އިލެކްޝަންސް ކޮމިޝަނާމެދު ރައްޔިތުންގެ %57 ތާއީދެއް ނެތް ކަމަށް ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވެއްޖެއެވެ.
ހަސަން ލަތީފް މިހެން ވިދާޅުވީ އިދިކޮޅު ސިޔާސީ ޕާޓީތަކުން މިއަދު ބޭއްވި ޕްރެސް ކޮންފަރެންސްގައި "ދަ ޑިމޮކްރެޓްސް" ގެ ފަރާތުން ވާހަކަ ދައްކަވަމުންނެވެ.
ހަސަން ލަތީފް ވިދާޅުވީ އިންތިހާބަށް ތައްޔާރީތައް ވަމުން ދާއިރު، އިދިކޮޅު ހުރިހާ ސިޔާސީ ޕާޓީތަކެއްގެ ވަރަށް ބޮޑު ކަންބޮޑުވުންތަކެއް އެބަހުރި ކަމަށެވެ.
"ޕީޕީއެމް ޕީއެންސީ ކޯލިޝަން، ޖުމްހޫރީ ޕާޓީ، އެމްއެންޕީ، އެމްއާރްއެމް، އަދި ދަ ޑިމޮކްރެޓްސް، އަޅުގަނޑުމެން މި ހުރިހާ ޕާޓީތަކެއްގެ ވެސް ކަންބޮޑުވުންތަކެއް އެބަހުރި އިލެކްޝަންސް ކޮމިޝަނުން މި އިންތިހާބާ ގުޅޭގޮތުން ކުރައްވަމުން ގެންދާ ކަންކަމުގަ" ހަސަން ލަފީފް ވިދާޅުވިއެވެ.
ސީދާ އިލެކްޝަންސް ކޮމިޝަނުން ނޫނަސް، އިންތިހާބާ ގުޅޭގޮތުން ދައުލަތުގެ އެކިއެކި އެހެން އިދާރާތަކަށްވެސް ސަރުކާރުގެ ނުފޫޒު ވަދެގެން ހިންގޭ ބައެއް ކަންކަމުގެ ސަބަބުން ވަރަށް ކަންބޮޑުވާކަމަށް ހަސަން ލަތީފް ވިދާޅުވިއެވެ.
މީގެ އިތުރުން ހަސަން ލަތީފް ވިދާޅުވީ އިންތިހާބެއް މިނިވަން ކަމާއެކު ދެފުއް ފެންނަ ކަމަށް ވާނީ ހަމައެކަނި ވޯޓުލާ ވަގުތު އެކަނި ހިނގާ ކަމެއްގެ ސަބަބުން ނޫން ކަމަށެވެ.
"އަޅުގަނޑުމެން ކަންބޮޑުވާ ކަމެއް އެއީ، 2022 ވަނަ އަހަރު ނިމެން ދަނިކޮށް ހަދާފަ އޮތް ސަރވޭއެއްގަ އެބަ ދައްކާ އިލެކްޝަންސް ކޮމިޝަނާ ދޭތެރޭގަ ރައްޔިތުންގެ 57 ޕަސެންޓް މީހުންގެ ތާއީދު ނެތްކަން." ހަސަން ލަތީފް ވިދާޅުވިއެވެ.
އޭގެ ކުރިން 2013 ވަނަ އަހަރު އިލެކްޝަންސް ކޮމިޝަނާމެދު އޮންނަ ތާއީދު މިނެފައި އޮތްއިރު، 74 އިންސައްތަ މީހުންގެ ތާއީދު އޭރު އޮތްކަމަށް ހަސަން ލަތީފް ވިދާޅުވިއެވެ.
އެހެންކަމުން އިލެކްޝަންސް ކޮމިޝަނާ ދޭތެރޭގައި ރައްޔިތުންގެ ތާއީދު ކުޑަވީ ވަރަށް ގިނަ ސަބަބުތަކެއް ހުރުމުން ކަމަށް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
