ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް ވަފާތެރި މެންބަރުން އުފައްދާފައިވާ ދަ ޑިމޮކްރެޓްސް އާއި އެކީ މަސައްކަތް ކުރެއްވުމާއި ގުޅޭގޮތުން، އިދިކޮޅު ޕީޕީއެމް/ޕީއެންސީ ކޯލިޝަންގެ ކެންޑިޑޭޓް ރައީސް ޔާމީން އަބްދުލްގައްޔޫމް ވަރަށް ރަނގަޅަށް އިރުޝާދު ދެއްވާ ކަމަށް، އެ ކޯލިޝަނުން ބުނެފިއެވެ.
އިދިކޮޅުގެ އެންމެ ބޮޑު ޕާޓީ, ޕީޕީއެމުން ދަ ޑިމޮކްރެޓްސް އާއި އެކީގައި މަސައްކަތް ކުރުމަށް ނިންމައި، މަޝްވަރާތައް ކުރަން މިހާރު ވަނީ ފަށާފައެވެ.
އެގޮތުން މިއަދުވެސް މަޝްވަރާ ބައްދަލުވުމެއް ބާއްވާފައިވާއިރު، އެ ބައްދަލުވުމަށްފަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ، ޑިމޮކްރެޓްސް އާއި އެކު ޕީޕީއެމް/ޕީއެންސީ މަސައްކަތް ކުރުމުގައި ކޯލިޝަން ތެރޭގައި ޚިޔާލު ތަފާތުވުންތައް ހުރިތޯ ސުވާލު ކޮށްފައެވެ. ވާހަކަ ދައްކަވަމުން، ޕީޕީއެމްގެ ނާއިބު ރައީސް ޝިޔާމް ވިދާޅުވީ، ކޮންމެ ބަޔަކާއި އެކީގައި މަސައްކަތް ކުރެއްވި ނަމަވެސް ޚިޔާލު ތަފާތުވުންތަކާއި ޚިޔާލު އެއްގޮތް ކަންކަން ހުންނާނެ ކަަމަށެވެ.
"އެގޮތުން މިއުޅެނީ ޚިޔާލު އެއްގޮތް ވެގެން. މި ސަރުކާރު ކަމު ނުދާ ކަމަށް ޚިޔާލު އެއްގޮތްވޭ. މި ސަރުކާރު ނިންމަންޖެހޭ ކަމަށް ޚިޔާލު އެއްގޮތްވޭ."
ޕީޕީއެމްގެ ނާއިބު ރައީސް އަހުމަދު ޝިޔާމް
މިއާއެކު ޝިޔާމް ވިދާޅުވީ، މީގެ ކުރިން އެމްޑީޕީގެ ތެރޭގައި ހުންނަވައިގެންވެސް އެ ސަރުކާރު ޒިންމާދާރު ކުރެއްވުމަށް ރައީސް ނަޝީދު މަސައްކަތް ކުރެއްވި ކަމަށެވެ. އެހެންނަމަވެސް، އެކަން އެގޮތަށް ވެފައި ނުވާ ކަމަށާ، ޑިމޮކްރެޓްސް އާއި ޕީޕީއެމް ގުޅެން ޖެހުނީވެސް އެފަދަ ސަބަބުތަކަށްޓަކައި ކަމަށެވެ. އަދި އެކަން ކަމުގައި އެނޫން ކަންކަމުގައިވެސް ޑިމޮކްރެޓްސް އާއި ޕީޕީއެމް އާއި ދެމެދުގައި، ޚިޔާލު އެއްގޮތްވާ ކަންތައްތަކުގައި ޚިޔާލު ތަފާތު ބޭފުޅެއް ނޫޅޭ ކަމުގެ ޔަގީންކަން ޝިޔާމް ވަނީ ތަކުރާރުކޮށް ދެއްވާފައެވެ.
ޝިޔާމް އިތުރަށް ވިދާޅުވީ، ޕީޕީއެމުން ކުރާ ހުރިހާ ކަމެއްވެސް ކުރަމުންދަނީ ރައީސް ޔާމީންގެ އިރުޝާދުގެ ދަށުން ކަމަށާ، އަދި ޑިމޮކްރެޓްސް އާއި އެކު މަސައްކަތް ކުރެއްވުމަށްވެސް ނިންމެވީ އެމަނިކުފާނުގެ އިރުޝާދާއެކު ކަމަށެވެ.
"ދެން އެނގިވަޑައިގަންނަވާނެ ރައީސް ޔާމީން ހުންނެވީ ޖަލުގައި. ޖަލުގައި ހުންނަވައިގެންވެސް ވަރަށް ރަނގަޅަށް މި ކަމުގައި އިންސްޓްރަކްޝަން އެބަ ދެއްވާ. ވަރަށް ރަނގަޅަށް. ހަމަ ޑިމޮކްރެޓްސް އާއި އެކީގައި މިކަންތައްތައް ކުރިއަށް ގެންދެވުމުގައި. އެނގިވަޑައިގަންނަވާނެ، ރައީސް ޔާމިންގެ އިންސްޓްރަކްޝަން އާއި އެކީގައި ނޫނީ ޕީޕީއެމް/ޕީއެންސީ ހަމަ ފިޔަވަޅެއްވެސް ނާޅާނެ."
ޕީޕީއެމްގެ ނާއިބު ރައީސް އަހުމަދު ޝިޔާމް
މީގެ އިތުރުން، ޕީޕީއެމާއި ޑިމޮކްރެޓްސް އެކީގައި މަސައްކަތް ކުރާތީ ކުރިމަތިވަމުންދާ ފާޑުކިޔުންތަކަށް ރައްދު ދެއްވަމުން، މެދު ހެންވޭރު ދާއިރާގެ މެންބަރު ޢަލީ އާޒިމް ވަނީ، މީގެ ކުރިން ކުރީގެ ރައީސް މައުމޫން އަބްދުލްޤައްޔޫމާއި ވަރަށް ބޮޑަށް އެމްޑީޕީ ދެކޮޅުކަން ފާހަގަ ކުރައްވާފައެވެ. އެހެން ނަމަވެސް، 2018 ގެ އިންތިހާބުގައި އެމަނިކުފާނާއި އެކުގައިވެސް މަސައްކަތް ކުރެއްވި ކަމަށް އޭނާ ވިދާޅުވި އެވެ. އެހެންކަމުން، ގައުމު ޚުދުމުހުތާރު ވެރިކަމަކާއި ދިމާއަށް ދާ ނަމަ، އެކުގައި މަސައްކަތް ކުރެވޭ ހިސާބަށް ދާނެ ކަމަށް އޭނާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
