މާލޭ ރައްޔިތުންނަށް ގޯތި ދިނުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ވައުދުފުޅުގެ ދަށުން މިފަހަރު ގޯތި ދީފައި ވާނީ މިބުގެ ތަނަވަސްކަން ނެތް ފަރާތްތަކަށް ކަމަށް ސަރުކާރު ބުނެއެވެ.

ހިލޭ ގޯތި ދިނުމާ ގުޅޭގޮތުން އިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި "ވޮއިސް" އިން ކުރި ސުވާލަށް ޖަވާބު ދެއްވަމުން ޕްލޭނިންގް މިނިސްޓްރު މުހައްމަދު އަސްލަމް ވިދާޅުވީ އެންމެންނަށްވެސް އިތުބާރު ކުރައްވާ ކަމަށާއި، ދިރިއުޅުމަށް ދިން ގޯތީގައި އެހެނިހެން ނަފާ ހޯދުމަށް މަސައްކަތްތައް ނުކުރާނެ ކަމުގެ ޔަގީންކަން އެބައޮތް ކަމަށެވެ.

ސަބަބަކީ ގޯތި ދީފައި ވަނީ ބިން ނެތް ފަރާތްތަކަށް ކަމުގައި ވާތީ ކަމަށް އަސްލަމް ވިދާޅުވިއެވެ.

"ދެން އަޅުގަނޑުމެން މިހާރު ގޯތި މި ދެނީ ބިމުގެ ތަނަވަސްކަމެއް ނެތް ފަރާތްތަކަށް. އަޅުގަނޑު ގަބޫލެއް ނުކުރަން މި ފަރާތްތަކުގެ ނިޔަތަކަށް ވާނީ މިތަން ލިބުނީމަ އެތަނުގަ ބޮޑު ހޮޓަލެއް އަޅާ، ގެސްޓް ހައުސްއެއްހަދާ އެކަން ކުރަން ކަމަކަށެއް. އާއްމު އުސޫލުން އަޅުގަނޑަކީ އެހެން އިންސާނުންނަށް އިތުބާރު ކުރާ މީހެއް. އެހެންވީމަ ޝައްކުގެ ނަޒަރަކުން ނުބަލަން" އަސްލަމް ވިދާޅުވިއެވެ.

މާލޭ ރައްޔިތުންނަށް ގޯތި ދިނުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ވައުދުފުޅުގެ ދަށުން ގޯތި ލިބުނު މީހުންގެ ލިސްޓު އާންމުކޮށްފައި ވާއިރު، ރައްޔިތުންގެ މަޖިލީހުގެ 9 މެމްބަރަކަށް ގޯތި ލިބިވަޑައިގަންނަވައިފިއެވެ. އެއީ ވެރިކަންކުރާ އެމްޑީޕީގެ ފަސް މެމްބަރުންނާއި ރައީސް ނަޝީދު އިސްކޮށް ހުންނަވައި އުފެއްވި ދަ ޑިމޮކްރެޓްސްގެ ހަތަރު މެމްބަރުންގެ އިތުރުން އެމްއެންޕީގެ މެމްބަރަކަށެވެ.

އޭގެ ތެރޭގައި ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒޭނާ އާދަމްގެ ދެމަފިރިންވެސް ހިމެނިވަޑައިގަންނަވައެވެ.

ބިންވެރިޔާ ސްކީމްގެ ދަށުން ގޯތި ލިބުނު މީހުންގެ ލިސްޓް މިހާރު ވަނީ ގެޒެޓުގައި ޝާއިޢު ކޮށްފައެވެ. އެ ލިސްޓު އަންނަނިވި ލިންކުން ބަލައިލެވޭނެއެވެ.

ލިސްޓު

އޭގެ ތެރެއިން ފުރަތަމަ ދިނުމަށް ހަމަޖެހިފައި ވަނީ މިހާރު އިއުލާނުކޮށްފައިވާ 5،000 ގޯއްޗެވެ.