ހައްޖު ދުވަހާއި އަޟްހާ ޢީދު ދުވަހުގެ މުނާސަބަތުގައި ސިޓީ ކައުންސިލް ސްމާޓް ލައިޓްތަކުން މި ތިން ދުވަހު ތަކްބީރުގެ އަޑު އިވޭނެ ކަމަށް ކައުންސިލުން ބުނެފިއެވެ.

އަޟްޙާ ޢީދަށް މާލޭގެ ބޮޑުތަކުރުފާނު މަގާއި، މަޖީދީމަގު އަދި ސޯސަންމަގުގެ އިތުރުން ވިލިމާލެ ހިމެނޭހެން ބައެއް ބޮޑެތި މަގުތައް ޒީނަތްތެރި ކުރުމުގެގޮތުން މާލެ އާއި ވިލިމާލޭގައި ޖުމްލަ 22 ގިޑިގެ އާއެކު 2224 ބޮކި މާލެ ސިޓީ ކައުންސިލުން ވަނީ ހަރުކޮށްފައި ކަމަށް މާލެ ސިޓީ ކައުންސިލުން ބުނެފައިވެއެވެ.

އެގޮތުން ސިޓީ ކައުންސިލުން ހަރުކޮށްފައިވާ ލައިޓްތަކަކީ ޗައިނާގެ އެހީގައި ހަރުކޮށްފައިވާ ލައިޓުތަކެކެވެ.

ސްމާޓް ލައިޓްތަކުން މިއަދު މެންދުރުން ފެށިގެން ވަނީ ތަކުބީރު އިއްވަން ފަށާފައެވެ. ސިޓީ ކައުންސިލުން ބުނީ މިއަދު ތަކްބީރު ޖަހާނީ ހަވީރު 4:15 އިން އިރުއޮއްސި 6 ގެ ނިޔަލަށް ކަމަށެވެ. އަދި މިރޭ 8:15އިން 11:30ށް ތަކްބީރު ޖެހުމަށްވެސް ވަނީ ހަމަޖެހިފައެވެ.

މީގެ އިތުރުން މާދަމާ މެންދުރުފަހާއި ރޭގަނޑު އަދި ބުރާސްފަތި ދުވަހު ވެސް ތަކްބީރު ޖެހުމަށް ހަމަޖެހިފައި ވާކަމަށް ސިޓީ ކައުންސިލުން ބުންޏެވެ.

އަޟްހާ ޢީދަށް މަރުޙަބާ ކިޔުމަށް މާލެ އާއި ވިލިމާލެ ކުލަބޮކިތަކުން ދިއްލައި ޖަރީ ކޮށްފައިވަނީ މާލެ ސިޓީ ކައުންސިލުންނެވެ.

އެގޮތުން އަޟްޙާ ޢީދަށް މަރުޙަބާ ކިޔުމުގެ ގޮތުން ހޯމަ ދުވަހުގެރޭ ޖުމްހޫރީ މައިދާނުގައި މާލެ ސިޓީ ކައުންސިލުން ބޭއްވި ޙަފްލާގައި މާލޭގެ އެކި ތަންތަނުގައި ހަރުކޮށްފައި ހުރި ގިޑިގެ ތަކާއި ކުލަބޮކިތައް ދިއްލާލެއްވީ މާލެސިޓީގެ މޭޔަރ ޑރ. މުޙައްމަދު މުޢިއްޒުއެވެ.

ބޮކިތައް ދިއްލާލުމަށްފަހު މޭޔަރު މުޢިއްޒު ވިދާޅުވީ، ރާއްޖެއަކީ 100 ޕަސެންޓު މުސްލިމް ޤައުމަކަށްވާއިރު އަދި މާލެއަކީ ވެރިކަން ކުރާ ރަށަށް ވާއިރު، ޢީދު ފަދަ މުސްލިމުން ފާހަގަ ކުރާ މުނާސަބަތުތައް ވަރަށް ރަސްމީކޮށް ފާހަގަކުރަން ޖެހޭ ކަމަށް ޤަބޫލުކުރައްވާ ކަމަށެވެ.

އަދި މުސްލިމުންނަށް އަންނަ އެންމެ ޚާއްސަ ދެ މުނާސަބަތަކީ އަޟްޙާ ޢީދާއި ފިތުރު ޢީދު ކަމަށްވީނަމަވެސް އެހެން މުހިންމު ދުވަސްތައް ކުލަބޮކިން ޒީނަތްތެރި ކުރާއިރު، އިސްލާމުންނަށް އެންމެ މުހިންމު މުނާސަބަތުތައް މިފަދައިން މީގެ ކުރިން ޒީނަތްތެރި ކުރެވިފައިނުވާކަން މޭޔަރ ފާހަގަ ކުރެއްވިއެވެ.

މީގެ އިތުރުން މޭޔަރ ވިދާޅުވީ އެންމެ އިސްކަން ދޭންޖެހޭނީ ދެ ޢީދު އެންމެ ކުލަގަދަކޮށް ފާހަގަކުރުން ކަމަށް ހުރިހާ ރައްޔިތުންވެސް ޤަބޫލުކުރައްވާނެ ކަމަށާއި، އެހެން ކަމުން މާލެސިޓީ ކައުންސިލުން އަޟްޙާ ޢީދަށް މަރްޙަބާ ކިޔުމަށް ޒަމާނީ ވިސްނުމެއްގައި ދުނިޔޭގެ ބައެއް އިސްލާމީ ޤައުމުތަކުގައި މިފަދަ އިސްލާމީ ޝިޢާރުތައް ފާހަގަކުރާގޮތަށް މާލެ ސިޓީ ކައުންސިލުންވެސް ރަސްމީ ޖަލްސާގައި މަޝްވަރާކޮށް މިގޮތަށް މާލެސިޓީ ޒީނަތްތެރިކުރުމަށް ނިންމެވީ ކަމުގައި މޭޔަރ ވިދާޅުވިއެވެ.