށް މަހުލޫފް ވިދާޅުވިއެވެ. އެގޮޮތުން ކުޅިވަރުގެތަކުގެ މެދުގައި ހުރި ތަފާތުކުރުންތައް ނައްތާލެވިއްޖެ ކަމަށާއި ހުރިހާ ކުޅިވަރަކުން ބައިވަރު ފުރުސަތުތައް ފަހިކޮށް ގިނަ ދޮރުތައް ހުޅުވާލަދީފައި ވާނެ ކަމަށް މަހުލޫފް ވިދާޅުވިއެވެ.

އޭގެ ނަތީޖާ އެކުޅިވަރުތަކުން ދައްކަމުންދާ ކަމަށްވެސް މަހުލޫފް ވިދާޅުވިއެވެ.

އެގޮތުން ސްޕެޝަލް އޮލިމްޕިކްސް މޯލްޑިވްސް އަދި މޯލްޑިވްސް ޕެރަލިމްޕިކް ކޮމިޓީ އުފައްދައި، ހާއްސައެހީތެރިކަން އަދި ނުކުޅެދުންތެރިކަން ހުންނަ ކުދިން ކުޅިވަރުކުޅެ ބައިނަލްއަގުވާމީ މައިދާނުގައި ވާދަކުރުންފަދަ ގިނަ ފުރުސަތުތައް ހުޅުވައި ދިނުމުގެ ނަތީޖާއެއްގެ ގޮތުން މިއަދު އެކުދިން ރާއްޖެއަށް ރަން މެޑަލް އާއި ބްރޯންޒް މެޑަލް ހޯދައިދިންކަން މަހުލޫފް ފާހަގަ ކުރެއްވިއެވެ.

"ފުޓުބޯޅަ ޓީމު އަދި މެޗަކުން ބަލިވިޔަސް އެއީ މާބޮޑު މައްސަލައެއްކަމަށް މިއަދު ނުދެކެން. ރަނގަޅު ކުރަންޖެހޭ ކަންކަން ބަލާ ސަރުކާރުން ދޭންޖެހޭ އެއްބާރުލުން އަބަދުވެސް ދޭނަން. އެކަމާ ދެރަވާއިރު އަޅުގަނޑުމެންގެ ސްޕެޝަލް އޮލިމްޕިކްސް އެތުލީޓުން ހޯދަދިން ކާމިޔާބީއާއިއެކު ލިބޭ ހިތްހަމަޖެބުމާއި ލިބޭ އުފާ މާބޮޑު. ބަލިވީ ސަރައްދީ މުބާރާތެއްގެ މެޗަކުން، ރަންމެޑަލްތައް ލިބުނީ މުޅި ދުނިޔެއާއި ވާދަކޮށްގެން." މަހުލޫފް ވިދާޅުވިއެވެ.

މީގެ އިތުރުން މަހުލޫފް ވިދާޅުވީ މާޔޫސްކަން ދޫކޮށްލައި ހަމައެފޯރީގައި ނުކުމެ، ސްޕެޝަލް އޮލިމްޕިކްސް ޓީމަށް ހޫނު މަރުހަބާއެއް ކިޔުމަށް އަންނަ މަހުގެ ދެވަނަ ދުވަހުގެ ހެނދުނު 9:45 އަށް ރަސްމީ ފާލަމަށް ދިއުމަށެވެ.