އީދަކީ الله ސުބުޙާނަހޫވަތަޢާލާ ކަނޑައަޅުއްވާފައިވާ ޙައްދުތަކާއި ޙުރުމަތްތައް ގިރާ ކުރުމަށް ހުޅުވާލެވޭ ދޮރެއް ނޫންކަމަށް މިއަދުގެ އީދު ޚުތުބާގައި ބުނެފިއެވެ.
އީދުގެ ދުވަސްތައް އުފާވެރި ބާއްޖަވެރި ދުވަސްތަކެއް ކަމުގައި ހެދުމަށް ނަސޭހަތްތެރިވަމުން މިއަދު އިއްވި ޢީދު ޚުތުބާގައި ވަނީ، ޢީދަކީ الله ހަނދުމަ ކުރުން މަތީ ދެމިތިބެންޖެހޭ ދުވަހެއްކަމަށާ، މިއީ އެކަކު އަނެކަކަށް ހިތްހެޔޮ ކޮށް، އެއްބަޔަކު އަނެއް ބަޔަކާ އަތާއިއަތް ޖޯޑުކޮށް، ސަލާމުގަލާމް ކުރާ ދުވަސްތަކަކަށް ހެދުމަށް ގޮވައިލައިފަ އެވެ.
މިއާއެކު ޚުތުބާގައި ބުނީ، އިސްލާމީ އީދަކީ އެކަނިވެރިޔާ އޭނާގެ އާއިލާގެ މަތިން، ފަޤީރު މީހާ އޭނާގެ މުހުތާދުތަކުގެ މަތިން، ބީރައްޓެހި މީހާ އޭނާގެ ރައްޓެހިންގެ މަތިން، ބިދޭސީ މީހާ އޭނާގެ ޤައުމުގެ މަތިން، ޔަތީމު ކުއްޖާ އޭނާގެ މައިންބަފައިންގެ މަތިން ހަނދާންކޮށްދޭ ދުވަސް ކަމަށެވެ.
އިސްލާމް ދީނުގައި އީދު ފާހަގަ ކުރުމަކީ ޝަހުވަތްތަކުގެ ފަހަތުން ދިއުން ނޫންކަން ފާހަގަކޮށް އީދު ޚުތުބާގައި އިތުރަށް ބުނީ، އެއީ الله ގެ ޙައްދުތަކާއި ހުރުމަތްތައް ގިރާ ކުރުމަށް ހުޅުވާލެވޭ ދޮރެއް ނޫން ކަމަށެވެ.
"އިސްލާމްދީނުގައި އީދު ފަހާގަކުރުމަކީ ޝަހުވަތްތަކުގެ ފަހަތުން ދިއުމެއް ނޫނެވެ. އެއީ الله ގެ ހައްދުތަކާއި ހުރުމަތްތައް ގިރާކުރުމަށް ހުޅުވައިލެވޭ ދޮރެއް ނޫނެވެ. އިސްލާމްދީނުގައި އީދުތަކަކީ الله ގެ އަމުރުފުޅުތަކަކަށް ކިޔަމަން ގަތުމާއި ވިދިގެން އަންނަ ދުވަސްތަކެކެވެ. އީދު ދުވަހަކީ އުފާ ފާޅުކުރުމުގެ ދުވަހެކެވެ. އެހެނަސް މި އުފާ ފާޅުކުރަންވާނީ الله ކަނޑައަޅުއްވާފައިވާ އިމުގެ ތެރޭގަ އެވެ. ކުޅިވަރު ކުޅުމާއި، އުފާކުރުމާއި، ކެއިންބުއިމަކީ އީދުގެ އުފަލުގެ ބައެކެވެ. އަހަރެމެން އީދު ފާހަގަކުރަންވާނީ އެހެން މީހުން އީދު ފާހަގަކުރާ ގޮތް ކޮޕީކޮށްގެނެއްނޫނެވެ."
ޢީދު ޚުތުބާ
މީގެ އިތުރުން، އީދުގެ އުފާ ފާޅު ކުރަންޖެހޭނީ އިސްލާމް ދީނުގައި ޝަރުއު ކުރައްވާފައިވާ އިމުގެ ތެރެއިންކަން ފާހަގަކޮށް ޚުތުބާގައި އިތުރަށް ބުނީ، އަހަރުމެން އީދު ފާހަގަކުރަން ޖެހޭނީ އެހެން މީހުން އެކަން ކުރާ ގޮތް ކޮޕީ ކޮށްގެން ނޫން ކަމަށެވެ.
Advertisement
This content is created and paid for by advertisers and does not involve Voice Journalists
